2 Coríntios 13

Nswɛɛŋ a ntsüü anà mbɔr

1 Yi mbalà yàtär in’yà mɛ akà bɛ. Asànaa bàsön ya naa: « Ndaa yanswà bàyàtsul unsà imbäl a baar bɔ̈ɔ̈l itàkal atär. » 2 Mɛ kàkyàtàtɛn kusà, asànaa umpal kayi mɛ mbalà yàyweel, mɛ in’fàfuur ya ŋàbawà mpa in’wà mɛ paa, akà baar bàkyer man’be kusà anà akà bumwɛy: isàkal naa mɛ an’fàyà, mɛ akà mbuur mwɛy in’sàyee anki, 3 ntɔn bɛ làleŋà isii naa Klistɔ afàyäm amu mɛ. Nde kà wàgyɔ̈ɔ̈là anki kusà a bɛ, wɛɛ nde afàswaŋ ngwal amu bɛ. 4 Ndandaa, nde bun’bɛɛrà u kulunsi unsà gyɔ̈ɔ̈là ande, wɛɛ nde we anà mɔ̈ɔ̈ u ngwal a Nzam. Bi sye ibà bàgyɔ̈ɔ̈là amu nde, wɛɛ bi isàkal anà mɔ̈ɔ̈ anà nde u ngwal a Nzam ntɔn bɛ.

5 Làpɛl bɛ ŋakwo, làler naa nkye bɛ làbà uboo a làkwikilà, làler bɛ ŋakwo ubwaŋàbwaŋ. Nkye bɛ làfàkayöbà anki naa Yɛsu Klistɔ wà amu bɛ? Nà isàkal naa bɛ làkɔ̈ɔ̈n awal iböŋ unsà ndeer ayi. 6 Apan, mɛ an’sà làkyän naa bɛ làkyer asàyöb naa bi, bi kàbü anki kusà a ndeer ayi. 7 Bi ifàyamà Nzam naa bɛ làkɔ̈ɔ̈n akyer akà ube mwɛy. Bi ikwen anki mumɛɛy iböŋ abi, wɛɛ muman naa bɛ lan’kyer ubwaŋ, itàkal naa bi ikamɛnà bàŋàkwàndwà. 8 Ntɔn bi ikɔ̈b mumbäär ndandaa kyatɛy, wɛɛ bi iwe anà ikɔ̈b mukölà kya mpɛl. 9 Wɛɛ bi ibà unsà un’sak, taaŋ lanswà ibà bi bàgyɔ̈ɔ̈là anà làbà bɛ aŋangwal. Waa bi ikalɔɔmà u ngyamàkà abi naa bɛ làbulà bàŋàkwo. 10 Kyakin, amàlasöön mɛ ndaa ayi yanswà umpal in’wà mɛ ukwel, ntɔn umpal in’sàyà mɛ, ya ikɔ̈ɔ̈n amɛnà naa ndaa amɛ yà bwoor musyääl ikɔ̈b kan’pɛ Mwol ntɔn mutɔŋ, kà ntɔn mudwa anki.

11 Atɔŋ, làkäl unsà un’sak, làsäl ntɔn mukwo, làpɛɛl ngwal bɛ a bɛ, làkäl an’kyän an’mwɛy, làkäl unsà duu, waa Nzam a ukwen anà duu uyàkal anà bɛ.

12 Làpɛɛl mbɔr u mbwo a ndüür in’kyɛɛl.

Aŋin’kyɛɛl banswà bàmàlapà mbɔr.

13 Wɛy kab a ngway a Mwol Yɛsu Klistɔ, ukwen a Nzam, anà un’tüüb a Dweelà In’kyɛɛl byàkäl anà bɛ banswà.