2 Coríntios 7:10 | Versão YNS

1 Nkween amɛ, ntɔn bi kan’kaar ilää a tub abi, bi ipɔŋà bi ŋakwo u ŋingyäy yanswà yà ndür anà yà dweelà. Wɛy bi imay mubulà aŋin’kyɛɛl unsà bɔɔmà a Nzam.

Un’sak a Pɔl

2 Lipɛ ikal u mpem abɛ! Bi mbuur ube kàkyer anki, bi mbuur kàtay anki, bi undiir a mbuur kàduum anki. 3 Kà ntɔn mukàlapɛl anki waa mɛ in’tɛɛnà abwɛy, ntɔn mɛ ya kàkyàtàtɛn: bɛ làbà u mpem abi unsà ukwà anà u mɔ̈ɔ̈. 4 Làkyän amɛ là mbɔɔn amu bɛ, mɛ in’we anà uyɔl mbɔɔn ntɔn bɛ, mɛ in’wà aŋàyɔl a ndɛɛl, mɛ in’wà unsà un’sak mbɔɔn uboo a mpay abi yanswà.

5 Kyakin, utaaŋ ban’kɔlà bi u Masɛdwan, bi kànyäm anki, bi kàbwey a mpay yifà ifà: ngwiy u nsà, bɔɔmà uboo abi. 6 Wɛɛ Nzam, mbuur afàlɛɛl bàŋàlàbɔ̈ɔ̈n, nde kàlɛɛl bi u mbwo a ngyeel a Titɔ, 7 kà nà u mbwo a ngyeel ande mpɛl anki, wɛɛ u mbwo a ngwal kàwɛl nde akà bɛ, nde kàkyer isaam ntɔn ukwen abɛ bà ngwal. Nde kiyäm ngyal abɛ yà ngwal, yà nsaaŋ abɛ, yun’kanà abɛ ntɔn mɛ. Ya yanswà yàfan’pà un’sak aŋàsöönà. 8 Inye, isàkal naa un’kaan amɛ kàlapɛ ngyɛb, mɛ in’kyɛɛrà anki. Yàlàtàkal naa mɛ in’kyɛɛr, ntɔn mɛ imanà naa un’kaan awà kàlapɛ ngyɛb u taaŋ làmwɛy, 9 apanà mɛ an’man un’sak, kà ntɔn ngyɛb abɛ anki, wɛɛ ntɔn nsɔɔmà kan’bɔr wa. Ntɔn ngyɛb abɛ yàkäl unsà ukwen a Nzam. Kyakin, akà bi, bɛ làsàman anki akà ube mwɛy. 10 Ntɔn, ngyɛb unsà ukwen a Nzam ifàbɔr nsɔɔmà ayà ifàsyen u ngweel a mɔ̈ɔ̈ anà ifàwɛy anki ipöl akà nkyɛɛr. Wɛɛ ngyɛb ntɔn mbääb a mɛɛn mà, ifàbɔr ukwà. 11 Làler apà undiir kàbör ngyɛb akà bɛ unsà ukwen a Nzam:

muküünà nà!

ndwääl a ube nà!

ntöön a ube nà!

bɔɔmà nà!

ilään nà!

un’kanà nà!

ntaaŋàmbar nà! Unsà ndaa ya yanswà bɛ ŋakwo làkyàmɛɛy naa bɛ làbà akuun amu ya. 12 Abun, isàkal naa mɛ kàkyer alasöön, kà ntɔn mbɛɛy anki, itàkal kà ntɔn mbuur kàkyer ube anki, itàkal kà ntɔn mbuur bàmukyer ube anki, wɛɛ ntɔn muswaŋ kusà a bɛ, u mii a Nzam, un’kanà abɛ ntɔn bi. 13 Awà undiir kilɛɛl.

Bi kà nà ndɛɛl aŋàyen mpɛl kàwɛl anki, bi kàsäŋ aŋàsöönà muman un’sak anà Titɔ ntɔn lun’tɔɔl bɛ mpem. 14 Ntɔn, isàkal naa kusà a nde, mɛ kàswɛŋ ngaal ntɔn bɛ, bɛ mɛ nswɛn lan’mɛɛy anki! Wɛɛ, asànaa ifàkyään bi bɛ ndandaa taaŋ lanswà, lalan ngaal kàswɛŋ bi ntɔn bɛ kusà a Titɔ yàmɛnà naa yà ndandaa, 15 ukwen ande akà bɛ bàŋàsöön mbɔɔn, sin sin nde usàyɔbà unkyeey abɛ banswà, ntɔn bɛ lun’wɛl unsà bɔɔmà anà matɛɛr. 16 Mɛ in’wà unsà un’sak musà làkyän amɛ amu bɛ.

Bíblia Online

2 Coríntios 7

Veja também

Oração para pedir a Deus que aumente a fé quando o coração está cheio de dúvida

O que é o Espírito Santo e qual é o seu papel na vida cristã?