1 Mɛ Pɔl, ntööm a Klistɔ Yɛsu unsà ukwen a Nzam, asànaa ilää a mɔ̈ö akyà amu Klistɔ Yɛsu.

2 Akà Tumàtɛ, mwan amɛ wànkween: wɛy Taa Nzam anà Mwol abi Klistɔ Yɛsu bapɛ kab a ngway, mpem a ngyɛb anà duu.

3 Mɛ an’fuur an’tɔɔn mbɔɔn akà Nzam, awà in’fàsyääl mɛ unsà an’kyän anàbwaŋ, asànaa bàfun’syäälà ankaa amɛ. Taaŋ lanswà, mpib anà mwäänà, mɛ in’fatà din u ngyamàkà amɛ. 4 Mɛ insàyɔbà nsaaŋ angye, mɛ in’fàkal anà ngyal akaman mbɔɔn, ntɔn mɛ in’käl aŋàyɔl a un’sak. 5 Mɛ in’fàyɔbà sye làkwikilà a ndandaa awà ngye alà, làkwikilà làtwab atàkal a nkaaŋà wun’kaar Lɔwis anà ngwa Önis. Mɛ an’sà kam naa la là amu ngye sye. 6 Lalan mɛ amàfayɔɔb naa: fɛl mbaa a kab a Nzam awà ngye alà sɛmà mpal kasi mɛ an’kɔɔ. 7 Ntɔn Dweelà kan’pɛ Nzam kà là làbɔɔmà anki, wɛɛ Dweelà a ngwal, là ukwen anà là nkääŋ a mpem.

8 Twon an’man nswɛn mutà imbäl a Mwol abi, twon an’man sye nswɛn ntɔn mɛ, mbuur a bɔlokà ntɔn nde. Wɛɛ ngye, man mpay mbwo mwɛy anà mɛ ntɔn Làsaŋ Aŋàbwaŋ, unsà ngwal a Nzam, 9 awà kitsü mɔ̈ɔ̈ anà kibel mukal un’sɛŋ ande, kà ntɔn isal abi anki, wɛɛ ntɔn mböön ande ŋàkwo anà kab a ngway ande, kab a ngway bipɛ amu Klistɔ Yɛsu kusà a an’taaŋ a mbul a in’tye. 10 Kab a ngway alà lan’yàmɛnà apanà u mbwo a ngyeel a Un’tswää a mɔ̈ɔ̈ abi Klistɔ, awà kàdwä ikɔ̈b a ukwà anà kàmɛɛy mɔ̈ɔ̈ a mbul a in’tye u mbwo a Làsaŋ Aŋàbwaŋ.

11 Ntɔn Làsaŋ Aŋàbwaŋ alà ban’si ba un’kyeey, ntööm anà un’lɔɔŋ. 12 Lalan an’fuur mɛ a mpay ayi. Wɛɛ mɛ nswɛn a ya yatɛy, ntɔn mɛ in’kyàyöb naa làkwikilà amɛ là amu nà, làkyän amɛ là naa nde we anà ikɔ̈b mukaar indiir kan’pɛ nde tii Ilä kya.

13 Lab mbaan a ndaa in’kyɛɛl ayi kàwem ngye akà mɛ unsà làkwikilà anà ukwen abà unsà Klistɔ Yɛsu. 14 Kaar an’lɔɔŋ manswà amà bapɛ, u mbwo a Dweelà In’kyɛɛl awà amu bi.

15 Ngye akyàyɔ̈b naa baar a Azi banswà bàkyan’tiin, asànaa Fizyɛl anà Ɛrmɔzyɛl. 16 Wɛy Mwol utɔ̈l ngyɛb ande mbɔɔn udu a ndwà a Ɔnɛsifɔr, ntɔn nde kan’lɛɛl mbalà mbɔɔn, kàsàman anki nswɛn a in’siŋ amɛ. 17 Wɛɛ, pa kàtöl nde Lɔmà, nde kan’leŋ làgyägyä, waa kan’mɛn. 18 Wɛy Mwol kun’pɛ mbwo muman ubwaŋ apà Mwol kà ilä kya. Mbuur asin watɛy ayöb ubwaŋàbwaŋ asànaa ngye ŋakwo indiir kan’kyeer nde u Ԑfɛsɔ.