1 Abun, mɛ in’kwen bɛ làyöb naa bwoor a ità nà mɛ in’fànwaan ntɔn bɛ, ntɔn baar a Lawɔdisɛ, anà ntɔn baar banswà mpa abàŋàtaman akà ikikye, 2 abà, mɛ in’kwen naa mpem aba ikäl yà un’kanà, anà ba bàkäl bàŋàtüüb unsà ukwen, bàbilà uboo a un’naaŋ ande wanswà, bàyöl a un’yɛnà ntɔn bàyöb ngyee a Nzam, ikaswaŋà naa Klistɔ. 3 Un’naaŋ a an’yeerà anà ngyööb byàŋàyee amu nde. 4 An’tɛn mɛ abà ntɔn mbuur ukɔ̈ɔ̈n akàlakur a ntweey a ntsà yà loor. 5 Ntɔn itàkal naa unsà imbuur mɛ tsütsü watɛy anà bɛ, wɛɛ unsà dweelà, mɛ in’wà anà bɛ, mɛ in’wà unsà un’sak muman naa bɛ làbàŋàtsim unsà làkwikilà amu Klistɔ.

6 Abun, asànaa làkyey bɛ Klistɔ Yɛsu asànaa Mwol, làkäl un’tüüb anà nde. 7 Abà, làkäl aŋàsà in’swɛy anà aŋàtɔŋ amu nde, làkäl aŋàtsim unsà làkwikilà asànaa bàlalɔŋ la, anà làkäl bàŋàsöön unsà ngyamàkà a an’tɔɔn.

8 Làkäl kà igyɛɛŋ, ntɔn mbuur ukɔ̈ɔ̈n akàlalɛɛ mbwaar a ntweey a ntsà, wɛɛ ya kàyà ndandaa anki, anà an’yeerà a loor màfàfà unsà imbuur, anà unsà ngwal ifàyaal mɛɛn, wɛɛ kà akà Klistɔ anki. 9 Ntɔn ngyööl a Nzam yanswà yà u ndür ande, 10 anà bɛ, bɛ làbà aŋàyɔl amu mbuur awà un’tswe a Imfum kyanswà anà Ikɔ̈b kyanswà.

11 Amu nde sye waa bàlakyɛy, kà nkyɛɛy ayà ufàkyer kɔɔ a mbuur anki, wɛɛ nkyɛɛy a Klistɔ ayà ifàtsuuŋ imbuur abi kyà man’be. 12 Bɛ bàladye anà nde u ndüümà, bàlawiiy sye anà nde, u mbwo a làkwikilà amu unkaak a ngwal a Nzam awà kun’wiiy uboo a akü. 13 Bɛ, bɛ baar abà làkäl aŋàkwà ntɔn mbii abɛ anà ukɔɔn nkyɛɛy a ndür abɛ, Nzam kàlapɛ mɔ̈ɔ̈ anà nde. Nde kidwääl nkul a mbii abi yanswà. 14 Nde kàdwä un’kɔɔn a ikwàndwà abi anà nswɛɛŋ awa, nde kàpiy wa, waa kàbɛɛrà wa u kulunsi. 15 Abun, Amfum anà Aŋikɔ̈b, nde kasi ipɔl ipɔl, kamɛɛy ibaŋ u mii a baar banswà, kasi unsà un’lwaaŋ a iböŋ a kulunsi.

16 Abun, wɛy naa akà mbuur mwɛy ukɔ̈ɔ̈n akàlatsüül mbar ntɔn isaa anà man, itàkal ntɔn un’kyɔm, ntɔn mukyɛɛl nsöŋ akün, itàkal saba: 17 Abin byanswà byà munii a indiir byàlàyà, wɛɛ ndandaa abya yà amu Klistɔ. 18 Twon lan’pà mbwo naa bàlatsüül mbar akà baar bàfàmɛnà naa ba bà baar a làbɔ̈ɔ̈n anà bàfàsà ngyamàkà akà akyeey. Ba bàŋàbilà afwee unsà imɛɛy aba ŋakwo. Ntɔn an’kyän a imbuur aba, ba bàŋàyam a uyɔl bàkɔ̈ɔ̈n ndöŋ. 19 Ba kà bàŋàbääb anki akà Klistɔ awà un’tswe. Kyeka, u mbwo a un’tswe waa ndür yanswà ifàwal isaa anà yàŋàtüüb a deŋ deŋ a an’kör anà nkɔn, anà in’tay unsà ngyɛɛl aya ufun’pà Nzam.

20 Kya isàkal naa bɛ làkü anà Klistɔ, anà làkyàtsuŋà unsà indiir byàfàyaal mɛɛn mà, ntɔn nkye lan’fàkyey bɛ nswɛɛŋ asànaa bɛ làfàkal kà an’kɔɔ a mɛɛn: 21 « Twon an’dyà undiir wà », « Twon an’kyee undiir wunà », « Twon an’ba wa ». 22 Nswɛɛŋ ayi yà ntɔn indiir abyà ifàtay ungö musyääl bya. Ya yà nswɛɛŋ anà an’lɔɔŋ a imbuur. 23 Inye, nswɛɛŋ ayi ifàmɛnà asànaa ya ye anà an’yeerà, ntɔn ya ifàlɔm naa mbuur mbuur usi ngyamàkà asànaa ukwen mpem ande, anà làbɔ̈ɔ̈n a loor, anà upɛ ndür ande ŋakwo mpay. Wɛɛ ya ndöŋ yatɛy, ntɔn ya ifàpà ilään a ndür mpɛl.