1 Baan, lapɛ aböör abɛ làzir, unsà Mwol, ntɔn ya ndaa a balàbal. 2 « Sà làkoo akà taaràŋà anà akà ngwa », yà nswɛɛŋ atàtwɛb aye anà ilää: 3 « ntɔn ngye akäl unsà un’sak anà u mɔ̈ɔ̈ a bwɛlàbwɛl u mɛɛn. »

4 Bɛ, aböör, twon lan’pà mpem a nkyɛl akà baan abɛ, wɛɛ labɔŋ mukapà an’lɔɔŋ aŋàbwaŋ anà an’lwɛŋ man’fà akà Mwol.

5 Asɔ, lapɛ ankum abɛ u mɛɛn mà làzir unsà bɔɔmà anà matɛɛr, u mpem a làbɔ̈ɔ̈n, asànaa bɛ làbàmuweemà Klistɔ, 6 kà nà u mii aba mpɛl anki, asànaa bɛ làkwen mumɛnà bàŋàbwaŋ u mii a baar, wɛɛ asànaa asɔ a Klistɔ mukyer ukwen a Nzam, fà mpem aba. 7 Lasyääl unsà mpem aŋàbwaŋ, asànaa bɛ làbàmusyääl Mwol, wɛɛ kà baar anki. 8 Làyöb naa mbuur mbuur asàwal kà an’kɔɔ a Mwol bweel a ubwaŋ abà kàkyer nde, itàkal un’sɔ, itàkal mbuur a nsaay.

9 Wɛ bɛ, ankum, làkyer sye ifà imwɛy akà ba. Twon làmapà unkiiŋ, ntɔn bɛ làkyàyöb naa bɛ anà ba, làwe Mwol nsil wa u du anà nde ufàsà anki nsɔ̈ɔ̈l uboo a baar.

10 Mumay, làwɛl ngwal abɛ unsà Mwol anà unsà ikɔ̈b a ngwal ande. 11 Làbwäär an’tà a Nzam, ntɔn bɛ làkäl aŋàkwo munwaan anà ikikyer a ileŋ. 12 Bi inwaan anki ngwiy a an’kil anà in’twaŋ, wɛɛ anà Amfum, Aŋikɔ̈b, Aŋàlàyaal u mɛɛn a mpib, anà an’dweelà an’be amà u du. 13 Kyakin, làbwäär an’tà a Nzam manswà, ntɔn bɛ làwɛl iböŋ kà ilä ibe anà làkäl aŋàtsim ungö mukyer indiir byanswà.

14 Làtsim, làbwäär ndandaa asànaa un’di a lɔŋ, balàbal asànaa undiir afàtii itɔl, 15 anà un’kanà akyään Làsaŋ Aŋàbwaŋ là duu asànaa idyäär kà in’kɔl. 16 Udu a indiir byanswà, làkwɛy làkwikilà asànaa làbää làfàdim mbaa a mba yanswà ufàlom Mbuur un’be. 17 Mumay, làwɛl mpà a ngweel a mɔ̈ɔ̈ anà kɔm a Dweelà, ikaswaŋà naa ndaa a Nzam. 18 U mbwo a ngyamàkà yanswà anà ndɔ̈ɔ̈m, làyamà taaŋ lanswà unsà Dweelà. Làtyeel an’taaŋ unsà muküünà u ngyamàkà ntɔn aŋin’kyɛɛl banswà, 19 anà ntɔn mɛ sye, ntɔn Nzam usi u mun amɛ ndaa an’kwo mɛ musyäl ntɔn mukyään a ngwal ngyee a Làsaŋ Aŋàbwaŋ. 20 Itàkal naa apanà mɛ in’wà u bɔlokà, mɛ in’wà un’kyeey a Làsaŋ Aŋàbwaŋ alà. Làyamà ntɔn mɛ in’kyään la anà un’kanà wanswà, ukɔɔn bɔɔmà.

21 Mɛ in’kwen bɛ sye làyöb naa mɔ̈ɔ̈ amɛ wà aben, anà ayà in’fàkyer mɛ. Tishik, un’tɔŋ awà in’fàkwen mɛ, un’syääl a lää unsà Mwol, ayàlakyään Làsaŋ lanswà. 22 Undiiràwun wa mɛ amàlatööm awà, ntɔn nde kàlasam naa bi kà ibà aben anà kàlapɛ un’kanà.

23 Wɛy Taa Nzam anà Mwol Yɛsu Klistɔ bàpɛ duu, ukwen anà làkwikilà akà atɔŋ banswà. 24 Wɛy kab a ngway a Nzam làkäl akà baar banswà bàfàkwen Mwol abi Yɛsu Klistɔ unsà ukwen mpa bàfàbi.