1 Pɔl anà Tumàtɛ, asyääl a Klistɔ Yɛsu.

Anà aŋin’kyɛɛl banswà abà amu Klistɔ Yɛsu u Filipe anà aseey anà asadidi: 2 Wɛy Taaràbi Nzam anà Mwol Yɛsu Klistɔ bàlapɛ kab a ngway anà duu.

3 Mɛ in’fàfuur an’tɔɔn akà Nzam amɛ u mbalà yanswà in’fàyɔbà mɛ bɛ, 4 taaŋ lanswà uboo a ngyamàkà amɛ ntɔn bɛ banswà, mɛ in’fàyɔn anki muyamà unsà un’sak, 5 ntɔn kab làfàwal bɛ unsà Làsaŋ Aŋàbwaŋ, sɛmà ilä atàtwɛb tii ŋàbà. 6 Wɛɛ mɛ an’sà làkyän naa mbuur kàsɛmà amu bɛ isal aŋàbwaŋ aki akyer asàlab ntsüü a kya tii ilä usàyà Klistɔ Yɛsu. 7 Ya yà balàbal naa mɛ in’käl anà an’kyän a tub amà akà bɛ banswà, ntɔn bɛ làbà u mpem amɛ, bɛ baar làfàwal kab uboo a kab a ngway alà ban’pɛ, itàkal apanà in’wà mɛ u bɔlokà itàkal mpal in’fànwään mɛ Làsaŋ Aŋàbwaŋ anà in’fàtɛɛl mɛ la imbäl. 8 Inye, Nzam wà mbäl amɛ naa mɛ in’fàkwen bɛ banswà mbɔɔn unsà ukwen a Klistɔ Yɛsu.

9 Waa mɛ in’fàyamà abà: wɛy ukwen abɛ bàlalà muyɛl mbɔɔn unsà ngyööb anà nsɔ̈ɔ̈l yanswà, 10 ntɔn bɛ làyöb musɔɔl indiir a ndöŋ. Abun, bɛ làsàkal bàŋàpɔŋà anà ukɔɔn an’pɛl kà ilä a Klistɔ. 11 Bɛ làsàkal bàŋàyɔl a imbɛŋ a balàbal kyan’fà akà Klistɔ Yɛsu ntɔn bi, unsà làkoo anà nsyäŋà a Nzam.

12 Atɔŋ, mɛ in’kwen naa bɛ làyɔb: indiir byan’yeel, byàpɛ mbwo akà Làsaŋ Aŋàbwaŋ mukyà usà. 13 Kyakin, u làpaŋ a kuvernɔ̈ɔ̈r, itàkal u mper yanswà, bàkyàyöb naa mɛ in’wà u bɔlokà ntɔn Klistɔ, 14 anà atɔŋ mbɔɔn bàkyàwal ngwal unsà Mwol u mbwo a bɔlokà amɛ, ba bàfàkwɛy kyääl mulɔŋ Ndaa a Nzam ukɔɔn bɔɔmà.

15 Yà ndandaa, baar amwɛy bàfàkyer unsà un’köl anà isür, wɛɛ bumwɛy bàfàlɔŋ Klistɔ unsà an’kyän aŋàbwaŋ. 16 Baar abà bàkyer unsà ukwen, ntɔn ba bàkyàyöb naa isal amɛ apà kyàmunwään Làsaŋ Aŋàbwaŋ. 17 Wɛɛ baar bàfàkyään Klistɔ unsà isür, an’kyän aba man’be, ba bàkwen mukwɛy mpay aŋàsöönà u bɔlokà amɛ.

18 Wɛɛ, undiir watɛy! Undiir awà ndöŋ wà naa u mbwo yanswà, itàkal unsà an’kyän an’be itàkal unsà ndandaa, bàmukyäänà Klistɔ. Waa mɛ an’man un’sak ntɔn ya. Inye, mɛ in’yàlalà muman un’sak ntɔn ya. 19 Ntɔn mɛ in’kyàyöb naa yayin yanswà isàkal ntɔn ngweel a mɔ̈ɔ̈ amɛ, u mbwo a ngyamàkà abɛ anà mbaay a Dweelà a Klistɔ Yɛsu. 20 Undiir indilà mɛ anà in’saa mɛ làkyän u mpem amɛ wanswà, wà naa akà undiir mwɛy ukɔ̈ɔ̈n an’mɛɛy nswɛn, wɛɛ Klistɔ uwɛl làkoo u ndür amɛ, apanà anà utaaŋ lanswà, unsà kam lanswà, itàkal u mbwo a mɔ̈ɔ̈ amɛ, itàkal u mbwo a ukwà amɛ. 21 Ntɔn mɛ, mɔ̈ɔ̈ wà Klistɔ, ukwà bà bweel. 22 Wɛɛ isàkal naa ukal anà mɔ̈ɔ̈ u mɛɛn mà, yan’pà mbwo mutwey mbɛŋ unsà isal amɛ, mɛ in’yöb anki naa mɛ ininà in’sɔɔl. 23 Ndaa yweel yan’naanà mper anà mper: mɛ in’we anà ngyal mukyà anà mukal anà Klistɔ, ntɔn ya yan’söön ubwaŋ, 24 wɛɛ yan’söön ndöŋ mbɔɔn mukal u mɛɛn pà ntɔn bɛ. 25 Apan sye, mɛ an’sà kam, mɛ in’kyàyöb naa mɛ in’kyer ayàlam anà in’yàlalà mukal tsütsü apà bɛ banswà ntɔn mukàlabay mukyà usà anà muman un’sak a làkwikilà abɛ. 26 Abun, umpal in’yàfurà mɛ apà bɛ, ngaal abɛ amu Klistɔ Yɛsu ifàsöönà.

27 Wɛɛ itàkal kà aben, làsyen mɔ̈ɔ̈ abɛ asànaa làkwen Làsaŋ Aŋàbwaŋ a Klistɔ, ntɔn, isàkal naa mɛ amàyàlaler, itàkal naa mɛ in’yi anki, mɛ in’wem làsaŋ naa bɛ lan’tsim unsà dweelà làmwɛy la, làbàmunwaan mbwo mwɛy unsà mpem mwɛy ntɔn làkwikilà amu Làsaŋ Aŋàbwaŋ. 28 Twon lan’man ayiiŋ abɛ bɔɔmà: kya isakal idiim ntɔn mbweel aba anà ngweel a mɔ̈ɔ̈ abɛ. Ya yanswà yan’fà akà Nzam. 29 Ntɔn Klistɔ, nde kàlapɛ kab a ngway kà nà mukun’sà làkwikilà mpɛl anki, wɛɛ muman an’kaal sye ntɔn nde. 30 Apanà, bɛ làbàmunwaan ngwiy nsil ya lan’mɛn bɛ munwaan anà ifàkamwanà mɛ asànaa làyöb bɛ.