1 Mɛ in’tɛn abà: isàkal naa un’kyee a kwal wà mwan umbɛy, nde nsöön watɛy anà un’tsüüŋ, itàkal naa nde wà nkum a indiir byanswà, 2 wɛɛ nde wà ungyɛl a baar bàfàkaar indiir ande anà baar abye anà buur a bya, tii mpal isàkwo ilä kàsi taarànde. 3 Bi sye, mpal kàkäl bi ambɛy, bi kàkäl atsüüŋ. 4 Wɛɛ umpal làkwe taaŋ, Nzam kàtöm Mwan ande: bun’bör akà un’kaar mwɛy, bun’bör ungyɛl a un’kɔɔn, 5 ntɔn mutsuuŋ baar bàkäl ungyɛl a un’kɔɔn, ntɔn bi ibulà baan aŋàywaaŋ nkà.

6 Ntɔn làbà bɛ baan, Nzam waa kàtöm Dweelà a Mwan ande uboo a mpem abi, Dweelà afàsà un’kwɛŋ naa: « Aba » iswaŋà naa Taa! 7 Kyakin, ngye afàkal un’tsüüŋ anki, wɛɛ mwan. Ngye sye awà ikyee asànaa amà an’yilà a Nzam.

8 Itaan, umpal mpa layöbà bɛ Nzam, bɛ làkälà atsüüŋ a itɛk, kutɛn aŋàbwaŋ bya kà bànzam anki. 9 Wɛɛ mpalàbà lan’yöb bɛ Nzam, anà nde sye kàmàlayöb, aben lan’fàfurà bɛ akà indiir ikɔ̈ɔ̈n ngwal anà byànswɛn abyà ifàyaal mɛɛn? Nkye bɛ làkwen mufàbulà atsüüŋ a bya? 10 Bɛ, bɛ làfàkyɛɛl ubwaŋàbwaŋ ilä, nsöŋ, an’paŋà anà mbul! 11 Bɛ, bɛ làman’pà bɔɔmà: nkye isal kàkyer mɛ amu bɛ ikyà bwà?

12 Atɔŋ, mɛ amàlabɔɔn, làbulà asànaa mɛ, ntɔn mɛ kàkyàbulà asànaa bɛ. Akà ube mwɛy lan’kyer bɛ batɛy. 13 Bɛ làkyàyöb ubwaŋàbwaŋ naa u mbalà atàtwɛb kàlakyään mɛ Làsaŋ Aŋàbwaŋ, mɛ kàkäl anà ukyal. 14 Ukyal abà bàkäl nsii ntɔn bɛ. Wɛɛ bɛ lan’saal anki, lan’piy anki. Kyekà, bɛ lan’wɛl asànaa un’kyeey a Nzam, asànaa Klistɔ Yɛsu. 15 Abun, wàken un’sak kàkäl anà bɛ? Ntɔn mɛ amàlatɛɛl imbäl ki: kya bɛ làlàkwo, bɛ làlàswaam mii abɛ ntɔn mukan’pà! 16 Ŋàbawà, nkye mɛ an’bulà ŋankir abɛ ntɔn amàlakyään mɛ ndandaa?

17 Ukwen aŋàsöön abà akà bɛ kà bà mpɛlàmpɛl anki, wɛɛ ba bàkwen mpɛl mukàlakaab anà mɛ, ntɔn bɛ làbääb anà ba. 18 Yubwaŋ muswaŋ ukwen abye anà imbäl aŋàbwaŋ taaŋ lanswà, wɛɛ kà nà utaaŋ kàkäl mɛ apà bɛ mpɛl anki, 19 baan amɛ, abà in’fàkamanà mɛ un’swaŋ abɔr tii umpal usàmɛnà Klistɔ amu bɛ. 20 Apanà, mɛ in’kwen mukal apà bɛ, ntɔn mulɔ̈ɔ̈n ntɛɛn amɛ akà bɛ, ntɔn mɛ in’yöb anki naa mɛ ininà in’kyer ntɔn bɛ!

21 Lan’kyään, bɛ baar làkwen mukal u ngyɛl a un’kɔɔn: nkye bɛ làfàwem anki ndaa ufàtɛn un’kɔɔn awà? 22 Ntɔn bàsön naa Abàlam kàbör baan abaal bɔ̈ɔ̈l: mwɛy a un’syääl un’kaar, mwɛy a un’kaar a nsaay, 23 mwan baal a un’syääl un’kaar bun’bör unsà imbuur. Wɛɛ mwan baal a un’kaar a nsaay bun’bör u mbwo a ilää. 24 Apà kye anà ikɔk a ndaa: abun, akaar abà bà nkwà yweel. Mwɛy, Agar, kàfü mɔŋ a Sinayi, kan’bɔr un’tsüüŋ: 25 ntɔn mɔŋ a Sinayi wà kà Arabi. Agar awà afwään Yɛlusàlɛm a ŋàbà ntɔn la là un’tsüüŋ anà baan ande. 26 Wɛɛ Yɛlusàlɛm a du là nsaay, la là maa abi, 27 ntɔn bàsön naa:

« Man un’sak, un’kaar ikɔb, ngye mbuur mpa kàbörà!

Sà in’kwɛŋ a un’sak, ngye mbuur mpa kàyöb usaay a in’swaŋ!

Ntɔn baan a un’kaar awà bàwɔm bà mbɔɔn,

akwànaa baan a un’kaar awe anà un’dim. »

28 Wɛɛ bɛ, atɔŋ, asànaa Isak bɛ làbà baan a ilää. 29 Wɛɛ, asànaa mwan bàbör unsà imbuur kàmɛɛy mwan bàbör unsà Dweelà nkwaaŋ, ya sye yà balàbal ŋàbawà. 30 Wɛɛ Ndaa Aŋàsɔn itɛɛnà aben? Abà: « Böŋ un’syääl un’kaar anà mwan ande, ntɔn ikwe anki naa mwan a un’syääl un’kaar uwɛl kwal mbwo mwɛy anà mwan a un’kaar a nsaay. » 31 Kyakin, atɔŋ, bi kà ibà baan a un’syääl un’kaar anki, wɛɛ bi ibà baan a un’kaar a nsaay.