1 Mpal kàyöb Yɛsu naa Amfarisi bàwem naa nde kàfakyerà anà kàfadümà alɔŋki aŋàsöön Ywan, 2 - Kutɛn aŋàbwaŋ, Yɛsu kàfadümà anki nde ŋakwo, wɛɛ alɔŋki ande. - Mpal kàwem Yɛsu indiir bàtɛɛnà baar, 3 nde kàlwomà u Yuday, waa kàfurà Ngalilɛ. 4 Mukyà kwo, yàlɔ̈m naa nde atsul uboo a Samalya. 5 Apan, nde kàtöl bul a Samalya mwɛy ikɔb a la Sikar, tsütsü a ywaŋ kàpɛ Yakɔb mwan ande Yɔsɛfi 6 ntsü làkäl fu a an’dà a Yakɔb. Ntɔn yɔ̈ɔ̈n a mbwo, Yɛsu kàkäl wàŋàbwaay kà un’beel a fu. La làkäl isii a taaŋ a midi.

7 Un’kaar un’nsi Samalya mwɛy kàyi mutɛɛ an’dà. Yɛsu kàtɛn a nde naa: « Mpɛ an’dà anwà. » 8 Ntɔn alɔŋki ande bàkäl aŋàkyà bul mukàsom isaa adyà. 9 Wɛɛ un’kaar awà, un’nsi Samalya awà, kàtɛn a nde naa: « Aben? Ngye Un’yudà, ngye awe anà yɔr mulɔm an’dà anwà, akà mɛ, un’kaar mwɛy, un’nsi Samalya mwɛy? » - Kutɛn aŋàbwaŋ, Ayudà un’tüüb watɛy anà Asamalya. - 10 Yɛsu kun’fuur naa: « Ilàkal naa ngye ayöb kab a Nzam anà mbuur wa kan’tɛn wà a ngye naa: "Mpɛ an’dà", ngye mbuur alun’lɔ̈ɔ̈m an’dà, waa nde ulapà an’dà a mɔ̈ɔ̈. » 11 Un’kaar waa kàtɛn a nde naa: « Mwol, ngye akà kantin latɛy, fu a an’dà la sye làŋàtyà mbɔɔn. Ngye an’dà a mɔ̈ɔ̈ ma màfàken? 12 Nkye ngye an’söön taaràbi Yakɔb, mbuur kà ipɛ fu alà anà kànü an’dà mwo nde ŋakwo, anà baan ande anà itɔŋà ande? » 13 Yɛsu kun’fuur naa: « Mbuur wanswà anwà an’dà mà, afàsàwem mfwää a an’dà, 14 wɛɛ mbuur asànwà an’dà insun’pà mɛ, nde ufàsàwem anki mfwää a an’dà akà ikikye, wɛɛ an’dà insun’pà mɛ isàbulà amu nde ntwà isàfuunà ntɔn mɔ̈ɔ̈ a mbul a in’tye. » 15 Apan, un’kaar kàtɛn a nde naa: « Mwol, mpɛ an’dà ma, ntɔn mɛ in’kɔ̈ɔ̈n afàsàwem mfwää a an’dà, waa mɛ mpa in’fàsàyà mutɛɛ an’dà apà. »

16 Yɛsu kàtɛn a nde naa: « Kyen, un’bel un’dim angye, waa ayàfurà pà. » 17 Un’kaar kun’fuur naa: « Mɛ un’dim watɛy. » Yɛsu naa: « Ngye awe anà iböŋ mutɛn naa: "Mɛ un’dim watɛy." 18 Ngye kàkäl abà adim atyeen, baal awà ngye awà apanà, kà wà un’dim angye anki. Abun, ngye an’tɛn ndandaa. » 19 Apan, un’kaar kàtɛn a nde naa: « Mwol, mɛ in’manà naa ngye awà ŋangɔɔm. 20 Bàtaaràbi, bàfakömà udu a mɔŋ wà, wɛɛ bɛ, bɛ làtɛn naa ikal kyan’kwo mukömà kyà u Yɛlusàlɛm. » 21 Yɛsu waa kàtɛn a nde naa: « Un’kaar, nkyey, taaŋ làmuyà alà mpa làsàkömà bɛ Taa itàkal udu a mɔŋ awà, itàkal u Yɛlusàlɛm. 22 Bɛ, Asamàlya, bɛ làfàkömà Nzam mpa làyöb bɛ. Bi, Ayudà, bi ifàkömà Nzam iyöb bi, ntɔn mɔ̈ɔ̈ afàyà u mbwo a Ayudà. 23 Wɛɛ taaŋ làmuyà, la sye lan’yà, mpal aŋankömà a ndandaa bàsakömà ba Taa u Dweelà anà u ndandaa, ba bà aŋankömà ufàleŋ Taa. 24 Nzam wà Dweelà, kyakin baar bàfun’kömà bun’kömà unsà dweelà anà unsà ndandaa. » 25 Un’kaar waa kàtɛn a nde naa: « Mɛ, mɛ in’kyàyöb naa Mɛsya, iswaŋà naa Klistɔ, asàkyer ayà. Mpal usàyà nde, nde asikyään indiir byanswà. » 26 Yɛsu kun’fuur naa: « Mɛ, mɛ in’wà nde, mɛ mbuur in’yäämà wà anà ngye. »

27 Umpal bàyàfurà alɔŋki, ba bàmɛn ndaa mwɛy yubem ntɔn nde kàkäl muyäämà anà un’kaar. Wɛɛ akà mbuur mwɛy uboo aba kàkwe anki mukun’fuul naa: « Ngye nkye akwen akà nde? » Sye naa: « Ininà ngye akayäämà anà nde? » 28 Apan, un’kaar kàsàwɔm làbuuŋ ande paa, waa kàkyen bul, waa kàtɛn a baar naa: 29 « Yàlamɛn mbuur mwɛy kan’tɛn a mɛ indiir byanswà kàkyer mɛ. Nkye nde kà wà Klistɔ anki? » 30 Kyakin bàtoo ba u bul, bàyi ba mper akà nde.

31 Apan sye, alɔŋki bun’siinà naa: « Rabi, dyà! » 32 Wɛɛ nde kàtɛn a ba naa: « Mɛ, mɛ in’we anà isaa adyà, isaa mpa làyöb bɛ. » 33 Kyakin alɔŋki bàtɛɛnà ba, ba a ba naa: « Nkye ikyàkal naa mbuur mwɛy kun’twääl isaa adyà? » 34 Yɛsu kàtɛn a ba naa: « Isaa adyà amɛ, byà ntɔn mukyer ukwen a mbuur kan’töm anà mukwey isal ande. 35 Bɛ, nkye bɛ làfàtɛn anki bɛ ŋakwo naa: "Yan’sal nsöŋ nà mubwo isaa." Wɛɛ mɛ, mɛ alàkyään naa làduub mii abɛ, anà làler an’ywaŋ: mbɛŋ yan’söŋ anà yan’kwo mubwo! 36 Un’bweel kan’wal làfur ande itaan anà kan’böbà mbɛŋ ntɔn mɔ̈ɔ̈ a mbul a in’tye, ntɔn mbuur kan’kɔn anà mbuur kan’bwo, bàmɛn un’sak ba bàbɔ̈ɔ̈l. 37 Abà, un’sim afàtɛn ndandaa naa: "Umwɛy afàkɔn, umwɛy afàbwo." 38 Mɛ, mɛ kàlatöm mukàbwo mbɛŋ làkɔ̈ɔ̈n aman bɛ mpay, baar asin bàsöön mwäänà. Wɛɛ bɛ, bɛ lan’bilà unsà bweel a isal aba. »

39 Asamalya mbɔɔn bàsi làkwikilà amu Yɛsu ntɔn imbäl kàtɛ un’kaar naa: « Nde kan’tɛn amɛ indiir byanswà kàkyer mɛ. » 40 Undiir awun, mpal bàyàkɔlà ba tsütsü apà nde, ba bun’bɔ̈ɔ̈n mukal anà ba. Yɛsu kàbwaay paa ilä byeel. 41 Abun sye, un’kàbɔ a baar kàsi làkwikilà ntɔn ndaa kàtɛɛnà nde ŋakwo. 42 Waa ba bàtɛɛnà a un’kaar naa: « Bi kan’sà anki làkwikilà ntɔn ndaa kà ikyään ngye, wɛɛ ntɔn bi ŋakwo kàmuwem, waa bi kan’yöb naa ndandaa nde wà Un’tswää a mɔ̈ɔ̈ a mɛɛn. »

43 Ungö a ilä byeel, Yɛsu kàlwomà apan, waa kàkyen Ngalilɛ. 44 Nde kàkyään nde ŋakwo naa: « Ŋangɔɔm bàfun’pà anki làkoo u nsi ande ŋakwo. » 45 Umpal kàtöl nde u Ngalilɛ, baar a itiir a nsi akin bun’wɛl ubwaŋ, ntɔn ba bàkyer aman indiir byanswà kàkyer nde kà un’kyɔm, ntɔn ba sye bàkyen un’kyɔm.

46 Apan Yɛsu kàfurà Kana u Ngalilɛ, ntsü kàbuul nde an’dà vin. Kàkäl anà undweer a mfum a aŋità mwɛy , mwan ande wàbaal kàkäl anà ukyal u Kapɛrnawum. 47 Mpal kàwem nde naa Yɛsu kan’yà u Yuday a Ngalilɛ, waa kàkun’man anà kun’bɔ̈ɔ̈n naa nde utyà anà ukɔɔr mwan baal ande awà kàkäl tsütsü mukwà. 48 Yɛsu kàtɛn a nde naa: « Isàkal naa bɛ làmɛn anki idiim anà impà, bɛ làsà anki làkwikilà akà ikikye! » 49 Mfum aŋità awà kun’fuur naa: « Mwol, tyà kusà a mwan amɛ mukwà. » 50 Yɛsu waa kàtɛn a nde naa: « Kyen, mwan angye we anà mɔ̈ɔ̈. » Mbuur awà kàsi làkwikilà u ndaa kàtɛn Yɛsu a nde, waa kàkyen. 51 Umpal kàkäl nde mutyà, baar a isal ande bàkàbwey ande, waa bun’kyään naa: « Mwan angye kan’wà mɔ̈ɔ̈! » 52 Apan, nde kàfuul ba naa taaŋ nà mwan ande ukayà, ba bun’fuur naa: « Làbwɛy a mpye làlwomà ywenà, utaaŋ atàtwɛb, ungö a midi. » 53 Taarànde kàyɔbà naa làkäl taaŋ nsil lalɛy alà kun’kyään Yɛsu naa: « Mwan angye we anà mɔ̈ɔ̈ ». Apan, nde anà ndwà ande yanswà bàsi làkwikilà amu Yɛsu. 54 Kyaki kyà idiim a impà kyàyweel kàkyer Yɛsu u mfuurà ande u Ngalilɛ fà Yuday.