João 6:27-29 | Versão YNS

Yɛsu kan’dii abaal nsaab tyeen

1 Ungö a indiir abi, Yɛsu kàsabà sim a ɛwà a Ngalilɛ lumwɛy, akyà bàfàbel sye naa Tibɛryade. 2 Iköŋ a baar mbɔɔn kyàkäl muyun’lab, ntɔn bàmɛn ba idiim kàkyerà nde udu a abɛy. 3 Kyakin Yɛsu kàbeenà nde udu a mɔŋ, kàbwaay nde paa anà alɔŋki ande. 4 Pak, un’kyɔm a Ayudà, làkäl tsütsü mukwo. 5 Kyekà, kàsɛn nde mii, nde kàmɛn iköŋ a baar mbɔɔn kyan’yà akà nde, nde kàfuul Filipo naa: « Bi kan’kwo musom ken mampà ntɔn baar bà bàdi? » 6 - Kàtɛn nde abà ntɔn mubilà Filipo u mpem, ntɔn akà nde, nde kàkyer ayöbà naa nde ininà uyàkyer. - 7 Filipo kun’fuur naa: « Itàkal làfur a mbul mwɛy lun’syääl a an’ywaŋ làkwo anki musom mampà isàkal naa mbuur mbuur awal itàkal kitsu. » 8 Umwɛy uboo a alɔŋki ande, ikɔb ande Andrɛ, un’tɔŋ a Simɔn Petɔlà, kàtɛn a nde naa: 9 « Mwan baal mwɛy awà apà, nde we anà mampà an’tyeen mà ɔrze anà bibaan a nsö byeel. Wɛɛ indiir abi nkye byan’kwo mukyer akà un’kàbɔ a baar? » 10 Yɛsu kàtɛn naa: « Laswɛŋ baar bàbwaay. » Ikal akin kyàkäl anà in’lɛŋ mbɔɔn. Baar waa bàbwaay, ba bàkäl abaal isii a nsaab tyeen. 11 Apan, Yɛsu kàwɛl mampà, kàfuur an’tɔɔn, waa kàkäb akà baar bàkäl paa. Nde kàkyer abun sye ntɔn nsö: nde kapɛɛ yinà yanswà bàkweenà ba muwal. 12 Umpal bàyüür ba, Yɛsu kàtɛn a alɔŋki ande naa: « Làköŋà itiir byan’sal, ntɔn akà undiir ukɔ̈ɔ̈n akyà bwà. » 13 Ba bàköŋà bya, waa bàyööl in’lwaŋ, in’lwaŋ kwem aŋiyweel a itiir a mampà an’tyeen mà ɔrzɛ byàsääl akà baar bàdi. 14 Mpal bàmɛn baar impà kàkyer nde, ba bàtɛn naa: « Ndandaa mbuur awà, wà Ŋangɔɔm awayà u mɛɛn! » 15 Wɛɛ Yɛsu, abà kàyöb nde naa ba bàkyer ayun’wal a ngwal ntɔn mukun’sà mfum, nde kàfàkyà u mpey aŋàyen udu a mɔŋ.

Yɛsu wàmuyikyà udu a an’dà

16 Mpal làbü sisye, alɔŋki ande bàyàtyà kà un’kɔɔl a ɛwà, 17 ba bàbilà u bwaar làmwɛy, waa bàsɛmà mubweel ɛwà ntɔn mukyà Kapɛrnawum. Làpib làkäl lan’bwà itaan, Yɛsu kàkäl anki aŋàtataan. 18 Un’pöb angwal kàkäl muful, ɛwà kyàkäl munini. 19 Ba bàkäl ban’kyer an’kilɔmɛtre an’tyeen, itàkal an’syaam, ba bàmɛn Yɛsu wàmuyikyà udu a an’dà, wàmuyàsin tsütsü a bwaar. Apan bɔɔmà làkyer akaar. 20 Wɛɛ Yɛsu kàtɛn a ba naa: « Wà mɛ, twon lan’man bɔɔmà! » 21 Ba bàkwen mukun’wal u bwaar, wɛɛ la làkäl lan’tol u mɛɛn kà ikal akyà bàkyen ba.

Iköŋ a baar kyàmuleŋ Yɛsu.

22 U taaŋtye, iköŋ a baar bàsàsal u sim lumwɛy, bàmɛn ba naa bwaar làkäl làmwɛy mpɛl paa, naa Yɛsu sye kàkyen anki mbwo mwɛy anà alɔŋki ande uboo a bwaar aba, wɛɛ ba, bàkyen ba mpɛl aŋàyen. 23 Apan sye, an’bwaar asin màfü Tibɛryade, màyàkɔlà tsütsü kà ikal bàdi ba mampà, ungö kàfuur Mwol an’tɔɔn. 24 Wɛɛ utaaŋ kàmɛn iköŋ a baar naa itàkal Yɛsu, itàkal alɔŋki ande bàkäl anki paa, baar bàbilà kà an’bwaar, waa bàkyen Kapɛrnawum mukàleŋ Yɛsu.

Yɛsu wà làmpà a mɔ̈ɔ̈

25 Utaaŋ bun’mɛn ba u sim a ɛwà lumwɛy, ba bàtɛn a nde naa: « Rabi, ngye apà an’yàkɔlà taaŋ nà? » 26 Yɛsu kafuur naa: « Ndandaa, ndandaa mɛ alàkyään, kà ntɔn impà làmɛn bɛ anki waa bɛ, bɛ làyan’leŋ, wɛɛ ntɔn làdi bɛ mampà anà làyüür bɛ. 27 Twon lan’sal ntɔn isaa abyà ifàtay, wɛɛ ntɔn isaa ifàlam ntɔn mɔ̈ɔ̈ a mbul a in’tye, bya akwà usàlapà Mwan a mbuur, ntɔn nde wà mbuur kàsi Taa Nzam inyɛm ande. » 28 Apan, ba bun’fuul naa: « Ininà bi kan’kwo mukyer ntɔn musal isal a Nzam? » 29 Yɛsu kafuur naa: « Isal udilà Nzam akà bɛ kyà musà làkwikilà amu mbuur kàtöm nde. » 30 Apan ba bun’fuur naa: « Wɛɛ ngye, idiim nà ngye akyer ntɔn bi imɛn anà bi kasi làkwikilà? Ininà ngye afàsal? 31 Bànkaa abi bàdi mane u nsye a ipɔl, asànaa bàsön ya naa: "Isaa kapɛ nde mudyà byà làmpà làfü du." » 32 Apan Yɛsu kàtɛn a ba naa: « Ndandaa, ndandaa mɛ alàkyään, kà Mɔsɛ tɛy kàlapɛ làmpà a du, wɛɛ Taa amɛ afàlapà làmpà a du là ndandaa. 33 Ntɔn làmpà a Nzam là mbuur kan’fà du anà kan’pà mɔ̈ɔ̈ u mɛɛn. » 34 Apan, ba bàtɛn a nde naa: « Mwol, ipɛ taaŋ lanswà làmpà alà. »

35 Yɛsu kàtɛn a ba naa: « Mɛ, mɛ in’wà làmpà a mɔ̈ɔ̈. Mbuur awayà akà mɛ usàwem anki ngyal akà ikikye, mbuur awà asà làkwikilà amu mɛ, usàwem anki mfwää akà ikikye. 36 Wɛɛ, mɛ ya kàkyàtɛn a bɛ naa: bɛ làkyàman, wɛɛ bɛ làsaa anki làkwikilà. 37 Baar banswà kan’pà Taa bàsàyà akà mɛ, anà mbuur ayà akà mɛ, mɛ in’sun’piy anki, 38 ntɔn kàyàtɔlà mɛ fà du, kà mukyer ukwen amɛ ŋakwo anki, wɛɛ mukyer ukwen a mbuur awà kan’töm. 39 Le, ukwen a mbuur awà kan’töm abà: naa mbuur wanswà kan’pɛ nde ukɔ̈ɔ̈n akyà bwà, wɛɛ mɛ un’wiiy kà ilä a ntsüü. 40 Abun, ukwen a Taaràmɛ abà: mbuur wanswà aman Mwan anà asà làkwikilà amu nde, ukäl anà mɔ̈ɔ̈ a mbul a in’tye, waa mɛ, mɛ in’sun’wiiy kà ilä a ntsüü. »

41 Sɛmà apan, Ayudà bàbulà muŋüŋün ntɔn kàtɛn nde naa: « Mɛ, mɛ in’wà làmpà làfü du. » – 42 Ba waa bàfatɛɛnà naa: « Nkye nde kà Yɛsu, mwan a Yɔsɛfi anki? Nkye bi taarànde anà ngwän kayöb anki? Aben nde kan’kwo mukyey uyɔl apanà naa: "Mɛ an’yàtɔlà fà du"? » 43 Wɛɛ Yɛsu kafuur naa: « Twon lan’ŋüŋün bɛ a bɛ. 44 Akà mbuur mwɛy ukwe anki muyà akà mɛ isàkal naa Taa awà kan’töm kun’naan anki, waa mɛ, mɛ insun’wiiy kà ilä a ntsüü. 45 Aŋangɔɔm bàsön abà: "Nzam asàlɔŋ ba banswà." Mbuur wanswà kàwem Taa anà kàkyey an’lɔɔŋ ande, ayà akà mɛ. 46 Ikaswaŋà naa akà umwɛy kàmɛn anki Taa akà ikikye, nà mbuur mwɛy awà kàfü akà Nzam, nde awà kàmɛn Taa. 47 Ndandaa, ndandaa, mɛ alàkyään: mbuur asà làkwikilà we anà mɔ̈ɔ̈ a mbul a in’tye. 48 Mɛ, mɛ in’wà làmpà a mɔ̈ɔ̈. 49 Bànkaa abɛ bàdi manɛ u nsye a ipɔl, wɛɛ ba bàkyàkwà. 50 Wɛɛ làmpà làyàtɔlà fà du, là naa mbuur adyà la ukɔɔn akwà. 51 Mɛ, mɛ in’wà làmpà alye anà mɔ̈ɔ̈ làfü du. Isàkal naa mbuur kan’dyà unsà làmpà alà, nde asàkal anà mɔ̈ɔ̈ a mbul a in’tye. Làmpà alà in’sàpà mɛ, lun’sön a ndür amɛ an’pà mɛ ntɔn mɛɛn ikäl anà mɔ̈ɔ̈. »

52 Apan, Ayudà bàsyeelà mbaaŋ a ngwalàngwal ba a ba: « Aben mbuur wà kan’kwo mupà bi un’sön a ndür ande naa bàdi wa? » 53 Abun, Yɛsu kakyään naa: « Ndandaa, ndandaa mɛ alàkyään: isàkal naa bɛ làdi anki un’sön a ndür a Mwan a mbuur anà bɛ lànü anki an’kil ande, bɛ mɔ̈ɔ̈ làsàkal awà anki. 54 Mbuur awadyà un’sön a ndür amɛ anà anwà an’kil amɛ, nde we anà mɔ̈ɔ̈ a mbul a in’tye, waa mɛ, mɛ insun’wiiy kà ilä a ntsüü. 55 Ntɔn un’sön a ndür amɛ wà isaa a ndandaa byàdyà anà an’kil amɛ mà man a ndandaa. 56 Mbuur awadyà un’sön a ndür amɛ anà anwà an’kil amɛ, nde wà amu mɛ anà mɛ in’wà amu nde. 57 Asànaa Taa awà kan’töm awà nde anà mɔ̈ɔ̈, mɛ sye in’wà anà mɔ̈ɔ̈ u mbwo ande. Abun, mbuur asan’dyà, nde asàkal anà mɔ̈ɔ̈ u mbwo amɛ: 58 Alà là làmpà làyàtɔlà fà du. La kà latɛy asànaa la akwà bàdi bànkaa abɛ. Ba, ba bàkyàkwà. Wɛɛ mbuur asàdyà làmpà là, nde asàkal anà mɔ̈ɔ̈ a mbul a in’tye. » 59 Indiir abi nde kàlɔɔŋà u ndwà a nköŋ a Ayudà u Kapɛrnawum.

Ndaa a mɔ̈ɔ̈ a mbul a in’tye

60 Ungö bàwem ba Yɛsu, bàmbɔɔn uboo a alɔŋki ande bàtɛn naa: « Ndaa ayi yà bwoor! Nà kan’kwo muwem ya? »

61 Wɛɛ nde kayöb nde ŋakwo naa alɔŋki ande bàkäl mukun’twe ntɔn ndaa ayi, waa kàtɛn a ba naa: « Nkye ndaa ayi yàmàladii ukyal? 62 Akya isàkal naa bɛ lan’man Mwan a mbuur wàmubɛɛnà mper kàkäl nde kusà? 63 Dweelà làfàpà mɔ̈ɔ̈, wɛɛ un’sön a ndür wà undiir mwɛy ndöŋ watɛy. Ndaa an’tɛn mɛ a bɛ yà dweelà anà mɔ̈ɔ̈. 64 Wɛɛ bamwɛy uboo abɛ bàfàsà anki làkwikilà. » Abun, Yɛsu kàkyer ayöbà fà nsɛmà naa bànà mpa bàsye làkwikilà anà nà kàlun’yälà. 65 Nde kàkwɛy naa: « Kyakin kàlakyään mɛ naa: "akà mbuur mwɛy ukwe tɛy muyà akà mɛ, isàkal naa ya Taa kun’pɛ anki." »

66 Fà apan, alɔŋki ande mbɔɔn bàkyer alwomà, waa bàwɛy muyikyà anà nde. 67 Apan, Yɛsu kàtɛn a Bàkwem Aŋiyweel naa: « Atöl bɛ, nkye bɛ làkwen anki mukyà? » 68 Simɔn Petɔlà kun’fuur naa: « Mwol, bi ikyà akà nà? Ngye awe anà ndaa a mɔ̈ɔ̈ a mbul a in’tye. 69 Bi, bi kàkyàsà làkwikilà anà kàkyàyöb naa ngye, ngye awà Ŋun’kyɛɛl a Nzam. » 70 Yɛsu kafuur naa: « Nkye kà mɛ anki kàlasɔ̈ɔ̈l, bɛ Bàkwem Aŋiyweel? Kyekà umwɛy uboo abɛ wà ileŋ! » 71 Abun, nde kàtɛɛnà ntɔn Yudasi, Mwan a Simɔn Isikalyɔt. Ntɔn nde wumwɛy uboo a Bàkwem Aŋiyweel awà kàlun’yälà.

Bíblia Online

João 6

Veja também

Oração para pedir a Deus que aumente a fé quando o coração está cheio de dúvida

7 atitudes que agradam a Deus segundo a Bíblia