25 Un’lɔɔŋ a un’kɔɔn mwɛy kàmbarà ntɔn mulwab Yɛsu ndaa, waa kàtɛn naa: « Un’lɔɔŋ, ininà mɛ in’kyer ntɔn muwal möö a mbul a in’tye? » 26 Yɛsu kun’fuur naa: « Uboo a un’kɔɔn ininà bàsön? Ngye akataŋà aben? » 27 Nde kàfuur naa: « Ngye ayàkwen Mwol, Nzam angye, unsà mpem angye yanswà, unsà mɔ̈ɔ̈ angye wanswà, unsà ngwal angye yanswà, unsà an’kyän angye manswà, anà un’tɔŋ angye asànaa ngye ŋakwo. » 28 Yɛsu waa kàtɛn a nde naa: « Ngye an’fuur ubwaŋ. Kyer abun, waa ngye ayàkal anà möö. » 29 Wɛɛ nde kàkwen muwal iböŋ anà mufuul Yɛsu naa: « Un’tɔŋ amɛ nà? » 30 Yɛsu waa kàfuur naa: « Mbuur mwɛy kàfü Yɛlusàlɛm mutyà Yɛlikɔ. Baar abɛ laa bun’käär ba, bàgyɔɔr ba indiir ande byanswà, bun’düb ba, bàkyen ba anà bàsun’wɛy ba tsütsü a ukwà. 31 Ngaŋ mwɛy kàkäl mutyà u mbwo ayin. Mpal kàmɛn nde mbuur awun, nde kàlyaaŋ ukɔl. 32 Un’lɛvi mwɛy sye kàkɔlà kà ikal akin, kun’mɛn nde, waa kàköl. 33 Wɛɛ un’samàlya mwɛy kàkäl u mbwo ande mulyaaŋ. Mpal kàmɛn nde mbuur awà, ngyɛb laa yun’käär yà. 34 Nde kàsin tsütsü, kun’bäm ipfɛy kà iwà ande, kun’tyaŋ may anà man, waa kun’si udu a mpoonà ande, kun’syen u ndwà a angyey, waa kun’bay. 35 Taaŋtyà nde kàwɛl ndiim yweel, laa kàpɛ nde ya akà ŋandwà a angyey, waa kàtɛn a nde naa: "Sun’bay mbuur wà, isàkal naa ngye an’sàtwey ngim mbɔɔn yan’söön yi, mɛ in’yafuur umpal in’yàfurà mɛ."

36 « Uboo a baar abà batär, nà awà un’tɔŋ a mbuur kàbü wà kà an’kɔɔ a baar abe? » 37 Un’lɔɔŋ a un’kɔɔn waa kun’fuur naa: « Mbuur akwà kun’wem ngyɛb. » Yɛsu naa: « Kyen, ngye sye kakyer abun. »