Lucas 19

Yɛsu kan’kyà Yɛlusàlɛm

28 Ungö mutɛn abà, Yɛsu kàkyen kusà a un’sɛŋ a baar kàkäl mubeenà Yɛlusàlɛm. 29 Mpal kàsin nde tsütsü apà Bɛtfagɛ anà Bɛtani, tsütsü apà mɔŋ bàfàbel naa mɔŋ a in’te a ɔlivɛ, nde kàtöm alɔŋki bööl kusà, 30 waa kàtɛn naa: « Làkyen u bul lanà u sim. Bɛ làsàkɔlà, bɛ làkàman mwan a anɛ wàŋabäm, udu awa mbuur ŋàtàlaar anki. Lun’tsuuŋ, lun’twääl pà. 31 Wɛɛ isàkal naa mbuur amàlafuul naa: "Ntɔn nkye làtsuuŋà bɛ wa?" Lun’fuur naa: "Mwol we anà mfun a wa." » 32 Umpal bàkyen antööm, ba bàmɛn asànaa kàtɛn Yɛsu. 33 Utaaŋ bàkäl ba mutsuuŋ mwan a anɛ wa, aŋawa bafuul naa: « Ntɔn nkye làtsuuŋà bɛ wa? » 34 Ba bàfuur naa: « Mwol we anà mfun a wa. » 35 Apan ba bàsyen mwan a anɛ akà Yɛsu. Ba bàyeel ipfɛy aba udu a ntsür, waa bàbay Yɛsu mulaar udu awa. 36 Mpal kàkäl nde muyikyà, baar bàyiyeelà ipfɛy aba u mbwo. 37 Utaaŋ kàkäl nde tsütsü a Yɛlusàlɛm, u mbumà a mɔŋ a in’te a ɔlive, un’kàbɔ a alɔŋki wanswà kàkäl mukömà Nzam unsà un’sak, u ndaa a ngwal, ntɔn impà byanswà bàmɛnà ba. 38 Ba bàtɛɛnà naa: « Wɛy Nzam usaak mfum kan’yà kà ikɔb a Mwol! Duu u dudu anà làkoo akà Nzam. » 39 Uboo a un’kàbɔ awà bàkäl anà Amfarisi amwɛy, ba bàtɛn a Yɛsu naa: « Un’lɔɔŋ, aswɛŋ alɔŋki angye bàwɛy musà làso. » 40 Yɛsu waa kafuur naa: « Mɛ alàkyään naa ba bàsàkal a duu, in’kul ikyer a kuub in’kwɛŋ. »