33 Mpal bàtöl ba kà ikal mwɛy ikɔb akya « Bɔl a un’tswe », ba bàbɛɛrà Yɛsu u kulunsi anà baar bööl abà, umwɛy u kɔɔ ande là ibaal, wumwɛy u kɔɔ ande là ikaar. 34 Waa Yɛsu kàtɛn naa: « Taa, adwääl nkul, ntɔn ba bàyöb anki ndaa bàkyerà ba. » Ba bàkäb ipfɛy ande mutà löb. 35 Un’sɛŋ kàkäl paa muleerà. Wɛɛ abyääl bàkäl musɛɛ nde, waa bàtɛɛnà naa: « Nde kàtsü baar asin mɔ̈ɔ̈, wɛy nde utsü mɔ̈ɔ̈ nde ŋakwo isàkal naa nde wà Klistɔ, mbuur kàsɔ̈ɔ̈l Nzam. » 36 Aŋità sye bàkäl mukun’sɛɛ. Ba bàsin tsütsü apà nde, waa bun’pɛɛ man a nkyään, 37 waa bàtɛɛnà naa: « Isàkal naa ngye awà mfum a Ayudà, tswà mɔ̈ɔ̈ ngye ŋakwo. » 38 Udu a nde yàkäl anà ndaa aŋàsɔn abà: « Mbuur wà, wà mfum a Ayudà. » 39 Umwɛy uboo a baar abe bàkäl u kulunsi waa kun’töö, waa kàtɛn a nde naa: « Nkye ngye kà Klistɔ anki? Tswà mɔ̈ɔ̈ ngye ŋakwo anà bi mwo sye. » 40 Wɛɛ wumwɛy waa kun’pɛl, kàtɛn a nde naa: « Ngye Nzam bɔɔmà un’tiin anki, ngye mbuur an’wal ntaaŋàmbar nsil ya? 41 Akà bi, bi ube abi kan’fur, wɛ nde undiir ube ukyer nde watɛy. » 42 Waa kàkwɛy naa: « Yɛsu, ngyɔbà mpal asàyà ngye kà imwol angye. » 43 Yɛsu waa kun’fuur naa: « Mɛ ndandaa akyään, ŋabawà ngye akal u du anà mɛ. »