Lucas 5

Yɛsu kan’bel alɔŋki ande bàtàtwɛb

1 Yàmɛnà naa ilä mwɛy Yɛsu kàkäl tsütsü a ɛwà a Ngɛnàsàlɛr, baar mbɔɔn bàkyer un’diŋà ntɔn muwem ndaa a Nzam. 2 Nde kàmɛn an’bwaar an’mɔ̈ɔ̈l mà ipɔl kà un’kɔɔl a an’dà ntɔn aŋama bàkäl musɔŋ an’kwen aba. 3 Nde kàlär uboo a bwaar làmwɛy, la làkäl là Simɔn, waa kun’lɔ̈ɔ̈m naa nde usiinà la ikyee uboo a an’dà. Nde waa kàbwaay, kàlɔɔŋà baar uboo a bwaar.

4 Mpal kàmay nde mulɔŋ, nde kàtɛn a Simɔn naa: « Làkyen uboboo a an’dà, làtɔɔm an’kwen abɛ kan’dà ntɔn mulwab nsö. » 5 Simɔn kun’fuur naa: « Un’lɔɔŋ, bi kan’kyer mpib aŋun’kiinà, wɛɛ bi akà undiir imɛn anki. Ntɔn ngye aman’swaŋ, mɛ in’kyer atɔɔm an’kwen. » 6 Ungö mutɔɔm ma, ba bàsiim nsö mbɔɔn, an’kwen màkäl tsütsü mukaamà. 7 Ba bàbel atɔŋ aba bàkäl uboo a bwaar lumwɛy ntɔn ba babay. Ba waa bàyi, bàyööl an’bwaar màmɔ̈ɔ̈l: ma màkäl tsütsü muminà ntɔn buur a nsö. 8 Mpal kàmɛn Simɔn abun, nde kàbü kà in’kɔl a Yɛsu, waa kàtɛn naa: « Mwol, lwomà tsütsü apà mɛ, ntɔn mɛ in’wà mbuur a man’be. » 9 Ntɔn nde anà atɔŋ ande matɛɛr màkyer awal ntɔn bàsiim ba nsö mbɔɔn. 10 Atɔŋ ande Zyak anà Ywan, baan a Zebàday, bàkäl sye asànaa nde. Apan, Yɛsu waa kàtɛn a Simɔn naa: « Twon an’man bɔɔmà, sɛmà apanà ngye an’bulà un’lɔ̈ɔ̈b a baar. » 11 Ungö bàmay ba mutwey an’bwaar u nkankyel, ba bàsàwɛy ma, waa bàläb Yɛsu.