LUKÀ 8

Mwan a Zayirɔs wà un’kaar anà un’kaar kàbä Yɛsu kà ipfɛy

40 Mpal kàfurà Yɛsu Ngalilɛ, baar banswà bun’wɛl unsà ubwaŋ banswà, ntɔn ba bàkäl mukun’dilà. 41 Apan mbuur mwɛy ikɔb ande Zayirɔs laa kàyi nde. Nde kàkäl mfum a ndwà a nköŋ a Ayudà. Nde kàbü kà in’kɔl a Yɛsu, waa kun’bɔ̈ɔ̈n naa nde ukyen ndwà ande: 42 mwan ande mwɛy mpɛl wà un’kaar wà tsütsü mbul kwem aŋiyweel kàkäl musyäämà mɔ̈ɔ̈.

Yɛsu waa kàkyen ndwà a mbuur awun. Apan, baar mbɔɔn bàyibääbà u mbil a ndür ande. 43 Uboo a baar aban kàkäl anà un’kaar mwɛy kàyimanà an’kil mbul kwem aŋiyweel. Nde kàdwä ngim mbɔɔn akà angaŋ, wɛɛ nde kàkɔɔra anki. 44 Nde kàsin tsütsü ungö a Yɛsu, waa kun’bä u làpan a ipfɛy ande. Taaŋ nsil alan an’kil laa màtsü ma mutoo. 45 Yɛsu waa kàfuul naa: « Nà kàman’ba? » Wɛɛ akà mbuur mwɛy kàkyey anki. Petɔlà waa kàtɛn a nde naa: « Ambà Un’lɔɔŋ, baar bàmasà uboboo, bà mbɔɔn bà imbäm’dir anà ngye. » 46 Nde waa kàtɛn naa: « Mbuur akyer an’ba: mɛ in’kyer awem naa dweelà a ngwal mwɛy lan’too u ndür amɛ. » 47 Un’kaar awun kàmɛn nde naa undiir kàkyer nde kan’mɛnà u mii a baar, laa kàsin nde tsütsü apà Yɛsu, kàbü nde kà inkɔl ande, waa kàtɛn u mii a baar ntɔn nkye kun’bä nde anà muswaŋ naa taaŋ nsil alan nde waa kàkɔɔrà.

48 Yɛsu kàtɛn a nde naa: « Mangwa, làkwikilà angye làmatswà mɔ̈ɔ̈, kyen unsà duu. »

49 Nde kàkäl anki aŋàtàmay mutɛn mpal kàyi mbuur kàfü ndwà a mfum a ndwà a nköŋ a Ayudà. Waa kun’kyään naa: « Mwan angye wà unkaar kan’kwà, twon afun’twääl Un’lɔɔŋ nkwom. » 50 Mpal kàwem Yɛsu abwɛy, nde kàtɛn a Zayirɔs naa: « Twon an’man bɔɔmà, sà làkwikilà mpɛl, mwan angye akyer akɔɔrà. » 51 Mpal kàkɔlà nde, Yɛsu kàkwen anki naa baar asin bàbilà u ndwà, wɛ Petɔlà, Ywan, Zyak, taar anà ngwän a mwan mpɛl. 52 Ntsü yanswà baar bàkäl mulel. Yɛsu waa kàtɛn naa: « Twon lan’lel, nde ukü anki, nde kan’bɔ̈ɔ̈n twaal. » 53 Wɛɛ ba bàkyer un’sɛɛ, ntɔn ba bàkyer ayöbà naa nde kàkäl aŋàkwà. 54 Apan, Yɛsu kàtɛ kɔɔ a kimwan un’kaar awun mpi, waa kàtɛn a nde u ndaa a ngwal naa: « Mwan amɛ, wiyà! » 55 Laa kàwiyà nde, waa kàmbarà. Yɛsu kàswɛŋ naa ba bun’pɛ udyà. 56 Aböör a mwan un’kaar awun matɛɛr màkyer awal. Wɛɛ Yɛsu katsüŋ mukyään mbuur asin ndaa ayin.