Mateus 20

Baar isal uboo a ywaŋ a vin

1 « Abun, Imwol a du kyà asànaa nkum a ndwà mwɛy kàtoo ututu tutu muwal baar ntɔn mukàsal u ywaŋ a vin ande. 2 Nde kàlwɛɛŋ anà ba naa nde ayafur itɛr a ngim mwɛy kà ilä imwɛy kyà isal. Ungö nde katöm mukàsal u ywaŋ ande. 3 Ntsü a taaŋ làwà làtutu, nde kàtoo, waa kàmɛn baar bumwɛy u balàbal bàkyàkal mpɛɛl, 4 nde kàtɛn a ba naa: "Bɛ sye, làkyen ywaŋ amɛ, mɛ in’yàlapà làfur aŋàkwo." 5 Ba waa bàkyen. Ntsü a midi anà utaaŋ làtär ungö a midi, nde kàfàtoo, waa kàkyer asànaa kusà. 6 Mumay, nde kàfàtoo u taaŋ làtyen là sisye, waa kàmɛn baar asin bàkyàmbar paa. Nde kafuul naa: "Ntɔn nkye làbwaayà bɛ apà ilä aŋun’kiinà ukɔɔn isal?" 7 Ba bàfuur naa: "Ntɔn akà mbuur mwɛy kà iwɛl anki musal." Nde waa kàtɛn a ba naa: "Bɛ sye, làkyen ywaŋ amɛ!" »

8 « Mpal làkwe sisye, ŋaywaŋ kàswɛŋ mbuur afàler isal ande naa: "Abel baar a isal, pà akà mbuur wanswà làfur ande. Ngye ayàsɛmà akà baar a ngöngö, waa ayàmay akà baar atàtwɛb." 9 Baar akwà bàsɛmà isal u taaŋ làtyɛn là sisye waa bàyi, bàwɛl mbuur mbuur itɛr a ngim mwɛy. 10 Wɛɛ mpal bàyi baar atàtwɛb, an’kyän aba màkäl naa ba bàyàwal làfur aŋàsöön, wɛɛ ba sye bàwɛl mbuur mbuur itɛr a ngim mwɛy. 11 Utaaŋ ban’wal ba kya, ba bàŋüŋün a nkum a ndwà, 12 waa bàtɛn a nde naa: "Baar bàbilà isal ungöngö bàkyer taaŋ làmwɛy mpɛl, wɛɛ ngye amafur làsii làmwɛy anà bi baar kan’sɛn yɔ̈ɔ̈n a ilä anà igyɛy a mwäänà!" 13 Wɛɛ ŋaywaŋ kàfuur akà umwɛy uboo a ba naa: "Un’sam amɛ, akà ube mwɛy amakyer mɛ batɛy. Nkye ngye alwɛɛŋ anki anà mɛ ntɔn itɛr a ngim mwɛy? 14 Wal kab angye, kyen kà ngye. Mɛ an’kwen mupà akà mbuur angöngö asànaa akà ngye. 15 Nkye mɛ in’kwe anki mukyer anà indiir amɛ asànaa in’kwen mɛ? Ngye an’man ube ntɔn in’wà mɛ mbuur aŋàbwaŋ?" 16 Abun, bàngöngö bàsàkal bàtàtwɛb, bàtàtwɛb bàsàkal bàngöngö. »

Yɛsu kan’fàkyään nkweel anà ngwiiyà ande

17 Umpal kàkäl Yɛsu mubeenà Yɛlusàlɛm, nde kàbel Bàkwem Aŋiyweel ukɔl, waa kàtɛn a ba u mbwo naa: 18 « Le, bi ibàmubeenà Yɛlusàlɛm, mper bàyàkàyälà Mwan a mbuur akà amfum a angaŋ anà akà alɔɔŋ a in’kɔɔn. Ba bàkyer akun’tsüül mbar a ukwà, 19 anà bàkun’pà kà an’kɔɔ a baar mpa abà Ayudà ntɔn mukun’sɛ, mukun’kam an’füm anà mukun’bɛɛrà u kulunsi. Wɛɛ kà ilä kyàtär, nde akyer asàwiyà. »

Ndɔ̈ɔ̈m a ngwän a Zyak anà Ywan

20 Apan, un’kyay a Zebeday kàyàsin tsütsü apà Yɛsu anà baan ande babaal , waa kabü an’köm ntɔn mukun’lɔ̈ɔ̈m. 21 Yɛsu kàtɛn ande naa: « Ininà ngye akwen? » Nde kun’fuur naa: « Pà mbwo uboo a Imwol angye naa baan abaal amɛ bà bàbɔ̈ɔ̈l bàsàbwaay umwɛy u kɔɔ angye libaal, wumwɛy u kɔɔ angye là ikaar. » 22 Yɛsu kàfuur naa: « Le baar bà: bɛ làyöb anki naa bɛ ininà làkalɔɔmà. Nkye bɛ lan’kwo munwà kɔɔb alà in’yànwà mɛ? » Ba bun’fuur naa: « Inye, bi kan’kwo. » 23 Nde waa kàtɛn a ba naa: « Bɛ làkyer asànwà kɔɔb amɛ. Wɛɛ mubwaay u kɔɔ ibaal anà là ikaar, kà mɛ anki an’kwo mupà mbwo: Kya kyà ntɔn baar kàlɔ̈ɔ̈n Taa. »

24 Mpal bàwem alɔŋki kwem bumwɛy ndaa ayin, ba bàwem atɔŋ aba abà bàbɔ̈ɔ̈l nkyɛl. 25 Wɛɛ Yɛsu waa kabel, waa kàtɛn a ba naa: « Bɛ, bɛ làkyàyöb naa amfum a in’sɛŋ bàfàsà ba ungyɛl a in’kɔl aba, anà baar an’köl an’köl bàfàswaŋ ba ikɔ̈b aba. 26 Ya ikwe anki mukal abwɛy uboo a bɛ. Wɛɛ isàkal naa mbuur akwen mukal wàkölàköl uboo a bɛ, wɛy nde ukäl un’syääl abɛ, 27 waa mbuur wanswà akwen mukal wàtàtwɛb uboo a bɛ, wɛy nde ukäl un’syääl abɛ. 28 Lalan Mwan a mbuur kàyi anki ntɔn bun’syääl, wɛɛ ntɔn musyääl anà mupà mɔ̈ɔ̈ ande nkwiy ntɔn un’kàbɔ a baar. »

Nkɔɔrà a ikwàmii abɔ̈ɔ̈l

29 Umpal bàtoo ba u Yɛlikɔ, un’sɛŋ a baar mbɔɔn kàläb Yɛsu. 30 Kyekà ikwàmii abɔ̈ɔ̈l bàkäl bàŋàbwaay ukɔl a mbwo. Mpal bàwem ba naa Yɛsu wàmulyaŋ tsütsü, ba bàsɛmà mukuub in’kwɛŋ: « Mwol, Mwan a David, isyääm! » 31 Un’sɛŋ a baar katsüŋà musà in’kwɛŋ, wɛɛ ba bàsöönà mulaal: « Mwol, Mwan a David, isyääm! » 32 Yɛsu waa kàmbär, waa kabel, waa kafuul naa: « Ininà bɛ làkwen naa mɛ in’kyer ntɔn bɛ? » 33 Ba bun’fuur naa: « Mwol, kyer naa mii abi idubà. » 34 Yɛsu waa kasyääm, kabä u mii. Apan sye, mii aba waa myàdubà, waa bun’läb.