Amfum ban’dirà Yɛsu
1 Mpal kàmay Yɛsu nswɛɛŋ ayi yanswà, nde kàtɛn a alɔŋki ande naa: 2 « Bɛ làkyàyöb naa un’kyɔm a Pak ayàkal ungö a ilä byeel: Mwan a mbuur bàkyer ayun’yälà, ntɔn bun’bɛɛrà u kulunsi. » 3 Apan, andweer a angaŋ anà andweer a un’sɛŋ a Ayudà bakyer aköŋ u ndwà a Undweer a angaŋ Kayifa. 4 Ba bàtsül mukɔr Yɛsu u mbwo a loor anà mukun’dwa. 5 Wɛɛ, ba bàtɛɛnà naa: « Wɛy ya ikɔɔn akal umpal bàkyɔɔmà ba, manà lingyoomà làyàbwà uboo a un’sɛŋ. »
Un’kaar mwɛy anà may a usɔŋ
6 Yɛsu kàkäl u Bɛtani u ndwà a Simɔn ŋabay. 7 Un’kaar mwɛy kàyàsin apà nde anà un’laŋ wàŋàyɔl a may a usɔŋ bàfàbel naa albatre. Ma mà ntal mbɔɔn. Nde kàtyaŋ ma udu a un’tswe a Yɛsu mpal kàkäl nde mudyà. 8 Mpal bàmɛn alɔŋki abun, ba bàmɛn ube mbɔɔn, waa bàtɛn naa: « Ntɔn nkye ubii a tub abà? 9 Yàlàbwaŋ muyälà may a usɔŋ amà u ntal a mbɔɔn, waa ngim ayin bàlàpà aŋàlàmbwà! »
10 Mpal kàyöb Yɛsu an’kyän aba, nde kàtɛn a ba naa: « Ntɔn nkye làpà bɛ un’kaar wà mpay? Nde kan’kyer ndaa aŋàbwaŋ ntɔn mɛ. 11 Ntɔn aŋàlàmbwà bà anà bɛ ilä byanswà, wɛɛ mɛ, mɛ in’wà anki anà bɛ ilä byanswà. 12 Kan’tyaŋ nde may a usɔŋ mà udu a ndür amɛ, nde kan’lɔɔn ndyee amɛ. 13 Ndandaa mɛ alakyään: mper yanswà bàsàkàkyään Làsaŋ Aŋàbwaŋ, u mɛɛn manswà, bàsakyäänà sye ndaa kan’kyer un’kaar wà, ntɔn mukun’yɔbà. »
Yudasi akwen muyälà Yɛsu
14 Apan, Yudasi Isikalyɔt, umwɛy uboo a alɔŋki kwem aŋiyweel bà Yɛsu, kàkàman andweer a angaŋ, 15 waa kàtɛn a ba naa: « Ininà bɛ lan’pà, waa mɛ alàpà awà? » Ba bun’pɛ itɛr a ngim an’kwem an’tär. 16 Sɛmà apan, Yudasi kàyileŋà ipöl aŋàbwaŋ ntɔn mukapɛɛl awà.
Yɛsu kan’dyà Pak
17 Ilä a tàtwɛb kyà un’kyɔm a mampà màkɔ̈ɔ̈n ful, alɔŋki bàyi akà Yɛsu mukun’fuul naa: « Ngye akwen naa bi ikàlɔn ken ikal adyà ngye Pak? » 18 Yɛsu kàtɛn a ba naa: « Làkyen u bul a kölàköl, akà mbuur mwɛy, lun’kyään naa: "Un’lɔɔŋ an’tɛn naa: Taaŋ amɛ là tsütsü, mɛ anà alɔŋki amɛ in’yàdyà Pak u ndwà angye." » 19 Alɔŋki bàlɔ̈ɔ̈n Pak asànaa kaswɛŋ Yɛsu.
Yɛsu kan’dyà Pak anà alɔŋki ande
20 Mpal a sisye, Yɛsu kàkäl u mɛsà anà Bàkwem Aŋiyweel. 21 Mpal bàkäl ba mudyà, Yɛsu kàtɛn naa: « Ndandaa mɛ alàkyään: umwɛy uboo a bɛ ayan’mɛɛn nku. » 22 Ba bàmɛn ngyɛb mbɔɔn, waa bàsɛmà mukun’fuul umwɛy umwɛy naa: « Mwol, nkye mɛ? » 23 Yɛsu kafuur naa: « Mbuur awà kan’biil kɔɔ mbwo mwɛy anà mɛ uboo a làlɔŋà a isaa, mbuur nsil awà ayan’mɛɛn nku. 24 Mwan a mbuur wàmukyà asànaa Ndaa Aŋàsɔn ikyäänà ya ntɔn nde. Wɛɛ ngyɛb akà mbuur amɛɛn Mwan a mbuur nku! Yàlàkal ubwaŋ naa mbuur awà bàkɔɔn a un’bɔr! » 25 Yudasi, mbuur ayun’yälà, kun’fuul naa: « Mwol, nkye mɛ? » Yɛsu kun’fuur naa: « Ngye ŋakwo an’tɛn. »
Isaa un’kyɛɛl
26 Umpal bàkäl ba mudyà, Yɛsu kàwɛl mampà, ungö kàsaak nde ma, nde kàtsül ma, kàpɛ alɔŋki ande, waa kàtɛn naa: « Mää, làdi, ayi yà ndür amɛ. » 27 Ungö, nde kàwɛl kɔɔb a vin, ungö mufuur an’tɔɔn, nde kàpɛ ba, waa kàtɛn naa: « Lànü la bɛ banswà, 28 ntɔn mamà an’kil amɛ, an’kil a un’tüüb, màpää ntɔn un’kàbɔ a baar, ntɔn ndwääl a nkul a man’be aba.
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)