1 Apanà, ininà bi itɛn? Nkye bi ikal tii kunà uboo a man’be ntɔn kab a ngway làsöönà? 2 Ŋaa! Bi kàkyàfuràkwà ntɔn man’be, bi iyàfàkal aben uboo a man’be? 3 Aben, bɛ lan’diimà naa bi banswà kàwɛl ndüümà amu Klistɔ Yɛsu, nkye unsà nkweel ande ayi, waa bi kàwɛl ndüümà? 4 Unsà ndüümà, bi bidyee u mbwo a nkweel ande mbwo mwɛy anà nde, ntɔn yà asànaa Klistɔ kàwiyà nde uboo a akü u mbwo a làkoo a Taa, bi sye iwal mɔ̈ɔ̈ akün.

5 Ntɔn, isàkal naa bi bàkäl un’tüüb unsà ukwà ande, bi sye isàkal anà wa u ngwiiyà ande. 6 Wɛy bi iyöb naa: imbuur itaan kàkäl bi akyà, bàkyàbɛɛrà u kulunsi anà Nde ntɔn mudwa ndür a man’be yi anà bi ikɔ̈ɔ̈n akal asɔ a man’be. 7 Ntɔn mbuur awà kan’kwà, nde bàmutwey balàbal unsà man’be. 8 Kyekà, ntɔn bi ban’kwà anà Klistɔ, bi ban’kyey naa bi isàkal sye u mɔ̈ɔ̈ anà Nde. 9 Ntɔn bi ikyàyöb naa Klistɔ awà kàwiyà uboo a akü, ufàsàkwà anki: ukwà bàfàkal anki anà ikɔ̈b udu a Nde. 10 Nde kàkü ntɔn man’be, mbalà mwɛy ipepey. Wɛɛ apanà, nde we anà mɔ̈ɔ̈, mɔ̈ɔ̈ ande wà ntɔn Nzam. 11 Abà sye bɛ, bɛ làmɛnà asànaa bɛ làkyàkwà unsà man’be, bɛ làwe anà mɔ̈ɔ̈ ntɔn Nzam amu Klistɔ Yɛsu. 12 Lalan, wɛy man’be màkɔ̈ɔ̈n akal anà ikɔ̈b udu a ndür abɛ yà ukwà ntɔn mufàkyey ilään a ya. 13 Twon lan’pà itiir a ndür abɛ akà man’be asànaa an’tà a indiir ikɔ̈ɔ̈n balàbal. Wɛɛ, làpɛ mɔ̈ɔ̈ abɛ akà Nzam asànaa baar bàwiyà uboo a akü, waa abye anà mɔ̈ɔ̈. Lun’pɛ itiir a ndür abɛ asànaa an’tà a indiir a balàbal. Labilà unsà isal a Nzam. 14 Ntɔn man’be màfàsàkal anki anà ikɔ̈b udu abɛ, ntɔn bɛ làfàkal anki ungyɛl a un’kɔɔn, wɛɛ ungyɛl a kab a ngway. 15 Ininà abun? Nkye bi ikyer man’be naa ntɔn bi bàfàkal anki ungyɛl a un’kɔɔn, wɛɛ ungyɛl a kab a ngway? Kà abwɛy anki! 16 Nkye bɛ làyöb anki naa kya bɛ làsàkal uboo a isal a mbuur asànaa asɔ ntɔn mukun’kyey, bɛ làbà asɔ a mbuur wa làkakyeyà bɛ wà? Itàkal isɔ a man’be ifàsyen kà ukwà, itàkal isɔ a nkyeey ifàsyen u balàbal? 17 Wɛɛ bi bàfuur an’tɔɔn akà Nzam: kusà bɛ làkäl asɔ a man’be, wɛɛ apanà, bɛ làkyàkyey u mpem abɛ wanswà an’lɔɔŋ a kiin amà bàlapɛ. 18 Abun, bɛ làkyàlwomà ungyɛl a man’be, waa lan’bulà asɔ a balàbal. 19 Mɛ in’tɛɛnà unsà imbuur, ntɔn bɛ sye làbà baar. Ntɔn, asànaa làpɛ bɛ itiir a ndür asànaa asɔ unsà isal a mbiin anà kyàlingyoomà abyà ifàsyɛn mutɔn Nzam, abun sye, làpɛ bya apanà ntɔn bya ibulà ungyɛl a isɔ a balàbal alà làfàsyen kà un’kyɛɛl. 20 Umpal làkäl bɛ asɔ a man’be, bɛ làkäl nsaay kusà a balàbal. 21 Bɛ bweel nà làwɛl? Ŋàbawà bɛ làbà u nswɛn, ntɔn ntsüü a ma ukwà. 22 Wɛɛ apan bɛ làkyàlwomà ungyɛl a isɔ a man’be anà làkyàbulà asɔ a Nzam, bɛ lan’wal bweel làfasyɛn kà un’kyɛɛl, waa ntsüü a ya, yà mɔ̈ɔ̈ a mbul a in’tye. 23 Ntɔn làfur a man’be là ukwà, wɛɛ kab a ngway a Nzam là mɔ̈ɔ̈ a mbul a in’tye amu Mwol abi Klistɔ Yɛsu.