Marcos 3

Che Yesu akunnamya mundu jwapombotele nkono

1 Nipele Che Yesu ŵajinjile sooni mu nyuumba ja kusimanilana Ŵayahudi ni mmomo mwaliji ni mundu jwapombotele nkono. 2 Ŵandu ŵampepe ŵaliji nkusosa ligongo lya kwakamulila Che Yesu. Nipele ŵaliji nkunnolechesya panepa chanlamye mundu jo pa Lyuŵa lya Kupumulila. 3 Che Yesu ŵansalile mundu jwapombotele nkono jula, "Njise paujo." 4 Nipele Che Yesu ŵausisye, "Ana ili yambone pa Lyuŵa lya Kupumulila kuitendekanya yambone pane yangalumbana? Kukulupusya pane kuulaga?"

Nambo ŵanyawo ŵamyalele. 5 Che Yesu ŵalolechesye wose kwa lutumbilo, ni ŵasupwiche ligongo mitima jao jaliji jekakatime. Nipele ŵansalile mundu jula, "Njongole nkono wenu!" Nombejo ŵaujongwele, ni nkono wao walamile.