1 SAMUEL 19

11 Saul nynh David kha awkhua khe chia lan paccyn zah, David kha ngaw khylan a inn langkhe locceihtu hae kha a sawnua hae. David zu Mikhal nynh amaw kha, "Atu khuazi kya na hiinnaw kha na khumku khyh ze, awkhualan tuh chia na thua cih," a cipya.✝19.11: Sam 59 (Abyalu) 12 Tukeiccuze Mikhal nynh David kha thanlan-aw kyate rungsah bung zah, aning tuh ccue zah a lue. 13 Mikhal nynh zohtuh ccangkheit kha lah zah a ikhung vawlan a nung; miaa ming te kuakuhpaw boei te a lu kha bong zah boei a thy. 14 Saul nynh David ko lan locceihtu hae kha he a saw hae tuh, Mikhal nynh, "David a ccih," a cipya hae. 15 Saul nynh David do khylan locceihtu hae kha saw hae zah, "Aning kha ka chia ccaw, ikhung ryte ka kalan oun cciakhae oh," a cipya hae. 16 Locceihtu hae nynh he a tee hae tuh, miaa ming te kuakuhpaw boei te a lu bong hae paw zohtuh tuh ikhung vawlan khe a la um. 17 Saul nynh Mikhal kha, "Pawccemou hynhte nae ling zah, ka rhawpaw tuh a lue ccaw cite na cciasah?" a cipya. Mikhal nynh Saul kha, "Aning nynh kae kha, ‘Yn ccia sah, tuhkhyhze nang kha kae theih cih,’ yn ci," cite a hopya.

Ramah kya David te Samuel

18 Tuhcite David tuh ccue zah a lue; Ramah khua umpaw Samuel kalan cceih zah, Saul nynh a tungvaw a cyipaw balyn kha a hopya. Aning te Samuel tuh cceih hae zah Naioth khua kya a um hae.