1 Hezekiah tuh kum kuin lae pangaw acih te, ram kha uk takaw zah Jerusalem kya kum kuin lae takua a uk. A nung tuh Abijah cikuh zah Zekhariah ccanung nynh thua. 2 A minpaaw David nynh a la cyi hawte, Bawipaw muihnaw kya ahmepaw kha a cyi.

3 Ram a uknaw masaty kum, masaty sawpaw khe, Bawipaw inn thuakaw hae kha hung zah a raethui hae. 4 Ranpibawi hae te Levi phin hae kha cciakhae hae zah nithua lang e voidu lungkhu khe pum hae zah, 5 minmin kyakhe, "Levi phin hae, ka bya hynh thaetua oh! Naemaw toulou kha thyaasakuh oh lah, nae minpaaw hae Pachia, Bawipaw inn kha thyaasah oh, athyaapaw hmin kyate athupaw kha vua oh. 6 Pawccecize ah minpaaw hae tuh lungzinaw hoi khyh hae zah Bawipaw ah Pachia muihnaw kya hoyleinaw kha a rae vae hae; amaw kha vua hae zah mih mae kha Bawipaw umnaw kyate ccanglang hawi hae zah mih nulang a sangsah vae hae. 7 Beikinn tee takawnaw e thuakaw hae kha khaw hae zah maeekhua hae kha a the hae, athyaapaw hmin kya Israel Pachia kalan mynkhuhpaw kha u khyh hae zah maee-ute silawnaw mah rae khyh hae. 8 Tukeiccuze Bawipaw thinrianaw tuh Judah te Jerusalem tungvaw ccah zah, nae mit te na muih vae oh hawte, huapaw lang, ngaeangthuapaw lang te saryanaw roi sawnuapaw lang a rae vae hae. 9 Tukeiccuze e hanlan hynh ah paaw hae tuh thaloi te chih hae zah, ah ccapaw hae, ah ccanung hae te ah zu hae tuh kyng hae zah a cciakhae hae. 10 Atu tuh a thinrianaw myarya lepaw kha aening kyate ccanglang a maeku nawlan, Bawipaw , Israel Pachia ryte byakinnaw rae lan ka thinlung kya a um. 11 Ka ccapaw hae, atu tuh sawphahkute um nan vae oh, pawccecize Bawipaw nynh nanning kha amaw malang thadyn lan, amaw ryalawpya lan, a ryalahtu lang tang lan te amaw kalan mynkhuhpaw u lan ae po vae oh," a cipya hae.

12 Tetuh Levi phin hae tuh a thokuh hae, Kohath ciihan hae kyate Amasai ccapaw Mahath, Azariah ccapaw Joel; Merari ciihan hae kyate Abdi ccapaw Kish, Jehallelel ccapaw Azariah; Gershon ciihan hae kyate Zimmah ccapaw Joah, Joah ccapaw Eden; 13 Elizafan ciihan hae kyate Shimri te Jeuel; Asaf ciihan hae kyate Zekhariah te Mattaniah; 14 Heman ciihan hae kyate Jehuel te Shimei; Jeduthun ciihan hae kyate Shemaiah te Uzziel. 15 Mih uno hae kha pum hae zah mimaw te mimaw a thyaasaku hae, te Bawipaw bya thyhte, siapharan nynh kaw a pya hae hawte, Bawipaw inn kha thyaasah khylan a tee hae. 16 Ranpibawi hae tuh Bawipaw inn kha thyaasah khylan a lungkhu lang tee hae zah, Bawipaw beikinn lungkhu a muih hae paw athyaa leipaw uccaw balyn kha Bawipaw inn voidu kalan a poukhae hae; te Levi phin hae nynh lah hae zah Kidron Vaw lang a cciakhae hae. 17 Masaty sawpaw, nin kheit nin khe thyaasahnaw kha tho hae zah tuh-e sawpaw nin tarya nin khe Bawipaw inn tee takawnaw khaan kya a thua hae; nin tarya lungkhu Bawipaw inn kha thyaasah hae zah, masaty sawpaw nin haw lae taruh nin khe a lyn hae. 18 Te Hezekiah Siapharan kalan tee hae zah, "Bawipaw inn kha abalynte, maee-ute silawnawpaw silawhang te a angphe hae balyn, nungpyapaw sanlou nungnawpaw ccaboi te a angphe hae balyn kha kae thyaasah vae. 19 Ahaz Siapharan nynh lungzinaw hoi leite a uk lyaze a vuapaw angphe balyn kha kae paccyn zah kae thyaasah vae; dotua, Bawipaw silawhang malang a um hae," cite a hopya hae.

20 Te Hezekiah Siapharan tuh awkhua takaw te tho zah khua lungkhu e bawi hae kha pum hae zah Bawipaw inn lang a cceihthung. 21 Ram hanlan, beikinnthyaa hanlan te Judah hanlan seithyaanaw silawnaw kha rae nawlan tangnuapaw sa sari, tuutepaw sa sari, tuutaw sa sari te miaatepaw sa sari kha a cciakhae hae. Aaron ciihan hae ranpibawi hae kha Bawipaw silawhang vawlan silawnaw rae lan kaw a pya hae. 22 Tukeiccuze tangnuapaw hae kha theih hae zah ranpibawi hae nynh achii kha lah hae zah silawhang kha a thei hae; tuutepaw hae kha theih hae zah mih chii khate silawhang kha a thei hae; tuutaw hae kha mah theih hae zah mih chii khate silawhang kha a thei hae. 23 Te seithyaanaw silawnaw lanpaw miaatepaw hae kha siapharan te ccungccaw zapi hae kalan a cciakhae hae; mih kuih kha tuh-e hae vawlan a khang hae, 24 te ranpibawi hae nynh tuh-e miaatepaw hae kha theih hae zah mih chii khate Israel hae balyn hanlan seingaethyanaw rae khylan silawhang vawlan khe seishawnaw kha a rae hae. 25 David te a profeh Gad te profeh Nathan nynh kaw a pya hae thyhte, lanchi, tintang te tang-oi a khua hae paw Levi phin hae kha Bawipaw inn kya a nung hae, pawccecize Bawipaw kyate kawbya tuh a profeh hae kha mangte yn thua. 26 Levi phin hae tuh David kya-e khuakupaw uccaw hae kha ccyngkute thadyn hae zah ranpibawi hae tuh mungkae hae kha ccyngkute a thadyn hae. 27 Tetuh Hezekiah nynh silawhang vawlan khe maee-ute silawnaw rae lan kaw a pya hae. Maee-ute silawnaw kha he a rae takaw hae te, Bawipaw kalan hlawsahnaw kha tho hae zah mungkae tu biate, Israel siapharan David kya-e khuakupaw uccaw hae kha a khuaku bia hae. 28 Ccungccaw zapi balyn nynh a beik hae, hlawsahtu hae nynh hlawsah hae zah mungkae tu hae paw nynh mungkae a tu hae; e hae balyn hynh maee-ute silawnaw athang mawlaezung po a cyi hae. 29 Silawnaw he athang te, siapharan te a kya um hae paw balyn nynh bakhung hae zah a beik hae. 30 Hezekiah Siapharan te bawi hae nynh Levi phin hae kha David bya te profeh Asaf bya khate Bawipaw kalan hlawsahte thehoysah lan kaw a pya hae. Lungpawte thehoysahnaw hlaw kha sah biate bakhung hae zah a beik hae.

31 Te Hezekiah nynh, "Bawipaw kalan nanning nynh atu na thyaasaku vae oh; rang oh lah, silawnawpaw hae te lungtuanaw silawnawpaw hae kha Bawipaw inn lang oun thuakhae oh," a cipya hae. Ccungccaw zapi hae nynh silawnawpaw hae te lungtuanaw silawnawpaw hae kha a thuakhae hae; mih lungthopaw balyn nynh maee-ute silawnawpaw kha a thuakhae hae. 32 Ccungccaw zapi hae nynh a thuakhae hae paw maee-ute silawnawpaw hae tuh tangnuapaw sung sari, tuutepaw za kheit te tuutaw za ning nynh thua; e hae balyn tuh Bawipaw kalan maee-ute silawnaw lanpaw nynh thua. 33 Thyaasahpaw silawnawpaw hae tuh tangnuapaw za taruh te tuu thong thum nynh thua. 34 Thuasalama ranpibawi hae tuh eih azya hae keiccuze maee-ute silawnawpaw balyn kha aphua lae kou khyh hae, tukeiccuze ccangpaw ranpibawi hae nynh a thyaasaku mawlaezung hae, mih uno Levi phin hae nynh rya athang makhia a bawm hae—pawccecize Levi phin hae tuh mimaw te mimaw thyaasahkunaw kya ranpibawi hae laeze mih thinlung adinghua. 35 Maee-ute silawnawpaw hae patae apiaze ccawkunaw silawnaw hanlan atho te maee-ute silawnaw hanlan niapaw silawnaw hae kha a um hae. Tuhcite Bawipaw inn e ryalawnaw kha a umsah thui hae. 36 Te Pachia nynh ccungccaw hae hanlan a cyipya hae keiccuze Hezekiah te ccungccaw balyn tuh mih lungpaw; pawccecize tuh-e ryalaw tuh arangte acyihkuh.