1 Manasseh tuh kum haw lae ning acih te, ram kha uk takaw zah, Jerusalem kyate sung pangaw kum pangaw a uk. A nung min tuh Hefzibah acikuh. 2 Bawipaw nynh Israel hae malang te a dee hae paw minphuin hae nynh a cyi hae paw anungsikuhpaw cyisahnaw kha zuite, aning nynh Bawipaw muihnaw kya hoyleinaw kha a rae.✝ 3 A paaw Hezekiah nynh a la ropaw ahangpaw hmin hae kha a raethui; Israel siapharan Ahab nynh a cyi hawte Baal elang silawhang hae kha raepah zah Asherah kha mah a rae, vaawlui kya umpaw uccaw hae balyn kha beik zah rya a lawpya hae. 4 Bawipaw nynh, "Jerusalem khua kya ka min kha ka nung cih," cite a la ci nuathepaw Bawipaw inn kyakhe silawhang hae kha a rae.✝ 5 Bawipaw inn voidu ccangning kyakhe vaawlui kya umpaw uccaw hae balyn hanlan silawhang hae kha a rae. 6 A ccapaw kha silaw nawlan maee te a u; beidinhonaw te kuihdokunaw kha mang zah, chihiinleihthya hae paw te mitleihthya hae paw kha mah a mang hae. Bawipaw muihnaw kya hoyleinaw patae kha rae zah a thin a riasah. 7,8 Bawipaw nynh David te a ccapaw Solomon kyakhe, "E inn kya thuasah, Israel phin hae balyn kyate ka popaw Jerusalem khua kya thuasah ka min kha zungzae ka tynsah cih; kaw ka pya hae paw balyn thyhte thuasah, ka ryalahtu Moses nynh kaw a pya hae paw kawbya balyn thyhte thuasah minmin nynh raeringkute a cyi hae zetuh, mih minpaaw hae ka pya hae paw ram kyate mih ccu kha ccanglang ka cciasah sei vae lan khyh," cite a hopyanaw hae inn lungkhu khe amaw nynh karouhte azuh soi zah a raepaw Asherah zohtuh kha a nung.✝ 9 Minmin nynh a bya ngae khyh hae; Israel ccungccaw hae malang te Bawipaw nynh a ro hae paw minphuin hae nynh a la cyi hae paw laeze hoyleinaw kha houh rae khylan Manasseh nynh a cciakhaesei hae.

10 Bawipaw nynh a ryalahtu profeh hae kyate ho zah, 11 "Judah siapharan Manasseh nynh hynh-e anungsikuhpaw hae hynh cyih zah, aning mawze a la um hae paw Amor hae nynh a cyi hae paw balyn laeze hoyleinaw kha houh rae zah, a zohtuh hae khate Judah hae kha mah seinaw a raesah hae; 12 tukeiccuze Bawipaw , Israel Pachia nynh hynhte a ho, a thaepaw miakaw a nakaring kya ringtering lan accae cih paw hoyleinaw kha Jerusalem te Judah tungvaw kya ka thuasah cih. 13 Jerusalem luki te Samaria tounawpaw rui te Ahab ciihan tounawpaw rui kha ka raw cih; lukhakheit nynh pake kha huh zah a bunglung hawte Jerusalem kha ka bunglung cih. 14 A laehypaw ka rho ccungccaw hae kha ka vua cih hae zah mih rhaw hae kuih kalan ka pya cih hae; minmin tuh mih rhaw hae balyn hanlan teipaw saw te luadepaw uccaw lang a tang cih hae, 15 pawccecize Izip ram kyate mih minpaaw hae a pou nin hae te atunin cia ka muihnaw kya hoyleinaw kha rae hae zah ka thin yn riasah hae," a ci.

16 Tuhpiaze Manasseh nynh Judah hae kha seinaw a raesah hae keiccuze Bawipaw muihnaw kya seinaw a rae hae, tuh-e amaw a seinaw apiaze, seinaw a hoi lei hae paw chiise patae kha luasah zah, Jerusalem khua voikheit langte voikheit lang adianaw cia tuh-e chiise te a biasah.

17 Tuhlaepaw Manasseh nynh rya a lawpaw, a cyipaw balyn te seinaw a la raepaw kha Judah Siapharan hae Sherianaw Ccauh kya a zei hae. 18 Manasseh tuh a minpaaw hae ryte ih hae zah, Uzza khokhu lungkhu, amaw khokhu kyakhe a uu hae. A ccapaw Amon nynh amaw ccelang siapharan lang a tang.

19 Amon tuh kum kuin lae ning acih te, ram kha uk takaw zah, Jerusalem khua kya kum ning a uk. A nung min tuh Meshullemeth cikuh zah Jotbah khuapaw Haruz ccanung nynh thua. 20 A paaw Manasseh nynh a la rae hawte Bawipaw muihnaw kya hoyleinaw kha a rae. 21 A paaw nynh a zuipaw laanpi balyn kha a zui, a paaw nynh rya a la lawpya hae paw zohtuh hae kha ryalawpah hae zah a beik hae; 22 Bawipaw , a minpaaw hae Pachia kha vua zah Bawipaw laanpi kha zui khyh. 23 Amon tuh amaw a ryalahtu hae nynh phee hae zah a inn kya a chia hae. 24 Thuasalama ramccungccaw hae balyn nynh Siapharan Amon a pheetu hae kha theih hae zah, a ccapaw Josiah kha amaw ccelang siapharan lang a khang hae. 25 Tuhlaepaw Amon nynh rya a lawpaw kha Judah Siapharan hae Sherianaw Ccauh kya a zei hae. 26 Amon kha Uzza khokhu umpaw amaw shawku kya a uu hae; a ccapaw Josiah nynh amaw ccelang siapharan lang a tang.