1 Saul a chih koute, David nynh Amalek hae kha tae hae zah he yn ki te, David tuh Ziklag khua kya nin ning a um. 2 Nin thumnaw nin khe, ccungccapaw lu kheit tuh a boeining seiikute, a lu vawlan vuiping phingkute Saul a ryahmin kyate yn thua. David kya he a thua te, laekhu kya bakhung zah sawtuanaw a pya. 3 David nynh amaw kha, "Tei langte mou nae thua?" cite a khia. Aning nynh, "Israel hae ryahmin kyate nynh kae ccue," a cipya. 4 David nynh amaw kha, "Pawtemou athua? Yn hopya tua!" a cipya. Aning nynh, "Israel rhawkaw hae tuh rhawtuknaw kyate a ccue hae, rhawkaw patae tuh khuliakuh hae zah a chih hae; Saul te a ccapaw Jonathan mah a chih hae," a cipya. 5 David nynh a hopahtupaw ccangvaepaw kyakhe, "Saul te a ccapaw Jonathan a chi hae paw tuh pawtemou na ny?" cite a khia. 6 A hopahtupaw ccangvaepaw nynh, "Gilboa Mua vawlan ka la um lyate tungkuh zah, Saul tuh a ccoi kya a ngeiku lyakhe, marangle hae te marang rhawkaw hae tuh a kalan oun naekuh vae hae.✝ 7 Saul nynh a nulang he a do tuh, kae kha yn muih zah yn ko. Kae nynh, ‘E kya mang ka um, bawipaw,’ ka cipya. 8 Aning nynh kae kha, ‘Hummou na thua?’ cite yn khia zah, kae nynh, ‘Amalek paw nynh ka thua,’ cite ka khung. 9 Saul nynh, ‘Rang, ka pe thadyn lah, yn theih; pawccecize vaemaw myarya ccih lan ka mue zah reih-i-reih-ae phang ka hiin ung,’ yn cipya. 10 Tukeiccuze a pe ka thadyn zah ka chia, pawccecize a khuliakuh koute tuh hiin kho vae lan khyh cipaw ka ny. A lu kya umpaw bawilukhung te a kuihnyng kya umpaw khawccan kha ka lah zah, hynhlang ka bawipaw kalan kae thuakhae," a cipya.

11 Tetuh David nynh amaw boeining kha kyng zah a seiiku; a kya um hae paw balyn nynh tuhcite a cyibua hae. 12 Saul, a ccapaw Jonathan, Bawipaw rhawkaw hae te Israel hae tuh thaloi te a chi hae keiccuze minmin elang zete cia rah hae zah looh-ae a sung hae. 13 David nynh a hopahpaw ccangvaepaw kha, "Tei langte mou nae thua?" cite a khia. Aning nynh, "Kae tuh Amalek paw, ramccangpaw ccapaw nynh ka thua," a cipya. 14 David nynh amaw kha, "Bawipaw nynh chitui thuhpaw kha chia khylan na kuih hangnua lanpaw kha na rih khyh tou?" a cipya. 15 Tetuh David nynh ccangvaepaw lu kheit kha ko zah, "Hynhlang yn cceih lah, aning hynh theih," a cipya. Tukeiccuze aning nynh tuh-e paw tuh theih zah a chih. 16 David nynh, "Na chiise tuh na lu vawlan um sah; pawccecize, ‘Bawipaw nynh chitui thuhpaw kha ka chia vae,’ cite namaw mung ccaccei nynh ccaekia a khangku vae," a cipya.

17 David nynh Saul te a ccapaw Jonathan kha hynh-e rawnaw hlaw hynh a phua hae. 18 (Judah hae kyakhe hynh-e hlaw hynh ccangpya athua cih, cite kaw a tho; tuh-e tuh Jashar Ccauh kya zei athua.) David nynh:✝

19 Pou Israel, na phu-enaw kha

ahangpaw na hmin hae

vawlan khe chia athua vae!

Mih thawsae hae paw tuh

phe chih vae hae ccarei!

20 Tuh-e kong tuh Gath khua kya

ho nan oh,

Ashkelon khua laanpi hae kya mah

ho nan oh;

tuhkhyhze tuh Filistin ccanung hae tuh

mih lungpawsei cih,

vingdungawkuh lei hae paw

mih ccanung hae tuh

mih lungtuasei cih.

21 Pou Gilboa mua hae,

nae vawlan kya dangtui

ccah nan sah,

khuaa mah rah nan sah,

looh patae voipaw loo mah

um nan sah!

Pawccecize tuin kyakhe

mih thawsae hae paw kya-e

khawriaphua tuh a nungsikuh vae,

Saul a khawriaphua tuh

chitui thuh thua vae khyh.

22 Chia athuapaw ccungccaw hae

chiise kyate thuasah,

mih thawsae hae paw tho

kyate thuasah,

Jonathan li tuh nulang

ki hang khyh zah,

Saul thaloi tuh a ccakaete

ki hang khyh.

23 Saul te Jonathan,

sungsakuh hae zah

sungsah lan a um hae!

Hiinnaw kya thuasah,

chinaw kya thuasah

phiakuh khyh hae;

minmin tuh mosipi laeze

ranghua hae zah,

chindeih laeze mih thawsaehua.

24 Pou Israel ccanung hae,

Saul hanlan rawtua oh,

aning nynh apuithyapaw

boei sepaw kha

ae zingsah oh zah,

nae boeining kha

ccaannawpaw sui te

ae ccaanpya oh.

25 Mih rawthungpaw

rhawkaw hae tuh

rhawtukku cciamang lya

a khuliakuh vae hae!

Jonathan tuh ahangpaw

na hmin hae kya a chia vae hae.

26 Ka neitaw Jonathan,

nang na hanlan ka ngaethah;

nang tuh myarya kae sungsahpaw nynh

na thua;

nae sungsahnaw tuh

ngaeangthua lan um zah,

nopi hae sungsahnaw po alawe.

27 Mih rawthung hae paw tuh

a chih vae hae,

rhawtuknawpaw zunghe hae tuh

aroh vae hae! a ci.