DANIEL 12

Michi hae Thoothuinaw

1 "Tuh ccyh lyatuin, na minphuin hae thungkhawtu, bawi lepaw Mikhael tuh yn langkuh cih. Minphuin hae a um takaw hae te a um boi leipaw lungriathaenaw ccyh tuh yn thua cih. Thuasalama tuh ccyh lyatuin, ccauh kya a min zei athuapaw na minphuin hae miakaw tuh luesah athua cih hae.✝12.1: Mat 24.21; Mar 13.19; Bya 7.14, 12.7 2 Laenoi kya a ih hae paw patae tuh oun tho cih hae, abang tuh zungzae hiinnaw te a tho cih hae zah, abang tuh maethyanaw te zungzae theihryakunaw khate a tho cih hae.✝12.2: Isa 26.19; Mat 25.46; Joh 5.29 3 Mihaw hae tuh vaawlui a awpaw hawte a aw cih hae zah, ccungccaw patae kha dingnaw kalan a cciakhae hae paw tuh awsi hawte zungzae te zungzae cia a aw cih hae.