1 Oute Moses te Israel hae nynh Bawipaw kha hynh-e hlaw a sahpya hae:✝

Bawipaw hanlan hlaw ka sah cih,

pawccecize Bawipaw nynh

phu-enaw te a tae vae; marang hae te

a ccikuhtu hae kha rili lungkhu lang

phe a vua vae hae.

2 Bawipaw tuh ka thawzung te

ka cyi khonaw thua zah

yn khumtu nynh thua;✝

amaw tuh ka Pachia thua zah

the ka hoysah cih, ka minpaaw hae

Pachia thua zah ka hangthung cih.

3 Bawipaw tuh rhawkaw nynh thua,

a min tuh Bawipaw nynh thua.

4 Faro a marangle hae te

a rhawkaw hae kha

rili lungkhu lang a vua hae;

Faro nynh a po hae paw ryalahtu

bawi hae kha Rili Se kya a phung hae.

5 Akhupaw rili nynh minmin kha

phe a vu hae; akhunaw langkhe

lung hawte a ccah hae.

6 Pou Bawipaw , na ranglang kuih tuh

huhan liate phu-enaw a um.

Pou Bawipaw , na ranglang kuih nynh

rhaw hae kha phe a sakhia hae.

7 Nang ae rawse hae paw kha

alepaw na lesaenaw khate

na khulia hae;

na thinrianaw kha na langsakuh zah

minmin kha maee nynh

athupaw hawte a u hae.

8 Na naduh kyate apoupaw

khisan khate tui kha

na sueluasakuh zah

aluapaw tui kha pang hawte

na thungsaku; rili ngaelung kya

akhupaw tui tuh tangkarae lan a um.

9 Rhaw nynh, ‘Ka deehui cih hae,

ka phah cih hae, minmin kya-e

luapaw uccaw kha neeku lan zah

ka rypaw kha ka lawkuh cih.

Ka thaloi kha ka thuaa cih zah

ka kuih te minmin kha

ka roh cih hae,’ a ci.

10 Na khisan kha na zawsah zah

rili nynh minmin kha pong a vu hae;

minmin tuh athawsaepaw

tui lungkhu khe kue hawte a ccah hae.

11 "Pou Bawipaw , pachia hae lakuze

nang ae lopaw hummou a um?

Nang hawte thyaanaw kya

huhan a hoipaw, lesaenaw kya

ri lan umpaw, ngaeang lan umpaw

uccaw a rae khopaw hummou a um?

12 Na ranglang kuih kha na dyng zah

laephi nynh minmin kha phe a laang hae.

13 Na shawkhaw hae paw

ccungccaw hae kha atynpaw

na sungsahnaw te na cciakhae hae;

minmin kha na thawzung te

athyaapaw na umnaw langkhe

na cciakhae hae.

14 Minphuin hae nynh thae hae zah

a thyngkuh hae; thinphangnaw nynh

Filistia ram um hae paw kha

a thuanua hae.

15 Oute Edom lupi hae tuh

mih thin a phang;

Moab cciakhaetu hae tuh

a thyngku cih hae;

Kanaan hae balyn tuh mih lung a roh.

16 Rinaw te thinphangnaw nynh

mih tungvaw a thuanua hae;

Pou Bawipaw ,

na ccungccaw hae nynh

po a ccia makhia hae,

na shawkhawpaw ccungccaw hae nynh

po a ccia makhia hae,

athawsaepaw na kuih liate minmin tuh

lung hawte daebabi lan a um hae.

17 Pou Bawipaw , na hoipaw mua vawlan,

na um nawlan na raepaw hmin kalan khe

na ccungccaw hae kha na teekhae hae;

Pou Bawipaw , na kuih te

na tynsahpaw beikinnthyaa kyakhe

na nung cih hae.

18 Bawipaw nynh zungzae te

zungzae cia a uk cih," a ci hae.

19 Faro marang hae, a marangle hae, a marangle mawngtu hae tuh rili lungkhu lang tee hae zah Bawipaw nynh rili tui kha minmin vawlan khe tungsakuh zah a luathin hae; thuasalama Israel hae tuh aroupaw laephi vawlan cceih hae zah rili kha a zua hae. 20 Oute Aaron ccianung, profehnung Miriam nynh tyng kha a lawku, te nopi balyn nynh tyng kha khuakute law hae zah Miriam kha a zui hae. 21 Miriam nynh hlawsakhae hae zah,

"Bawipaw nynh phu-enaw te

a tae vae keiccuze Bawipaw kalan

hlawsah oh; marang hae te

a ccikuh hae paw kha

rili lungkhu lang

pong a phung vae hae," a ci.

22 Oute Moses nynh Israel hae kha Rili Se kyate pou lan kawpya hae zah Shur laesia ram khe a tee hae. Tuh-e laesia ram kya nin thum cceih hae zah tui muih khyh hae. 23 Marah kya thua hae zah Marah tui tuh a khya keiccuze neih kho khyh hae. Tukeiccuze tuh-e hmin tuh Marah cite a ko hae. 24 Ccungccaw hae nynh Moses kha, "Pawmou kae neih cih?" cite a ccohnuaku hae. 25 Moses nynh Bawipaw kalan sia zah Bawipaw nynh thing ccangkheit a muihsah; Moses nynh tuh-e thing kha tui lungkhu lang phung zah tui tuh khah vae khyh.

Tuin kyakhe Bawipaw nynh zui lanpaw phungbya te phungzae kha minmin hanlan raepah hae zah syntawtua nawlan a nungpya hae. 26 Bawipaw nynh, "Bawipaw nae Pachia bya kha hoyte na ngae oh zah amaw malang ahmepaw kha na cyi oh ze thuasah, a kawbya hae te a upadi balyn kha na zui oh ze thuasah, Izip hae kya ka thuasahpaw ccinaw kha nanning tungvaw ka thuasah lan khyh; pawccecize kae tuh ae dansah oh paw Bawipaw nynh ka thua," a ci. 27 Oute minmin nynh tuidy haw lae ning te ungcci ku sung sari a umnaw Elim kya thua hae zah tuin kya tui pe khe a rya hae.