1 Rhaw ka vianaw innhangpaw kya

ka thadyn cih zah, atolang e

rhawlungrua vawlan khe ka um cih;

Bawipaw nynh ka lungccing

leinaw konglang kha

ka kalan pawtemou

yn hopya cipaw te

pawtemou bya yn khung cipaw kha

phang ka ngaw cih.

2 Te Bawipaw nynh

kae kha bya yn khungru zah:

Vizin kha zeitua;

a ccuetupaw nynh

a ccue lalia lante a ria kho nawlan,

lungphe kyakhe ccaerarih lan zeitua.

3 Vizin accing ccyh zaw loh khyh,

tuh-e vizin nynh athangnaw ccyh kha

ho zah, hyn khyh.

Tuh-e vizin tuh accyh aro ung cih paw

alo lanze ngaw hin;

soleite accing cih,

accyh ro vae lan khyh.✝

4 A lysakuh hae paw kha dotua hae!

Mih thinlung tuh ding khyh,

thuasalama miding hae tuh

mih zynnaw liate a hiin hae.✝

5 Hoirumnaw tuh ling a mang;

a lysakuhpaw tuh tyn khyh,

mih lotharue kha Michi khua hawte

kobalae lan a aw hae;

Chinaw hawte azaw vae ci um boi khyh;

minphuin hae balyn kha

mimaw hanlan suelua hae zah,

ccungccaw balyn kha

mimaw kalan a pum hae.

6 Taepaw ccungccaw hae nynh

a taetu hae paw kha

saryanawpaw kesihkesahpaw bya khate,

"Nae uccaw athua leipaw kha

a ccakhungkuh hae paw

nanning hanlan ngaethya lan kou um!"

cite a theihrya cih hae zawtou?

Hohseciamou naemaw toulou kha

na law oh paw laebah khate

nae phupaw na risakuh ung cih oh?

7 Laebah ae ungsah oh paw tuh

palou oun thua lan khyh hae tou?

Nanning ae thyngsakuh oh paw tuh

oun thokuh lan khyh hae tou?

Tetuh nanning tuh minmin nynh

luadete a lawku hae paw lang

na tang vae cih oh.

8 Nanning nynh minphuin patae kha

na luade oh keiccuze,

a hiinhypaw ccungccaw hae nynh

nanning kha ae luade ru cih oh—

ccungccaw na chia oh keiccu thuasah,

laephi vaw e ccungccaw hae,

khuapi hae te tuin kya

um hae paw balyn tungvaw kya

puathote rya na law

oh keiccu thuasah ae luade ru cih.

9 "Vawsawnaw nynh a phya

khonaw kyate lue khylan

nae bu kha ahangnaw kya

raekute nae innbyn hanlan ahme lei lante

uccaw a mue hae paw

nanning hanlan ngaethya lan kou um!"

10 Nanning nynh ccungccaw patae

kha chiate nae innbyn kha

maethyasah lan na paccyn vae oh;

nae hiinnaw kha na zosaku vae oh.

11 Pang thungnawpaw lung nynh heize

pang kyate a sia cih zah,

inn-boeipae nynh a khungru cih.

12 "Chiise luanaw te khua kha na rae oh zah,

hoyleinaw vawlan khe khuapi kha

na thadynsah oh paw nanning hanlan

ngaethya lan kou um!"

13 Ccungccaw hae nynh maeesoi hanlan

thawbangte rya a law hae paw te

minphuin hae nynh accakaepaw hanlan

mih thaw a bangsaku hae paw kha

Vaaw Bawipaw nynh

a cyipaw thua khyh tou?

14 Thuasalama rili tuh tui te phe abia hawte,

laephi tuh Bawipaw phu-enaw

nythyanaw khate phe abeih cih.✝

15 "Mih ccakaete a um hae paw

nae innpaw hae kha do khylan,

a rui makhia hae ruithyapaw kha

na bu oh zah, na niasah oh paw

nanning hanlan ngaethya lan kou um!"

16 Nanning tuh phu-enaw te

thua leite thethyanaw khate

phe na byn cih oh,

Naemaw mah neih oh lah,

tangkitangkae lante cceih oh!

Bawipaw kuih kya umpaw

detahnaw banang nynh

nanning kha ae koihlu cih oh zah,

nae phu-enaw tuh

maethyanaw lang a tang cih!

17 Lebanon tungvaw puathote

rya na law oh paw kha nynh

naemaw kha ae roh cih oh;

sarangpaw hae na chia oh,

atu tuh sarangpaw hae nynh

naemaw kha nae thin ae phangsah cih oh,

ccungccaw na chia oh keiccu thuasah,

laephi vaw e ccungccaw hae,

khuapi hae te tuin kya

um hae paw balyn tungvaw kya

puathote rya na law oh keiccu thuasah

nae thin ae phangsah cih oh.

18 A raetupaw nynh a raepaw zohtuh tuh

pawmou a thane?

Laeepaw zohtuh, ling sazaepaw tuh

pawmou a thane?

Bya san a ho kho leipaw

zohtuh sasaw mang athua pite,

zohtuh a raetupaw nynh

khah-e zohtuh kha a doliaku!

19 Thingtung kha, "Inaw kyate

tho ccavae!" cite hopah hae zah,

yccae leipaw lungtung kha,

"Thoku tua!" cite a hopahpaw

nanning hanlan ngaethya lan kou um.

Zohtuh nynh ae ccangpah kho tou?

Zohtuh tuh sui te ngun khate

raedepaw thua zah, a lungkhu kya

hiinnaw papin um khyh.

20 Bawipaw tuh athyaapaw

a beikinn kya a um;

laephi ccungccaw balyn nynh

amaw malang daebabi lan um hae sah!