1 Tuin nin te tuin ccyh kyakhe, Judah te Jerusalem kha hoynaw he ka pyathui hae te, 2 minphuin hae balyn kha ka suelua cih hae zah Jehoshafat accya langkhe ka cciakhae bung cih hae; tuin kyakhe minmin kha bya ka pia cih hae, pawccecize minmin nynh ka ccungccaw hae te ka rho Israel kha minphuin hae laku kya phiariphiarae a nung hae. Ka ram kha neekuh hae zah, 3 ka ccungccaw hae kha see lang lawku lanpaw kong kha ccungthy a dung hae, pise taraw hae kha ohhuakunaw khate rulaekuh hae zah, nopi taraw hae kha misutui lang a zuaku hae, te a nia hae.

4 Pou Tair khua, Sidon khua te Filistia ram hae balyn, nanning tuh kae ka hanlan pawmou na thua oh? Kae kha nae liaru cih oh tou? Kae kha nae liaru oh ze, nae cyisahnaw kha naemaw lu vawlan palou ka khangru cih.✝ 5 Pawccecize ka sui te ka ngun kha na lawku oh, ka sisua patae kha nae beikinn lang na phuku oh. 6 Judah hae te Jerusalem khuaccaaw hae kha mih ram kyate asawnaw lang na cciakhae oh zah, Grik hae kalan na zuaku oh. 7 Thuasalama atu tuh, minmin na zuanaw oh hmin hae kha cciataw khylan ka tuhou cih hae zah, nae cyisahnaw kha naemaw lu vawlan ka khangru cih. 8 Nae ccanung hae te nae ccapaw hae kha Judah hae kuih kalan ka zua cih hae zah, minmin nynh asawnaw umpaw minphuin, Seba hae kalan a zua cih hae; pawccecize Bawipaw nynh a ho vae.

9 E bya hynh minphuin hae kalan thaesah hae:

Rhawtuk lan paccynkuh,

rhawkaw hae kha

lungthobya hopah oh.

Rhawkaw hae balyn tuh

oun naekuh hae sah lah,

oun cceihthung hae sah.

10 Nae tamuin hae kha

thaloi lang suhkuh oh lah,

nae rungkou hae kha

ccoi lang suhkuh oh;✝

a thawzyapaw nynh,

"Kae tuh ka thawsae," cite ho sah.

11 Po voilu lan um hae paw

minphuin hae balyn,

arangte oun cceih oh lah,

tuh-e accya kyakhe sueluakuh oh.

Pou Bawipaw , na rhawkaw hae kha

beih yn saw hae.

12 Minphuin hae tuh

thokuh hae sah lah,

Jehoshafat accya kalan

cceihthung hae sah;

pawccecize a pepan e

minphuin hae balyn kha

byapia khylan tuin kya ka haung cih.

13 Loohrue lanpaw tuh

avoi vae keiccuze

rungkou kha lawku tua.✝

Misu mianaw khu tuh

phe abia vae keiccuze

cceih oh lah, sutua oh.

Mih hoyleinaw tuh

myarya ale keiccuze

misu mianaw khu tuh

aleikuh vae.

14 Byapaenaw accya kya

ccungccaw zapi,

ccungccaw pataepi a um hae,

pawccecize byapaenaw accya kya

Bawipaw nin tuh anae vae.

15 Khuanin te sawpaw tuh

moh hae zah,

awsi hae tuh aw vae khyh hae.

16 Bawipaw tuh Zion kyate sia zah,

Jerusalem kyate a roi a saw,

vaaw te lae tuh a thyngkuh hae.✝

Thuasalama Bawipaw tuh

a ccungccaw hae hanlan

khynnaw thua zah,

Israel ccungccaw hae hanlan

rhawlungrua nynh thua.

17 Tetuh nang nynh athyaapaw

ka mua, Zion kya ka umpaw,

kae, Bawipaw na Pachia kha

nae nyh vae cih.

Jerusalem tuh athyaa cih zah,

khua lungkhu kya

ramccang hae nynh papinmaw

bua cceih vae lan khyh hae.

18 Tuin nin vae tuh

mua hae kyate a-epaw

misutui abya cih zah,

sangpyng hae kyate

mateitui alua cih,

Judah ram e vawkhu hae balyn tuh

tui alua cih; Bawipaw inn kyate

tuidy apou cih zah,

Shittim Accya kha tui a ciasah cih.

19 Izip ram tuh ccungccaw

adaepaw lang a tang cih zah,

Edom ram tuh ccungccaw adaepaw

ramkaw lang a tang cih,

pawccecize Judah hae tungvaw kya

puathote ryalah hae zah,

ram pynpi kya a sei leipaw

chiise kha a luasah hae.

20 Thuasalama Judah ram kya

ccungccaw a um zungzae cih zah,

Jerusalem kya she takyh

ccungccaw a um vae cih.

21 Mih chiise mee kha

phu ka lah cih hae zah,

mih seinaw kha ka thyaasah lan khyh hae,

pawccecize Bawipaw tuh

Zion kya a um.