Mateus 25

Liaccaw Lu Haw Tousenaw

1 "Vaawlang peenaw tuh zudy ccangvaepaw kha cciadue lan mih maeekhua kha ccyngkuh hae zah a cceih hae paw liaccaw lu haw te nynh aloku.✝25.1: Luk 12.35 2 Minmin kyaze lu pangaw tuh haw hae zah lu pangaw tuh a ngaee hae. 3 A ngaee hae paw nynh mih maeekhua kha ccyngkuh hae zah zine ccyngku bia khyh hae. 4 Thuasalama a haw hae paw nynh mih maeekhua ryte abawng kya zine kha a ccyngku bia hae. 5 Zudy ccangvaepaw tuh khaw yn ro keiccuze minmin balyn tuh mih ngawthua zah a ihtheih hae. 6 Ziraccyng khe, ‘Dotua oh! Zudy ccangvaepaw yn thua vae; amaw kha cciadue khylan oun toikuh ccavae oh,’ cite roi accae. 7 Tetuh tuh-e liaccaw hae balyn tuh tho hae zah mih maeekhua kha a paccynku hae. 8 A ngaee hae paw nynh a haw hae paw kha, ‘Nae zine abang kha oun pyabua oh, pawccecize kae maeekhua tuh achih vae cih,’ a cipya hae. 9 Thuasalama a haw hae paw nynh, ‘Tuhte thua khyh! Kae hanlan te nae hanlan zaw lan khyh, a zua hae paw kalan la cceih oh lah la rekuh oh,’ a cipya hae. 10 Te minmin nynh zine reku lan a ccia lya hae khe, zudy ccangvaepaw tuh yn thua vae; paccynkute um hae paw tuh amaw ryte zudy poi kalan tee hae zah thuakaw kha phe a khaw vae hae. 11 Tukoute ccangpaw liaccaw hae tuh mah oun thua hae zah, ‘Bawipaw, bawipaw, kaening mah oun hungpah bua!’ a ci hae.✝25.11-12: Luk 13.25 12 Thuasalama aning nynh, ‘Byaccaccing kae hopya oh, nanning kha kae nyh khyh oh,’ cite a khung hae. 13 Tukeiccuze nanning nynh Ccungccaw Ccapaw yn thuanaw lanpaw nin te ccyh kha na ny khyh oh keiccuze phang la ngaw oh.