Mateus 26

Jesu Chia lan Pheenaw

1 Jesu nynh e bya hae balyn hynh a ho koute a zuitu hae kha, 2 "Nin ning koute Kawtaw Poi a um cih cipaw na ny oh, Ccungccaw Ccapaw tuh vaelantung kya khiade khylan ap athua cih," a cipya hae.✝26.2: Exo 12.1-27

3 Tetuh ranpibawi lepaw hae te piccan hae tuh Kaiafas a ci hae paw ranpibawi lupi inn kya oun tungkuh hae zah, 4 Jesu kha aruh lante kyng lan zah chia lan cite khua a khanku hae. 5 Thuasalama, "Ccungccaw hae oun pokuh sei cih hae, poi nin tuh chia lei lan," a ci hae.

Bethani kya Zimuin A Thuh hae

6 Jesu tuh Bethani khua kya vaethyakaepaw Simon inn kya a um lyakhe, 7 nopinung lu kheit nynh myarya amee rupaw zimuin alabasta lung rawpaw bu kheit kha Jesu kalan yn ccyng zah ae lan cite a haung lyakhe a lu kya a bu.✝26.7: Luk 7.37-38 8 A zuitu hae nynh a muih hae tuh mih thinria zah, "Pawccemou e hynh alakaw lan a tangsah han? 9 Pawccecize e zimuin hynh phua patae lang zuate ryachi hae kha pya lanpaw," a ci hae. 10 Tuh-e tuh Jesu nynh he a nyh tuh minmin kha, "Pawccemou nopinung kha vawsaw na pya oh? Aning nynh ka tungvaw ahoypaw rya kha a law vae. 11 Pawccecize ryachi hae tuh nae kya zungzae a um hae, thuasalama kae tuh nae kya zungzae ka um lan khyh.✝26.11: Deu 15.11 12 Pawccecize ka pyn kya hynh-e zimuin yn bupaw tuh ka rhua ccynaw elang a paccynpaw nynh thua. 13 Byaccaccing kae hopya oh, laephi pynpi kya hynh-e thehoypaw a honaw hae miakaw kya hynh-e nopinung nynh a cyipaw hynh amaw liathui nawlan hobia athua cih," a cipya hae.

Judas Iskariot nynh A Nawccaw

14 Zuitu lu haw lae ning kyaze lu kheit athuapaw, Judas Iskariot a ci hae paw nynh ranpibawi lepaw hae kalan cceih zah, 15 "Jesu kha nae kalan kae ap oh ze pawmou nae pya cih oh?" cite a khia hae. Minmin nynh ngunphua sung thum kha ria hae zah a pya hae.✝26.15: Zek 11.12 16 Tuin ccyh kyate Judas nynh Jesu phee lanpaw ccyhhoy kha a ccung vae.

Bawipaw Zerya

17 Ransi phing leipaw Sanlou Poi masaty nin khe zuitu hae nynh Jesu kalan oun cceih hae zah, "Kawtaw Poi na ae nawlan pawkyamou kae la paccynpah cih?" cite a khia hae. 18 Jesu nynh, "Khua lungkhu lang la cceih oh lah ccungccapaw lu kheit kha, ‘Sazaepaw nynh ka ccyh anae vae, ka zuitu hae ryte na inn kya Kawtaw Poi kae mang cih, a ci,’ cite la hopah oh," a cipya hae. 19 Jesu nynh a hopya hae hawte zuitu hae nynh cyih hae zah Kawtaw Poi zerya kha a paccyn hae.

20 Zete ccyh yn thua te Jesu tuh lu haw lae ning ryte ae lan a haung hae. 21 A ae lya hae khe Jesu nynh, "Byaccaccing kae hopya oh, nanning laku e lu kheit nynh kae hynh yn phee cih," a ci. 22 Tetuh minmin tuh myaryamaw mih ngaethah zah, "Bawipaw, tuh-e paw tuh kae ka thua khyh khaw?" cite lu kheit koute lu kheit nynh a khia hae. 23 Jesu nynh, "Kae te pake kya kae pukheihpaw nynh yn phee cih.✝26.23: Sam 41.9 24 Ccathyaa kya amaw kong azeiku thyhte Ccungccaw Ccapaw tuh a chih cih; thuasalama Ccungccaw Ccapaw a pheetupaw hanlan ngaethya lan kou um! Tuh-e paw tuh a la pui khyh ze amaw hanlan ahoyhua cih paw," a cipya hae. 25 Te amaw a pheetu Judas nynh, "Sazae, kamaw tou ka thua?" a ci. Jesu nynh, "Phe na ho vae latu," a cipya.

26 Zete zerya a mang lya hae khe Jesu nynh sanlou kha lah zah lungtuabya a ho koute eih zah a zuitu hae kha a pya hae; te, "Lawkuh oh lah ae oh, e tuh ka pyn nynh thua," a cipya hae. 27 Tukoute banang kha lah zah lungtuabya a ho koute minmin kha pya hae zah, "Nae balynte e hynh neih oh; 28 pawccecize e tuh ccungccaw patae seingaethyanaw hanlan ka laepaw, byakin thawpaw te asekuhpaw ka chiise nynh thua.✝26.28: Exo 24.8; Jer 31.31-34