1 Levi ccapaw Kohath, Kohath ccapaw Izhar, Izhar ccapaw Korah, te Eliab ccapaw hae Dathan te Abiram, te Reuben ciihan Peleth ccapaw On nynh✝ 2 Israel pise hae za ning sung pangaw, zapi cciakhaetu hae, a pumkuh hae paw kya-e popaw ccungccaw hae, a minthaanpaw ccungccaw hae kha a pum hae, te minmin nynh Moses kha a rawse hae. 3 Minmin nynh Moses te Aaron kha rawsete pumnuakuh hae zah, "Myaryamaw na lawe vae oh! Zapi balyn tuh athyaa hae paw cci thua hae zah Bawipaw tuh minmin laku a um. Pawcce nanning nynh Bawipaw kya-e zapi hae luki khe na umsahku oh?" a ci hae. 4 Moses nynh tuh-e bya he a thae tuh, a mae kha a tebaling, 5 Oute Moses nynh Korah te a phu hae kha, "Hummou Bawipaw ccungccaw athua, hummou athyaa cipaw te hummou Bawipaw kalan naeku lan ua athua cipaw kha Bawipaw nynh awkhua khe oun nysah cih; Bawipaw nynh a po cih paw ccungccaw kha amaw kalan naeku lan a ua cih. 6 Korah te a phu hae balyn, e hynh cyih oh: 7 awkhualan pakephepaw hae kha lawkuh oh lah avawlan khe maee khang oh, te Bawipaw malang pakephepaw kyakhe mynkhuhpaw kha nung oh; Bawipaw nynh a popaw tuh athyaapaw ccungccaw athua cih. Levi phin hae nanning, myaryamaw na lawe vae oh!" a cipya hae. 8 Oute Moses nynh Korah kha, "Levi phin hae, atu ngaetua oh! 9 Bawipaw kya-e beikbu ryalaw kha law khylan amaw kalan naeku lan, te zapi hae kha ryalawpya khylan mih malang thadyn lan cite Israel Pachia nynh nanning kha Israel zapi kyate ae phia oh paw hynh nae hanlan myaryamaw adih tou? 10 Nang te na uno Levi phin hae balyn kha amaw kalan naeku khylan Bawipaw nynh ae ua vae oh; tuhzemah ranpibawi lang tangnaw kha mah bua na ccung ung oh! 11 Tukeiccuze nang te na phu hae nynh Bawipaw kha rawsete pynkheihlan na sueluakuh vae oh. Aaron tungvaw na ccohnuaku oh paw hynh Aaron tuh pawmou athua?" a cipya.

12 Moses nynh Eliab ccapaw hae Dathan te Abiram kha a kosah hae; thuasalama minmin nynh, "Kae cceih lan khyh! 13 Kaening hynh ramkaw kya chia khylan mateitui te khoilutui aluanaw ram kyate nae poukhaepaw zah kaening tungvaw bawi lang na tangpaw hynh adihpaw ryalaw athua zawtou? 14 Kaening hynh mateitui te khoilutui aluanaw ram lungkhu lang nae cciakhae lei lanpaw te loo hae te misu khokhu hae kha rho lang nae pya lei lanpaw hynh phe aria. E ccungccaw hae mit hynh na khoi cih hae tou? Kaening kae cceih lan khyh!" a ci hae.

15 Moses tuh myarya a thinria zah Bawipaw kha, "Minmin kya-e silawnaw kha pawlangriapah nan hae. Minmin kyate lann sa kheit sanmah ka lah khyh zah minmin lu kheit sanmah vawsaw ka pya khyh hae," a cipya. 16 Te Moses nynh Korah kha, "Awkhualan nang te na phu hae balyn te Aaron tuh Bawipaw malang na um cih oh; 17 te nanning lu kheit cci nynh nae pakephepaw kha na ccyngkuh cih oh zah tuh-e pake kyakhe mynkhuhpaw kha na nung cih oh, te pakephepaw za ning sung pangaw tuh nanning lu kheit cci nynh nae pakephepaw kha Bawipaw malang na thuakhae cih oh; nang mah thuasah, Aaron mah thuasah nae pakephepaw kha na thuakhae cih oh," a cipya. 18 Tukeiccuze minmin lu kheit cci nynh mih pakephepaw kha ccyngkute maee kha alungkhu khe nung hae zah mynkhuhpaw kha avawlan a khang hae, te tungkunaw bu thuakaw kyakhe Moses ry, Aaron ryte a thadyn hae. 19 Oute Korah nynh minmin kha rawsete zapi balyn kha tungkunaw bu thuakaw kyakhe a pum hae. Te Bawipaw phu-enaw tuh zapi balyn kya a langkuh.

20 Oute Bawipaw nynh Moses te Aaron kha, 21 "Ccyh sohsoh kya minmin kha ka maemih ccaw hae, e zapi kyate nanning phiakuh oh," a cipya hae. 22 Minmin nynh mih mae kha tebaling hae zah, "Pou Pachia, a hiinpaw balyn kya-e muisaw hae Pachia, lu kheit nynh a sei keiccuze zapi balyn tungvaw na thinria cih tou?" a ci hae.

23 Te Bawipaw nynh Moses kha, 24 "Zapi hae kyakhe, Korah, Dathan te Abiram nynh a umnaw hae kyate cceih oh, cite hopah hae," a cipya. 25 Tukeiccuze Moses nynh thokuh zah Dathan te Abiram kalan a cceih; Israel piccan hae nynh amaw kha a zui hae. 26 Moses nynh zapi hae kha, "E ccungccaw hoylei hae bu kyate maeleihkuh oh lah, minmin kya-e pawpaw mah ty nan oh, tuhkhyhze tuh minmin seinaw keiccuze nanning kha ro na thuasei cih oh," a cipya hae. 27 Tukeiccuze minmin tuh Korah, Dathan te Abiram nynh a umnaw hae kyate a cceih hae; te Dathan te Abiram tuh oun pou hae zah mih bu thuakaw kyakhe mih zu hae, mih ccaaw hae te mih ccaaw taraw hae ryte a thadyn hae. 28 Te Moses nynh, "Kamaw lung te ka cyipaw thua leite, e ryalaw balyn hynh law lan Bawipaw nynh kae kha yn saw cipaw hynh-e hynhte na nyh cih oh: 29 E ccungccaw hae hynh phuchi te chih hae zah, ccungccaw balyn nynh teingpaw kha a teing hae zetuh Bawipaw nynh kae kha yn saw khyh. 30 Thuasalama Bawipaw nynh athawpaw ccangkhakheit kha rae zah laephi nynh a khalang awte minmin kha a hoi hae paw balyn ryte po laang hae zah mih hiin pite Hell lungkhu lang a ccaw hae zetuh, e ccungccaw hae nynh Bawipaw kha a theihrya hae cipaw na nyh cih oh," a cipya hae.

31 E bya balyn hynh he a ho kou mawte, mih zakaw e laephi tuh akoi vae. 32 Laephi nynh a khalang aw zah minmin kha mih innbyn hae ryte thuasah, Korah te asekuhpaw ccungccaw miakaw te mih uccaw balyn kha thuasah pong a lang hae. 33 Tukeiccuze minmin tuh a hoi hae paw balyn ryte mih hiin pite Hell lungkhu lang accah hae; laephi nynh minmin kha husung hae zah ccungccaw zapi laku kyate phe azo hae. 34 A sia hae paw roi kha mih pepan umpaw Israel hae nynh he a thae hae tuh a ccue hae, pawccecize, "Laephi nynh aening hynh mah oun laangsei cih!" a ciku hae. 35 Te Bawipaw kyate maee yn pou zah mynkhuhpaw a pya cciamang hae paw ccungccaw za ning sung pangaw kha phe ccung lan a u hae.

36 Oute Bawipaw nynh Moses kha, 37 "Ranpibawi Aaron ccapaw Eleazar nynh maee aruapaw kyate pakephepaw hae kha lahsah lah, maee-e kha pazaesakuh sah. 38 Pawccecize e misei hae hiinnaw azo keiccu vae ze mih pakephepaw hae tuh athyaa vae hae. Pakephepaw hae kha silawhang ahu lante deihpingpaw pake lang raesah, pawccecize minmin nynh khah-e hae kha Bawipaw malang a pya keiccu hae ze, khah-e hae tuh athyaa hae. Tuhcite minmin tuh Israel hae hanlan muihsahnaw athua cih hae cite hopah," a cipya. 39 Tukeiccuze maee kya u athuapaw ccungccaw hae nynh a pya hae paw sohin pakephepaw hae kha ranpibawi Eleazar nynh lah zah silawhang ahu lang a deihping hae. 40 Aaron ciihan athua leipaw atolang e ccungccaw nynh mynkhuhpaw pya khylan Bawipaw malang naekuh zah Korah te a phu hae hawte athua khyh nawlan Bawipaw nynh Moses kyate Eleazar kalan a hopya thyhte tuh-e pakephepaw hae tuh Israel hae hanlan raeringnaw pyatu nynh thua hae.

41 Thuasalama awkhualan khe Israel zapi balyn nynh Moses te Aaron kha rawsete dou hae zah, "Bawipaw ccungccaw hae kha na chia vae oh," a cipya hae. 42 Te zapi hae nynh Moses te Aaron kha rawsete he a pumnuakuh hae tuh, Moses te Aaron nynh tungkunaw bu kalan a hawi hae; maeking nynh khah-e bu kha phang bong zah Bawipaw phu-enaw tuh a langkuh. 43 Oute Moses te Aaron tuh tungkunaw bu malang oun thua hae, 44 te Bawipaw nynh Moses kha, 45 "Zapi hae kha ccyh sohsoh kya ka maemih ccaw hae, e zapi hae kyate pou oh," a cipya. Te minmin nynh mih mae kha a tebaling hae. 46 Moses nynh Aaron kha, "Na pakephepaw kha lawkuh lah, silawhang kyate maee kha lawte avawlan khe mynkhuhpaw kha utua, te khah-e kha zapi hae kalan arangte cciakhae lah, minmin elang seingaethyanaw raepya tua hae. Pawccecize Bawipaw tuh a thinria vae zah shethya atho vae," a cipya. 47 Tukeiccuze Moses nynh kaw a pya thyhte Aaron nynh tuh-e tuh lah zah a pumkunaw hae angaelung langkhe a ccue, shethya tuh tuh-e ccungccaw hae laku phe alangkuh vae. Mynkhuhpaw kha u zah ccungccaw hae hanlan seingaethyanaw kha a raepya hae. 48 Achihpaw te ahiinpaw laku khe a thadyn; te shethya tuh adae vae. 49 Shethya te a chih hae paw tuh, Korah kong keiccu a chih hae paw hobia leite, thong haw lae pali za sari acih hae. 50 Shethya he adae te, Aaron tuh tungkunaw bu thuakaw kya umpaw Moses kalan a ki.