ZEFANIAH 2

Israel Rhaw hae kha Byapianaw

1 Pou maethya nyh lei

hae paw minphuin hae,

sueluakuh oh,

pynkheihlan sueluakuh oh,

2 nanning kha vaekang hawte

ccaring ae mung maw oh,

Bawipaw thinrianaw

myarya ccihpaw tuh

nae tungvaw a thua maw,

Bawipaw thin-unaw nin tuh

nae tungvaw a thua mawkhe,

sueluakuh oh.

3 A kawbya a zui hae paw

ram lungkhu e zakawsangsakuh

hae paw nanning balyn,

Bawipaw kha ccungtua oh;

dingnaw te zakawsangsakunaw kha

ccungtua oh,

Bawipaw thinrianaw nin khe

nanning nynh rekunaw kha poh na muihkuh kho oh.

4 Pawccecize Gaza tuh

poutaw athua cih zah,

Ashkelon tuh ccungccaw

kharouh adaepaw lang a tang cih;

Ashdod khuaccaaw hae tuh

ninthu khe dee athua cih hae zah,

Ekron khua tuh khaleih ro athua cih.✝2.4-7: Isa 14.29-31; Jer 47.1-7; Eze 25.15-17; Joe 3.4-8; Amo 1.6-8; Zek 9.5-7

5 Rili kin um hae paw

Kereth minphuin hae,

nae hanlan ngaethya lan kou um!

Pou Filistin hae ram athuapaw Kanaan,

Bawipaw bya nynh

nang kha ae rawse vae;

ccungccaw lu kheit san

a um lei lan ciate nang kha kae roh cih.

6 Pou rili kin e ram,

nang tuh sahiin rampaeekunaw,

tuurin hae umnaw te

tuukhia lang na tang cih.

7 Rili kin e ram tuh a laehy hae paw

Judah hae ram lang a tang cih,

minmin nynh tuin kya a um cih hae zah,

zete khe Ashkelon khua e

inn hae kya a rya cih hae.

Pawccecize Bawipaw

mih Pachia nynh minmin kha

a oihsah cih hae zah,

mih hiinnaw kha langmaw hawte

a hoysah thui cih.

8 Moab hae te Ammon hae nynh

ka ccungccaw hae kha

theihrya hae zah,

mih ram luade lan

a poonuaku hae paw bya kha

ka thae vae.✝2.8-11: Isa 15.1—16.14, 25.10-12; Jer 48.1—49.6; Eze 21.28-32, 25.1-11; Amo 1.13-15

9 Tukeiccuze vaaw Bawipaw ,

Israel Pachia nynh a hopaw tuh,

kae tuh ka hiin thyhte,

Moab tuh Sodom hawte

athua cih zah, Ammon tuh

Gomorrah hawte athua cih,

hinpaw aponaw ram, loi khu,

te zungzae arohpaw

ram lang a tang cih.

A laehypaw ka ccungccaw hae nynh

minmin kha a thiing cih hae zah,

a hiinhypaw ka minphuin hae nynh

mih ram kha a ccou cih hae.✝2.9: Gen 19.24

10 Minmin nynh vaaw Bawipaw

a ccungccaw hae kha saryate

a poonuaku hae keiccuze

mih lysakunaw hanlan,

e hynh minmin tungvaw

liarunaw nynh thua.

11 Bawipaw nynh minmin kha

myarya a risah cih hae;

laephi vaw e pachia hae balyn kha

ccungkia leipaw lang a rae cih hae,

minphuin ccangpaw hae kya-e

rili kin e ram te

tuikoih hae balyn nynh

mih umnaw raveih kyakhe

amaw kha bakhungnuate

a beik cih hae.

12 Pou Ethiopia ccungccaw hae,

nanning mah ka thaloi te

chia na thua cih oh.✝2.12: Isa 18.1-7

13 Aning nynh thahlang khe

a kuih a dyng cih zah,

Assiria kha a roh cih;

Nineveh kha ramrou hawte

ccungkia leipaw aroupaw,

ccungccaw adaepaw

khua lang a tangsah cih.✝2.13-15: Isa 10.5-34, 14.24-27; Nah 1.1—3.19

14 Khua lungkhu khe sahiin hae te

loramsaw miakaw tuh

a rya cih hae;

ramrou nawnia te lantaw hae tuh

tungpi hae dung khe

a um cih hae; nawnia hae tuh

thanlan-aw hae kya a sia cih hae,

va-aw hae tuh inn atolang

pounaw khe a to cih hae;

pawccecize inn hae kya-e

sidar thing hae tuh

khaleih law athua cih hae.

15 E khuapi tuh amaw te amaw kha,

"Kamaw laelan humhung mah

um vae khyh," cite cikuh zah,

khyndadyh lan umte

a lungtuapaw khua kha athua tou?

Atu arohpaw hmin,

loramsaw hae nynh

a paeenaw hae hmin lang rei

phe a tang vae!

A pe a cceihpaw miakaw nynh

saryanawpaw roisawnua hae zah

mih kuihlung kha a lungnua hae.