10 Milagres de Jesus na Bíblia: Lista com versículos e explicação

Inyegha mukaya ka Kana

1 Bo ghakindapo amasiku mabili ku kaba inyegha mukaya aka Kana mubuyo bwa Galileya. Wepe ung’ina wa Yesu akabako kula kula, 2 sona u Yesu na bamanyili bake bakitisiwa kunyegha yila. 3 Bo ubwalwa bwa mafilu bwamala, ung’ina wa Yesu akamubusya akati, "Ubwalwa bwa mafilu bwamala."

4 U Yesu akamwamula akati, "We mukolo, choni cho ukumbusya sisi. Akabalilo kangu kakali katakwanite." 5 Umayi wa Yesu akababusya aba mbombo bala akati, "Bomba bubu chosi cho akubabusya."

6 Papipi bakabikapo isonda sya mabwe sikisi syo sitakaba namisi, syo aba yuda bakabombelagha pakusukusulila ukuyana nimiteto yabo iyakwiswepesya. Isonda yosi yikayana bubu nindobo fayivi pamo sikisi. 7 U Yesu akababusya aba mbombo bala akati, "Isusya isonda isi na misi." Bakisusya mupaka pamwanya. 8 Po akababusya akati, "Losulu semba amisi mupe usongo uwa lusekelo." Po bakasemba amisi nukumupa, 9 bo u songo wa lusekelo aghonja amisi, gho ghachenja ukuba bwalwa bwa mafilu. Atakamanya ko bukafuma, (loli abambombo bo bakasembelelagha amisi bakasimanya); Po u songo yula akamwitisya umwene nyegha, 10 po akamubusya ukuti, "Mundu wesi pakwanda akubapa ubwalwa bwamafilu ubwisa, pala abandu bang’wa ngani, akubapa ubwalwa bwa mafilu ububibi, loli uwe wasungite ubwalwa bwa mafilu ubwisa mupaka ulu!"

11 U Yesu akabomba chiswigho cha bwandilo mukaya ka Kana mu buyo bwa Galileya, mula mula momo akalangisya ubughindikiwa bwake, sona na bamanyili bake bakamusubila.

U Yesu akamuposya u mwanalume yo akapapiwa mufwamaso

1 Bo akupulusannya, akamutesya umundu yo akaba mufwamaso ukufuma mo akapapiliwa. 2 Abamanyili bake bakamulalusya bakati, "Mumanyisi, imba we wenu yo akananga, umundu uyu pamo bapapi bake, ukuti apapiwe mufwamaso?"

3 U Yesu akabamula akati, "Atakaba weyuyo, pamo bapapi bake bo bakananga. Loli ichi chikabombiwa ukuti imbombo sya Chala sibonekelemo mumwake. 4 Bo kukali kwelu tubaghile pakubomba imbombo ya yo akanduma. Ubusiku bukwisa bo nayumo umundu angabomba imbombo. 5 Pakwikala une muchisu chapasi, ne bwelu bwa muchisu chapasi."

6 Bo ayugha sisisi, u Yesu akafwina amati pasi, akakandannya ilongwi na mati ghala, po akamupaka umundu yula ni longwi mumaso, 7 akayugha ku kwake akati, "Bukagha uye usukusule muchisiba cha Silowamu." (Cho chikung’anamula ukuti ukutumiwa). Po akabuka nukuya pakusukusula kumaso, po akanyokela bo akutesya.

8 Abapalamani bake na bandu bo bakamutesyagha bwile bo akusuma suma bakalalusya bakati, "Imba te weyo akikalagha akasuma sumagha?" 9 Bamo bakayugha ukuti, "We yuyo." Bamo bakati, "Awe, Bakolanite bubu nawe." Loli umwene akababusya akati, "Nene."

10 Bakayugha ku kwake bakati, "Imba amaso ghako ghakutesya buli buli?"

11 Umwene akamula akati, "Umunndu yo bakuti Yesu, akakanda ilongwi nukumbaka ku maso, akambusya akati, ‘Bukagha kasukusule kumaso muchisiba cha Silowamu. Po ngabuka nukusukusula kumaso, po ghakanda pakutesya.’"

12 Po bakati ku kwake, "Imba ali ko kwighi umundu yuyuyu?"

Akayugha akati, "Ndamenyeko."

Ubufwe bwa Lazalo

1 Pakabako umundu yumo ilita lyake akaba Lazalo, yo akabinagha, akafumagha mu Betaniya, mukaya ko u Maliya nu wamwabo u Malita bakikalaghamo. 2 Akaba we Maliya yo akamupakasya u Malafyale amafuta gha kunungila, nukumupuputa mufinama fyake ni ching’wili chake, yo umuyemba wake u Lazalo akaba mubine. 3 Abayemba bake bakatuma indumi kwa Yesu ukuti, "Malafyale, umumanyani wako umughaniwa abinite."

4 Bo u Yesu ifwa isi akati, "Ububine ubu te bwakuti angafwa nabo, loli bwa kuti u Chala aghindikiwemo, sona ukuti u Mwana wa Chala apokele ubughindikiwa chifukwa cha bubine bububu." 5 Po u Yesu akamughana u Maliya nu wamwabo wake u Malita sona nu Lazalo, 6 loli bo Ifwa ukuti Lazalo mubine, akikalako amasiku aghangi mabili ko akaba. 7 Po akababusya abamanyili bake akati, "Sa tubuke sona mu Yudeya."

8 Abamanyili bake bakayugha bakati, "We Mumanyisi, lululu abalongosi aba Yuda balondagha pakukusumba na mabwe, imba ukulonda pakunyokelako sona?"

9 U Yesu akamula akati, "Umusanya ghuli nama awala twelovu, wesi yo akwenda nu musanya atakwipunula pakuti akutesya ubwelu bwa muchisu chapasi. 10 Loli pala yumo akwenda nu busiku, yo akwipunula chifukwa ate nu bwelu mu mwake." 11 Bo ayugha isi, akabukilila pakubabusya ukuti, "Umumanyani witu u Lazalo aghonite bubu utulo, loli ngubuka pakumulamusya."

12 Po abamanyili bakamwamula bakati, "Malafyale, pala akali ali mutulo, akwisa pakuba akisa."

13 Abene bakinong’onagha ukuti akuyugha tulo twa bwanaloli, loli u Yesu akang’anamula ukuti u Lazalo afwile. 14 Po u Yesu akayugha pabwelu akati, "U Lazalo afwile, 15 loli chifukwa cha umwe hobokite ngani ukuti ndakabako, pakuti musubile. Twende kukwake."

16 Po u Tomasi, (yo akitisiwagha ukuti we mapasa) akababusya abamanyili abanine akati, "Twende poka nawe, ukuti tufwile poka nawe."

U Yesu we kusyuka sona we bumi

17 Bo u Yesu afika akagha u Lazalo aghonamo kale mwipumba amasiku folo. 18 Akaya ka Betaniya kakaba papipi nu Yelusalemu, amakilomita aghakukwana papipi matatu, 19 po aba Yuda abingi bakisa pakubasubasya u Malita nu Maliya chifukwa cha bufwe bwa muyemba wabo. 20 Bo u Malita ifwa pakuti u Yesu akwisa, akafuma kusi pakukomana nawe, loli u Maliya akasyala munyumba. 21 U Malita akamubusya u Yesu akati, "Malafyale, pala ukabangapo papapa, ngali umuyemba wangu atafwile! 22 Sona napo ipano simenye ukuti chosi cho mukusuma ukufuma kwa Chala, u Chala ayukubapa."

23 U Yesu akamubusya u Malita akati, "Umuyemba wako akwisa pakusyuka sona kubufwe." 24 U Malita akamula akati, "Simenye ukuti akwisa pakusyuka sona kubufwe pisiku lyabumalilo."

25 U Yesu akamubusya akati, "Une ne kusyuka nu bumi. Wesi yo akusubila mumwangu akwisa pakuba nu bumi napo angafwa, pope akwisa pakuba mumi, 26 sona wesi yo mumi akusubila mumwangu atakwisa pakufwa lumo. Imba ukusubila isi?"

27 U Malita akayugha akati, "Inga, Malafyale, ngusubila ukuti uwe we Kilisitu, u Mwana wa Chala, yo bakatingi akwisa muchisu chapasi ichi."

U Yesu akalila

28 Bo u Malita amala pakuyugha isi, akanyokela pakumwitisya u wamwabo u Maliya nukumubusya kumbali ukuti, "Umumanyisi ali kuno akukwitisya." 29 Bo u Maliya ifwa isi, akanyamuka umwalubilo, akabuka kwa Yesu. 30 U Yesu akaba akali atafikite mukaya kala, loli akaba akali pabuyo bo u Malita akakomana nawe. 31 Aba Yuda bo bakaba poka nu Maliya munyumba pakumusubasya, bo bamutesya u Maliya anyamuka umwalubilo u kufuma kusi, bakamukonga ukuti akubuka kumapumba pakulila.

32 Bo u Maliya afika pabuyo bo u Yesu akaba, po akamutesya, akafughamila mufinama fyake. Akamubusya akati, "Malafyale, pala ukabangapo ngali umuyemba wangu atafwile."

33 Bo u Yesu amutesya u Maliya akalila, sona na ba Yuda bo bakaba poka nu Maliya bope bakalilagha, umoyo wake ghukisula ngani ni chitima, nu kutamiwa ngani, 34 sona akabalalusya akati, "Imba musilite kwighi?"

Abene bakamwamula bakati, "Malafyale, twende utesyeko." 35 U Yesu akalila. 36 Po aba Yuda bakati, "Tesya mo akamughanila."

37 Loli bamo bakati, "Imba te weyo akamwighula amaso umufwamaso? Imba atangabomba chimo ukuti u mundu uyu atakafwe?"

U Yesu akumususya u Lazalo

38 U Yesu akatamiwa ngani sona, po akabuka kwipumba lyo likaba mbako, bakighalilapo nibwe pa mulyango. 39 U Yesu akayugha akati,

"Fumyapo ibwe" U Malita umuyemba yo akafwa yula akamubusya u Yesu akati, "Malafyale akabalilo aka abaghile pakununga akabibi, pakuti aghonamo amasiku folo."

40 U Yesu akababusya akati, "Imba ndakababusya ukuti pala mukusubila mukwisa pakubutesya ubughindikiwa bwa Chala?" 41 Bakafumyapo ibwe lila. Po u Yesu akatesya kumwanya nukuti, "Tata, ngukupalisya pakuti wanyifwa. 42 Simenye ukuti mukunyifwa akabalilo kosi, loli nguyugha isi chifukwa cha bandu bo bali pano, umwakuti basubile ukuti uwe we ukanduma."

43 Bo ayugha isi, akitisya nisyu lya pamwanya ngani akati, "Lazalo fumamo!" 44 Po umundu yo akafwa yula akafumamo, annyembeteliwe nu mwenda mufinama na munyobe, sona akapinyiwa ni chitambala kumaso. U Yesu akababusya akati, "Musatule mumuleke abukaghe."