1 Kukabako umundu yumo mukaya ka Kesaliya, yo akaba we Kolineliya, u songo wa chilundilo cha basilikali cho bakati Itale. 2 Umwene akaba mundu wakwiputa, sona wakumoghopa u Chala ni nyumba yake yosi, akabapagha abandu abingi ifyabupi, nu kwiputa akabalilo kosi kwa Chala. 3 Isiku limo akabalilo ka fili okoloko pachapamasuba u Kolineliya akatesya ichisetuka, uwandumi wa Chala akwisa kukwake nukuyugha ukuti, "Kolineliya!"

4 Po akamulolelesya nu koghopa, nukumulalusya ukuti, "Wee Malafyale, Imba cho choni ichi?" Po uwandumi akamula akati, "Inyiputo syako nifyabupi fyako fikwelite kumwanya ngati fyakukumbukilamo u Chala. 5 Po losulu ubatume abanalume mu Yopa, baye bamusenye umundu yumo yo we Simoni, yo bakuti we Pitala. 6 Akwikala pa nyumba ya Simoni, umufukuta makwela, yo inyumba yake yili mumbali mwa nyanja." 7 Bo uwandumi yo akayugha nawe abuka, u Kolineliya akabitisya abambombo bake babili nu musilikali uwa kumwiputa u Chala, yo akamubombelagha akabalilo kosi. 8 Bo abalingannya syosi syo sikabombiwagha, akabatuma ku Yopa.

9 Ilya ningelo lyake, bo bali pabulendo bwabo, bakupalamila mu Yopa, u Pitala akakwela pakasale pakwiputa, bo isuba lili pamutu. 10 Isala yikamubaba u Pitala, po akalonda chimo ichakuti alye, loli bo bali pakutendekesya ichakulya, akatesya ichisetuka. 11 Po akatesya kumwanya kwighukite, sona ichindu chimo cho chikaboneka ngati cho chimwenda ichikulu, cho chikakoliwa mumbali syosi folo chikwika pasi. 12 Mula mula mukaba ifinyamana ifya finama folo, nafyo fikwendela ifukwe, nifiyuni fya mu mwanya. 13 Po isyu likamubusya ukuti, "Pitala, nyamuka, ghogha ulye."

14 Loli u Pitala akati, "Malafyale, awe, ndalile lumo fyo fili mwiko sona nafyo finyalite."

15 Po isyu likifwika sona ilya bubili likati, "Cho u Chala achipaghula ukuti chisa, utakinong’one ukuti chinyalite."

16 Sisisi sikabombiwa katatu, papapo na papapo ichimwenda chila chikasenyiwa pakunyokela kumwanya.

17 Bo u Pitala akuswigha nisya ching’anamulo cha findu fyo akatesya muchisetuka chila, abandu bo bakatumiwa nu Kolineliya bakamanya ko inyumba ya Simoni yikaba. Po bakimilila pamulyango wa lupaso. 18 Bakitisya nukulalusya pala alimo u Simoni, yo bakati Pitala.

19 Bo u Pitala akali akwinong’ona ichighanamulo cha chisetuka chila, u Mbepo akayugha kukwake akati, "Ifwa! Abandu batatu bali kuno bakulonda." 20 Po nyamuka bukagha nu kwika, po ubuke nabo kusita kukayikila pakuti nene nabatuma." 21 Po u Pitala akika nukubuka po abandu bala bakaba, akababusya akati, "Une nene mukundonda. Imba choni cho mwisa kuno?"

22 Bakamula bakati, "Usongo u Kolineliya, yo mundu mwisa uwa kumoghopa u Chala, sona aghindikiwe na ba Yuda bosi. Uwandumi umwikemo akamubusya ukuti akwitisye uwe ukuti ubuke ku nyumba yake, ukuti ifwe syo ukulonda pakuyugha."

23 Po u Pitala akabingisya mu nyumba abandu bala ukuba bagheni bake.

Isiku ilingi akanyamuka nukubuka nabo, sona nabanine bamo abitiki abakufuma mu Yopa, bakabuka nawe.

24 Pangelo pake bakafika mu Kesaliya, ko u Kolineliya akamulindililagha, akabitisya abakamu bake na bamanyani bake.

25 Bo u Pitala akwingila mu nyumba, u Kolineliya akamupokela nu kuwa mufinama fyake, akamukwesya. 26 Loli u Pitala akamunyamusya nukuti, "Imilila, nune ne mundu bubu." 27 Bo u Pitala akuyugha nu Kolineliya, akingila mu nyumba mo abandu abingi bakabungana. 28 Po akababusya akati, "Umwe mwebene musimenye ukuti mwiko umu Yuda pakomana pamo pakubuka ku bapanja, loli u Chala andangisisye ukuti indeke ukuyugha yumo umundu ukuti mwiko pamo anyalite. 29 Bo nitisiwa nuwe, ngisa ukusita kukana, po ngulonda ndalusye choni cho wanyitisya?"

30 Po u Kolineliya akamula akati, "Amasiku matatu gho ghakilapo, pakabalilo ngati kaka, aka fili okoloko pachapamasuba, bo ngwiputa mu nyumba yangu, umwakukenusya bubu umundu akimilila pamaso pangu afwalite amalaya agha kunyikisila, 31 akati, ‘Kolineliya, inyiputo syako sifwika, sona nifyabupi fyako fyakumbukiliwa pamaso gha Chala. 32 Pololi tuma abandu ku Yopa ukuti bamwitisye u Simoni yo bakumwitisya ukuti u Pitala, umugheni mu nyumba ya Simoni umufukuta makwela, yo akwikala mumbali mwa nyanja.’ 33 Papapo na papapo ngatuma abandu ku kwako, po chaba akisa pakuti wisa kuno. Pololi twebosi tuli pano pamaso gha Chala tukulindilila ukwifwa syosi syo u Malafyale akulaghile pakutubusya utwe."

34 ✝Po u Pitala akanda pakuyugha akati, "Ipano nasyaghannya ukuti naloli u Chala atakusala umundu mo abelile, 35 loli ifikolo fyosi, ku yo akumoghopa nu kubomba akisa, weyo mwene akumupokela. 36 Mughamenye amasyu gho u Chala akabatumila abandu bamu Izilayeli, pakulumbilila Amasyu Amisa aghamutendele ukwendela mwa Yesu Kilisitu (yo we Malafyale wa bosi) 37 Mughamenye amasyu gho ghakafumusiwa mu Yudeya, ukwandila mu Galileya, bo u Yohani afuma bubu pakulumbilila isya losyo, 38 namo u Chala akamupakasya u Yesu uwa mu Nazaleti nu Mbepo Mwikemo na maka, yo akabuka kosi nakosi, pakubomba inyisa nu kuposya bosi bo bakutamiwa nu satana, pakuti u Chala akaba nawe. 39 Nutwe twe bakamboni ba fyosi fyo akabomba mu Izilayeli na mu Yelusalemu. Bakamughogha pakumupayika pambinjika. 40 Loli u Chala akamusyusya kubufwe bo ghakilapo amasiku matatu nu kumulangisya pabwelu, 41 teko ku bandu bosi, loli abakamboni bene bo u Chala akabasala nganila ngati utwe, twe tukalya nu kung’wa poka nawe bo asyuka ku bufwe. 42 Po akatulaghila ukuti tulumbilile ku bandu, nu kubasimikisya ukuti weyuyo u Chala amusalite kuba mulongi wa bo bali nubumi sona nabafwe. 43 Weyuyo bosi abasololi bakasimikisya ukuti wesi yo akusubila mumwake, akwisa pakupokela uluhobokelo lwa mbibi syake, ukwendela mwilita lyake."

44 Bo u Pitala akali akuyugha sisi, u Mbepo Mwikemo akawa pa bosi bo bakifwa amasyu ghake. 45 Po abitiki bo bakasilimuliwako, bo bakisa nu Pitala bakaswigha, ukuti ichabupi cha Mbepo Mwikemo chakusiwa pa bapanja. 46 Pakuti bakabifwa bakuyughila mundimi isingi nukumupala u Chala. Po u Pitala akamula akati, 47 "Imba alipo umundu yumo yo abaghile pakukanisya amisi ukuti abandu aba batakosiwe, bope bakapokela u Mbepo Mwikemo ngati twetwe?"

48 Po akabalamula ukuti bosiwe mwilita lya Yesu Kilisitu. Po bakamusuma ukuti ikale nabo amasiku amapala bubu.