1 Bo bali mu Ikoniyamu u Pabuli nu Balanabasi bakingila mu nyumba yakwiputilamo iya ba Yuda, bakayugha na maka ngani, po ichilundilo ichikulu icha ba Yuda na ba Giliki chikasubila. 2 Loli aba Yuda bo batakasubila, bakasongelesya abapanja nukubananga inyinong’ono syabo ukuti bababenge abitiki. 3 Po u Pabuli nu Balanabasi bakikala kula kula akabalilo akatali, pakuyugha nu bukifu ngani isya Malafyale, yo akasimikisya nisya chisa chake pakubapa amaka aghakubombela ifimanyilo ni fiswigho. 4 Loli abandu ba mukaya akakulu bakapaghulana, bamo bakaba kumbali ya ba Yuda, abanine kumbali ya batumiwa.

5 Po abapanja na ba Yuda poka na balongosi bakabatika ukuti babayifye abatumiwa nukubanyuka na mabwe, 6 bo abatumiwa bifwa isi, bakakindila mukaya akakulu aka Lisitila na ka Delibe mukaya ka Likaboniya, sona namutwaya utwakusyungulila. 7 Kula kula bakalumbilila Amasyu Amisa.

8 Mu Lisitila mukabamo umundu yo akafwa ifinama, sona atakendapo lumo ukufuma mo akapapiliwa. 9 Akamwifwa bo u Pabuli akuyugha. Po u Pabuli akumulolelesya sona nukutesya ukuti akaba nu lwitiko ulwakuti angapola, 10 akayugha nisyu lya pamwanya akati, "Imilila, gholosya ifinama fyako!" Umundu yula akanyela nukwanda pakwenda. 11 Bo ichilundilo cha tesya syo u Pabuli akabomba, bakanda pakukuta munjugha iya Likaboniya ukuti, "Aba chala batwikila utwe ngati po bandu."

12 Bakamwita u Balanabasi ukuti abe we Zebusi, sona u Pabuli bakamwita ukuti we Helemesi, chifukwa weyo akatangila pakuyugha. 13 Po umuputi wa Zebusi, yo inyumba ya chala wake yikaba kusi kukaya akakulu ngani, akisa nu kambako na maluba pamulyango wa lupaso pakuti umwene ni chilundilo bakalondagha pakubika ifyabupi ku batumiwa.

14 Loli bo u Balanabasi nu Pabuli bifwa sisisi, bakanyepulannya amalaya ghabo nukukindila pakati pa chilundilo, bakakuta bakati, 15 ✝"Mwe bandu mwee, choni cho mukubomba sisisi? Utwe twe bandu bubu ngati mwemwe, tuli pano pakulumbilila Amasyu Amisa, ukuti mufileke ifindu ifibibi nukumukonga u Chala umumi yo akapela kumwanya nichisu chapasi, ni nyanja nafyosi fyo filimo. 16 Mungulilo iyakale, akafileka ifikolo fyosi ukuti fyende musila syabo. 17 Loli atakalekapo pakusimikisya, pakuti akabomba ifisa, akabapa ifula ukufuma ku mwanya ni nyinulo pakabalilo kake akisa, akubapa ichakulya nukwisusya imyoyo yinyu nu kubuhoboke." 18 Pakuyugha amasyu ghaghagha, bakatamiwa ngani pakukanisya ifilundilo ukuti batakabikaghe ifyabupi ku kwabo.

19 Po bakafika kula kula aba Yuda ukufuma ku Andiyokiya na ku Ikoniya, bakabannyengelela abandu, po bakamunyuka u Pabuli namabwe, nukumughusila kusi kwa kaya akakulu, bakinong’ona ukuti afwa. 20 Loli bo abamanyili bamubunganila, akanyamuka nukunyokela mukaya mula. Isiku ilingi, akabuka nu Balanabasi ku Delibe.

21 Bo balumbilila Amasyu Amisa mukaya mula, nukukaba abamanyili abingi, bakanyokela mu Lisitila na ku Ikoniyamu na ku Andiyokiya, 22 bakabakasya imyoyo ya bamanyili, bakabalimbikisya ukuti bendelele pakuba mu lwitiko, nukuti tubaghile ukwenda mundamyo inyingi ukuti twingile mu Bunyafyale bwa Chala. 23 Bo basala abasongo mu chipanga chosi, nu kwiputa poka na pakutusya pakulya, bakababika kwa Malafyale yo bakamusubila.

24 Po bakati bapulusannya muchigaba cha Pidisiya, bakisa ku Pamufiliya. 25 Po bakati balumbilila Amasyu mu Peliga, bakabuka ku Ataliya, 26 ukufuma kula kula bakingila mubwato nukunyokela ku Andiyokiya, kula kula bakababika mu chisa cha Chala pa mbombo yo bakamalisya.

27 Bo bafika mu Andiyokiya, bakachibungannya ichipanga poka nukuchibusya fyosi fyo u Chala akababombela, sona namo akighulila isila ya bapanja ukuti basubile. 28 Po bakikala kula kula akabalilo akatali ngani na bitiki.