1 Bo u Pitala nu Yohani bakali bakuyugha na bandu, abaputi nu mulindilili wa Nyumba ya Chala naba Sadukayi bakisa ku kwabo. 2 Bakakalala chifukwa chakuti abatumiwa bakamanyisyagha abandu nukufumusya mwa Yesu isya kusyuka ku bufwe. 3 Po bakabakola nukubighalila mujela mupaka ningelo lyake, pakuti chikaba cha pamasuba kale. 4 Loli abingi bo bakifwa amasyu bakasubila, sona ubwingi bwa banalume bukongelelapo ngati fayivi sabuzandi.

5 Ningelo lyake abalongosi ba Chiyuda, abasongo na bamanyisi aba Ndaghilo bakabungana mu Yelusalemu. 6 Bakakomana nu muputi usongo ngani u Anasi nu Kayafa, nu Yohani, nu Alikizandala, sona na bosi bo bakaba muluko lwa muputi usongo ngani. 7 Po bakabimika abatumiwa pakati, nukubalalusya ukuti, "Imba mukubomba buli chichichi? Imba maka ghaki, pamo mwilita lya wenu lyo mwabombela isi?

8 U Pitala bo iswile nu Mbepo Mwikemo, akabamula akati, "Mwe balongosi ba bandu na basongo, 9 pala tukulongiwa umusughu nisya mbombo inyisa yo yabombiwa pa mundu umulemale namo akapolela, 10 po mwebosi musimanye na bandu ba mu Izilayeli bosi, ukuti mwilita lya Yesu Kilisitu uwa mu Nazaleti yo umwe mukamukomelela pambinjika, yo u Chala akamususya kubufwe, ukwendela muyuyu, umundu uyu imilile pamaso pinyu apolite. 11 U Yesu yuyuyu yo

libwe lyo likakaniwa namwe basengi ba nyumba,

lyo likipela kuwa libwe lya pakona.

12 Po butalipo nabumo ubupoki mu mundu yumo, pakuti atalipo nayumo sona pachisu chosi ichapasi yo u Chala atupile twe bandu ukuti angatupoka."

13 Loli bo batesya ubukifu bwa Pitala nu Yohani, sona bo basyaghannya ukuti bakaba bandu bubu, abasita kumanyila, bakaswigha nu kusyaghannya ukuti bobo bakaba nu Yesu. 14 Loli bo bamutesya umundu yo akapola imilile poka nu Pitala nu Yohani, po batakabanacho icha kuyugha nu kususya. 15 Po bakababusya ukuti bafumemo munyumba yo bakalongelaghamo inongwa, po bakanda pakuyughisannya bene bene ukuti, 16 "Imba tubombe choni na bandu aba? Pakuti abandu bosi mu Yelusalemu basimenye ukuti ichiswigho ichikulu ichi chabombiwa nabo, sona tutangachikana. 17 Loli ukuti akapango aka manyekasate ku bandu, satuboghofye ukuti batakayughepo sona ku yumo mwilita lya Yesu."

18 Po bakabitisya nu kubakomelesya ukuti batakayughepo pamo ukumanyisya mwilita lya Yesu." 19 Loli u Pitala nu Yohani bakamula bakati, "Pala chisa pamaso gha Chala ukubifwila umwe ukukila ukumwifwila u Chala, po mulonge mwebene, 20 pakuti tutangaleka utwe pakuyugha syo twatesya nukwifwa. 21 Abene bo bakongelelapo pakuboghofya, po bakabasatula pakuti batakachagha ichifukwa cha kubafunda, pakuti abandu bosi bakamupala u Chala pafyo fikabombiwa. 22 Pakuti umundu yo ichiswigho chikabombiwa icha kupola, akaba nifinja ifya kukila pa fote.

23 Bo u Pitala nu Yohani basatuliwa, bakanyokela kubanine nukubabusya syo aba longosi ba baputi na balongosi ba chiyuda syo bakayugha kukwabo. 24 Bo bifwa sisisi, bosi bakakwesya amasyu kwa Chala nukuti, "Wee Malafyale," Ukapela kumwanya ni chisu chapasi, sona ninyanja nafyosi fyo filimo, 25 we ukayugha mwa Mbepo Mwikemo ukwendela mu mulomo mwa tata witu u Devedi umubombi wako, ukati,

‘Choni cho abapanja bakupwata?

Na bandu bakinong’ona syo site nimbombo.

26 Abamalafyale ba muchisu cha pasi bakiyannya bene

sona abalongosi bakabungana poka

pakumusambukila u Malafyale nu Kilisitu wake.

27 ✝Pakuti naloli u Helodi nu Pontiyo Pilati bakabungana mu kaya akakulu ngani poka na bandu aba panja, sona nabandu aba mu Izilayeli pakumusambukila u Yesu, umubombi wako umupakasiwa. 28 Bakabomba fyosi fyo uwe na maka ghako nu bwighane bwako ukinong’ona kale ukuti fibombiwe. 29 Po ipano Malafyale, tesya ukoghofya kwabo, ubape ababombi bako ukuyugha isyu lyako nubukifu bosi, 30 bo ukugholosya inyobe yako pa kuposya, sona witikisye ukuti ifimanyilo ni fiswigho fibombiwe mwilita lya Yesu, umubombi wako umwikemo."

31 Bo bamala pakwiputa, ubuyo bo bakakomanako bukayingana, po bosi bakisula nu Mbepo Mwikemo, po bakayugha isyu lya Chala nubukifu.

32 Po ichilundilo chosi icha bitiki chikaba nu moyo ghoka sona ni nyinong’ona syoka, po atakabapo nayumo uwa kuyugha ukuti ifindu fyo ali nafyo fyake mwene, loli bakagabana fyosi fyo bakaba nafyo. 33 Po abatumiwa bakasimikisya na maka amakulu ngani isya kusyuka kubufye bwa Malafyale u Yesu, po pakaba ichisa ichikulu ngani papabo bosi, 34 Pakuti atakabapo nayubo uwa kutamiwa chimo, pakuti wesi akaba nimighunda pamo inyumba syo bakaghulisyagha nukwisa nindalama pafyo baghulisya. 35 Po bakasibika mu maka gha batumiwa, sona sikagabiwa ukuyana namo wesi akusobelwa.

36 Po u Jozefu uwaluko lwa Levi uwa mu Sayipulasi, yo abatumiwa bakamwitisya ukuti Balanabasi (Cho chikung’anamula ukuti, "Mwana walukasyo,") 37 akaghulisya umughunda wake nu kwisa ni ndalama, nukusibika mu maka gha batumiwa.