1 Po u Pabuli akafika ku Delibe nu Lisitila, ko kukaba umumanyili yo bakati Timoti, yo umayi wake akaba mu Yuda sona akaba mwitiki, loli uwise wake akaba mu Giliki. 2 Abitiki bosi aba mu Lisitila na mu Ikoniyamu bakamuyugha u Timoti ubwisa. 3 U Pabuli akalondagha ukuti u Timoti abuke nawe pabulendo bwake, po akamusilimula, chifukwa cha ba Yuda bo bakwikala mubuyo bula, pakuti bosi bakamanya ukuti uwise mu Giliki. 4 Bo bakupulusannya mutwaya, bakabapa abitiki indaghilo syo sikapangiwa na batumiwa na basongo aba mu Yelusalemu. 5 Po ifipanga fikaba na maka mulwitiko, po fikongelelapo pakubala amasiku ghosi.

6 U Pabuli na bamanyani bake pakapulusannya mu Filigiya na mu Galatiya u Mbepo Mwikemo atakabitikisya ukuti balumbilile amasyu mu Asiya. 7 Bo bafika pambaka ya Misiya, bakaghesya pakubuka ku Bitiniya, loli u Mbepo uwa Yesu atakabitikisya. 8 Po bakapulusannya mu Misiya, nukubuka ku Tulowasi. 9 Po ichisetuka chikamubonekela u Pabuli pabusiku. Pakaba umundu uwa ku Makedoniya imilile akamusuma ukuti, "Wise kuno ku Makedoniya ukuti utwafwe." 10 Bo u Pabuli atesya bububu ichisetuka chila, papapo na papapo tukiyannya pakubuka ku Makedoniya pakuti tukinong’ona ukuti u Chala atwitisya ukuti tulumbilile Amasyu Amisa ku kwabo.

11 Tukanyamuka mu bwato ukubuka mu Tulowasi, tukagholoka nukubuka ku Samotilaki, po ilya ningelo lyake tukafika mu Niyapolisi. 12 Ukufuma kula kula tukabuka ku Filipu, akaya akakulu ngani aka mu Makedoniya, na mutwaya utwa chiloma, po tukikala kula kula amasiku amingi ngani. 13 Pisiku ilyakutusya tukafumamo mukaya kala nukubuka kumbali ya kulusoko, ko tukinong’ona ukuti kukabako ubuyo ubwakwiputilako, po tukikala pasi nukuyugha na bakolo bo bakabungana kula kula. 14 Po akatwifwa umukolo yumo yo ilita lyake akaba we Lidiya uwa mukaya ka Tiyatila, akaghulisyagha amalaya amakesamile, yo akamwiputa u Chala. U Malafyale akamwighula umoyo wake ukuti ateghelesye syo u Pabuli akuyugha. 15 Bo umwene osiwa na ba munyumba yake, akatwitisya utwe akati, pala naloli mwandesya ukuti ne mwitiki wa Malafyale, sakuno mwikale mu nyumba yangu." Po akatunnyengelela utwe ukuti tubuke.

16 Isiku limo bo tukubuka kubuyo ubwakwiputilako, tukakomana nu mulindu umusya yo akaba ni mbepo imbibi, yo yikamupelelagha ukuti ayughe ifya mundasi. Akamukabilagha umalafyale wake indalama inyingi ngani nu bulaghusi bwake. 17 Akamukonga u Pabuli nutwe, akakuta akati, "Abandu aba bambombo ba Chala uwa kumwanya ngani, bo bakuyugha isila ya bupoki." 18 Po akabomba sisisi amasiku amingi. Loli u Pabuli akakalala ngani, umwakuti akaghalabuka nukuyibusya imbepo imbibi ukuti, "Ngukulamula mwilita lya Yesu Kilisitu ukuti fumamo mumwake." Po yikafumamo akabalilo kala kala.

19 Loli bo abenecho batesya ukuti ko bakasubilagha pakukabilamo kafumitemo, bakamukola u Pabuli nu Sila, bakabaghusila ku munalo ukuti bakomane na balaghili. 20 Bo bisa nabo pamaso gha balongi bakati, "Abandu aba ba Yuda sona bakufulungannya akaya kitu, 21 po bakumanyisya imiteto yo yili mwiko ku utwe twe Baloma, ukusitika pamo ukusibomba." 22 Po ichilundilo chikingililapo ukumukola u Pabuli nu Sila.

Po abalongi bakanyepulannya amalaya gha Pabuli nu Sila, nukubalamula ukuti basyembiwe nifikoti. 23 Bo basyembiwa ngani, bakabighalila mujela, po bakamulamula umulindilili wa jela ukuti abasunge akisa. 24 Bo apokela ululaghilo lululu, umulindilili yula akabingisya muchipinda icha mukati ngani, nukubapinyilila ifinama fyabo mu fipimbili.

25 Loli pakati pabusiku u Pabuli nu Sila bakiputagha nukwimba inyimbo sya Chala, po abakayidi abanine bakabateghelesyagha. 26 Po umwakukenusya bububu kukaba akasenyenda akakulu ngani, umwakuti kakaneng’ennya ulwalo ulwa jela yila. Papapo na papapo ifighi fikighuka, sona syope ni mbingu sya bakayidi bosi sikasatuka. 27 Bo umulindilili wa jela anyamuka, akatesya ukuti pamulyango wa jela pighukite, po akaghusa upanga wake ukuti ighoghe mwene, chifukwa akinong’onagha ukuti abakayidi bakindamo. 28 Loli u Pabuli akakuta ngani akati, "Utakifulasye wemwene, twebosi tuli muno."

29 Po umulindilili akitisya ukuti bamupe inyale, akakindila mukati, nukuwa mu finama fya Pabuli nu Sila bo akutetema. 30 Po akabafumya kusi nukubalalusya ukuti, "Mwe basongo, imba mbombe choni ukuti mbokiwe?"

31 Bakamwamula bakati, "Usubile mwa Malafyale u Yesu, po uyukupokiwa uwe naba mu nyumba yako." 32 Po bakamubusya isyu lya Malafyale poka naba munyumba yake bosi. 33 Pakabalilo kala kala, umulindilili akabasenya nukubasuka ifilonda fyabo. Papapo na papapo akosiwa yuyo poka naba munyumba yake bosi.

34 Po akabuka nabo ku nyumba yake nukubapa ichakulya, akahoboka ngani poka naba munyumba yake, chifukwa bakasubila mwa Chala.

35 Bo kwacha, abalongi bakabatuma abasilikali nu lulaghilo lwakuti, "Mubasatule abandu abo babukaghe."

36 Po umulindilili wa jela yula akamubusya u Pabuli akati, "Abalongi bandumila amasyu ghakuti mbasatule ukuti mubukaghe, po losulu mufume, mubuke mu mutende."

37 Loli u Pabuli akababusya abasilikali akati, bakatusyembela utwe pachilundilo cha bandu ukusita kutulonga utwe, utwe twe ba Chiloma, bakatutaghila mu jela. Po ipano bakulonda ukuti batufumye kubusyefu? Awe, loli baleke bise batufumye bene."

38 Abasilikali bakababusya sisisi abalongi, po bakoghopa bo bifwa ukuti bakaba ba Chiloma. 39 Po bakisa nukupepesya ku kwabo, po bakabafumyamo mu jela nu kubasuma ukuti bafumemo mukaya. 40 Po bakafumamo mu jela nu kubuka mu nyumba ya Lidiya, ko bakakomana na bitiki nu kubakasya nu kufumapo.