1 Bo ghakilapo amasiku fayivi umuputi usongo u Ananiya akabuka na basongo bamo ku, poka nu mwimilili wa nongwa yo akaba we Telitula, po bakamupangila umulaghili wa chisu inongwa yo bakamulonga u Pabuli. 2 Bo bamwitisya u Pabuli, u Telitulasi akanda pakuyugha inongwa ukuti, "We mughindikiwa! Pasi pa bulongosi bwako tukaba numutende akabalilo akatali, sona ifingi ifisa fikabombiwagha muchisu chitu chifukwa cha bulongosi bwako ubwa mahala, 3 musila syosi nakosi, tukupokela nukupalisya mughindikiwa Felikisi. 4 Loli ndakulonda pakutaghila akabalilo kako, ngukusuma ukuti utupelele ichisa nu kuteghelesya syo tukulonda pakuyugha mubipimba. 5 Pakuti twamwagha umundu uyu ukuti we ndamyo, yo akwandisya ifyongo pakati pa ba Yuda muchisu chosi ichapasi, sona mulongosi wa kabukatila ka ba Nazalini. 6 Sona akaghesyagha pakuyinyasya Inyumba ya Chala, po tukamukola. 8 Pala ungamulalusya umundu uyu, uwe wemwene ubaghile pakusyaghannya syo anangite." 9 Po aba Yuda bope bakingililapo pakuyugha ukuti syosi sisisi sikaba syamomumo.

10 Bo umulaghili wa chisu amupalisya u pabuli ukuti ayughe, po u Pabuli akamula akati, "Simenye ukuti ukaba mulongi wa chisu ichi ifinja ifingi, po nahoboka ukuti niyimile nemwene pamaso papako. 11 Ngati nuwe wemwene ungamanya akisa ngani, ghatakilitepo na masiku twelevu mo ngabukila mu Yelusalemu pakwiputa. 12 Abanongwa yangu batakanyaghapo ngudalingana nu mundu yumo mu Nyumba ya Chala, pamo ngwandisya ifyongo mu nyumba syakwiputilamo, pamo mukaya akakulu ngani. 13 Po batangasimikisya ukuti syo bakunjughila ipano. 14 Loli cho mbaghile ukwitika ku uwe, chakuti ngwiputa u Chala wa banyenya bitu pakonga isila yake, yo bakuyugha ukuti ya bumyasi, ngusubila fyosi fyo fisimbiwe mu ndaghilo sya Mozesi, na mumabuku gha basololi, 15 ngusubila mwa Chala ukuyana namo bope bakamwitika, ukuti kuyukuba ukusyuka kubufwe abandu abagholoke na babibi. 16 Po akabalilo kosi ngughesya pakubomba inyisa ukuti imbe nu mabyebye umwisa pamaso pa Chala na pa bandu.

17 ✝Bo fyakilapo ifinja ifingi, ngisa mu Yelusalemu pakubapa ifyabupe aba luko lwangu, sona nifyakwikemekesya. 18 Bo ngubomba sisisi, bakanyagha mu nyumba ya Chala bo niswepesisye, ukusita ichilundilo cha bandu pamo ichongo. 19 Loli pakaba aba Yuda bamo aba ku Asiya bo bali pano, bo babaghile bise pandasi pako nukuyugha pala bali ninongwa nune. 20 Pamo leka abandu bo bali pano bayughe bene inongwa yo bakanyagha nayo, bo nimilile pamaso gha balongi, 21 ✝ukupatula ichindu choka cho ngakuta bo nimilile pakati pabo, ‘Ukuyana nisya kusyuka kubufwe syosyo ngulongiwa numwe ipano.’ "

22 Po u Felikisi, weyo akayimanya akisa Isila yiyiyi, akayimika inongwa nukuti, "Bo u Lisiyasi usongo wa basilikali isa, ngwisa pakutumula inongwa yako." 23 Po akamulamula usongo wa basilikali ukuti amusungilile u Pabuli, loli utubalilo tumo amupengeko ubusatuke nukubitikisya abamanyani bake ukuti bamupe ifyakusobelwa fyake.

24 Bo ghakilapo amasiku ghamo u Felikisi akisa nu mukasi u Dulusila yo akaba mu Yuda, akamwitisya u Pabuli nukumuteghelesya, bo akuyugha nisya lwitiko mwa Kilisitu Yesu. 25 Bo u Pabuli akuyugha nisya bwisa, nisya kwikola, sona nisya kulongeliwa ko kukwisa, u Felikisi akaba nu bogha nukumubusya ukuti, "Bukagha lululu, ngwisa pakukwitisya pala nakagha akabalilo akisa." 26 Pakabalilo kala kala akinong’onagha ukuti u Pabuli akwisa pakumubeka ni ndalama, chocho chifukwa akamwitisyagha kabili kabili.

27 Bo fyakilapo ifinja fibili, u Polokiya Fesita akapyana pa Felikisi ngati we mulaghili wa chisu, u Felikisi akalondagha pakubahobosya aba Yuda, po akamuleka u Pabuli mujela.