1 "Mwe bakamu na batata, munyifwisye po ngwifighilila nemwene pandasi pinyu."

2 Bo bamwifwa ukuti akuyughila mu Chihebeli, bakabukila pa kuba myee, po u Pabuli akati, 3 ✝ "Une ne mu Yuda, ngapapiwa mukaya ka Talisa muchisu cha Kilikiya, loli nakulila mukaya kakaka mufinama fya Gamaliyeli, ngamanyisiwa akisa mundaghilo sya batata bitu, sona ngiyula ngani pakubomba imbombo ya Chala ukuyana namo umwe mubelile mwe bosi ipano. 4 ✝Ngabafwima nu kubaghogha abandu bo bakakonga ngani isila yiyiyi, ngabakola abanalume na bakolo nukubighalila mujela, 5 ngati usongo wa baputi na kabukatila kosi aka balongi ba Chiyuda bangasimikisya ukuti nguyugha ubwanaloli, ngapokela abakalata abakufuma ku kwabo nukubuka nabo ku Damasika, ukuti inje mbasenye sona bo bakwikala kula kula nu kwisa nabo bapinyiwe nimbingu ku Yelusalemu ukuti bafundiwe.

6 Bo ngwenda ngupalamila kukaya ka Damasika, bo isuba lili pamutu, umwakukenusya bubu ubwelu ubwakubala ngani ukufuma kumwanya, bukambalila une. 7 Po ngawa pasi nukwifwa isyu likuti, ‘We Sabuli, we Sabuli, imba choni cho ukufwima?’ 8 Po ngamula ngati, ‘Imba we wenu, Malafyale? Akambusya akati, ‘Ne Yesu uwa mu Nazaleti yo ukumufwima.’ 9 Po abene bo ngabanabo bakatesya ubwelu loli batakifwa isyu ku yo akayugha ku kwangu. 10 Po ngalalusya ngati, ‘Imba mbombe choni, Malafyale?’ Po u Malafyale akambusya akati, ‘Nyamuka, bukagha ku Damasika, ko ukwisa pakubusiwa syosi syo sibatikiwe kale ukuti ubombe.’ 11 Ngapotwa pakutesya chifukwa cha kubala ngani kwa bwelu, po bo bakaba nune bakangola inyobe nu kufika ku Damasika.

12 Mukaya mula mula mukaba umundu yumo yo akaba we Ananiya, umundu uwa kumwiputa u Chala, yo akasikonga indaghilo, sona akayughiwa abwisa na ba Yuda bo bakikalagha kula kula. 13 Akisa nu kwimilila papipi nune nukumbusya ukuti, ‘Wamwitu Sabuli, tesya sona.’ Pakabalilo kala ngatesya sona, nukumutesya. 14 Po akati, ‘U Chala wa batata bitu akusalite uwe ukuti umanye ubwighane bwake, nukutesya umugholoke yula, sona nukwifwa isyu lyo likufuma mu mulomo wake. 15 Pakuti ukwisa pakuba we kamboni wake pakubabusya abandu bosi fyo wa tesya nu kwifwa. 16 Pololi imba ukulindilila choni? Nyamuka nukosiwa ukuti imbibi syako sisukiwe, po ukwitisya pilita lyake.’

17 "Bo nanyokela ku Yelusalemu, ngiputagha mu nyumba ya Chala, ngatesya ichisetuka. 18 Ngatesya u Malafyale akumbusya akuti, ‘Lubilo fumamo mu Yelusalemu muno chifukwa abandu kuno batakwisa pakwitikisya ubwakamboni bwako bo ukuyugha nisya une.’ 19 Po ngati, ‘Malafyale, basimenye ukuti ngabukagha ku nyumba ya kwiputilamo pakubighalila mujela nukubakoma bo bakasubilagha mumwako. 20 ✝Bo ukamboni wako u Sitefani akughoghiwa, une ngimilila pala pala ukusimikisya ukughoghiwa kwake, sona ngaba musungi wa malaya kubo bakamughogha.’

21 Po u Malafyale akambusya akati, ‘Bukagha, pakuti ngwisa pakukutuma kubutalipo ku banja.’ "

22 Abandu bakateghelesya kwa Pabuli mupaka po akayugha sisisi, po bakakwesya ngani amasyu ghabo bakati, "Umundu uyu musimisye pachisu chapasi! Pakuti atabaghile pakuba nu bumi." 23 Po bakakuta ngani nukutagha amalaya ghabo, nukutunnya ulufumbi ku mwanya, 24 usongo wa basilikali yula akamula akati babuke nu Pabuli mwilinga, sona akababusya akati bamusyembe ukuti umwene amanye ichifukwa cho abandu bakakutila bububu. 25 Loli bo bamupinya ukuti bamusyembe, u Pabuli akamulalusya usongo wa basilikali yo akimilila pala pala akati, "Imba indaghilo situ sikwitikisya pakumusyemba umwene kaya wa Chiloma, bo batamulongite inongwa yake?"

26 Bo usongo wa basikali ifwa isi, akabuka kwa songo ngani uwa basilikali nukumubusya ukuti, "Imba ukubomba choni? Pakuti umundu uyu mwenekaya wa Chiloma."

27 Po usongo yula akisa nu kumulalusya u Pabuli ukuti, "Mbusya, imba uwe we mwenekaya wa Chiloma?"

Po akamula akati, inga, nene.

28 Po usongo wa basilikali akamula akati, "Ngaghula ubwenekaya nindalama inyingi ngani." U Pabuli akamula akati, "Loli ubwenekaya bwangu bwakupapiwa nabo." 29 Po abene bo bakalondagha pakumulalusya bakamuleka papapo napapapo, nu songo wa basilikali sikamoghofya bo asyaghannya ukuti u Pabuli akaba mwenekaya wa Chiloma, sona nukuti bakamupinya ni mbingu.

30 Loli ilya ningelo, usongo wa basilikali akalondagha ukuti amanye ichifukwa cho aba Yuda bakamusitakila u Pabuli, po bakamusatula nukulamula ukuti abalongosi ba baputi na bakabukatila ka balongi bosi bakomane, po bakamusenya u Pabuli nu kumwimika pamaso pabo.