1 Panyuma pa isi, u Pabuli akafumako ku Ateni nukubuka ku Kolindi. 2 Ko akamwagha umu Yuda yumo yo ilita lyake akaba we Akwila, yo akapapiwa mukaya ka Pondi, akafuma bubu ku Itale poka nu mukasi wake u Pulisila, chifukwa u Kalabudiyasi akalamula ukuti aba Yuda bosi bafumemo mu Loma, po u Pabuli akabuka pa kubatesya, 3 akikala nukubomba poka nabo pakuti wepe akaba mupanga fisakasa ukuyana namo bakabombelagha. 4 Isiku lyosi ilyakutusya akabalingannya mu nyumba ya kwiputilamo, ukughesya pa kubannyengelela aba Yuda naba Giliki.

5 Bo u Sila nu Timoti bafika ukufuma ku Makedoniya, u Pabuli akikolesannya ngani nu bulumbilili, akabasimikisya aba Yuda ukuti u Yesu we Kilisitu. 6 Loli bo bakumususya nu kumutuka u Pabuli, akakung’unda imyenda yake nukubabusya ukuti, "Ibanda linyu likale pa mitu yinyu, une nde nacho nachimo, ukwanda ipano ngwisa pakubuka ku bapanja." 7 Po akafumapo nukubuka ku nyumba ya mundu yumo ilita lyake akaba we Titi Yusito, yo akamwiputagha u Chala, inyumba yake yikapalamana ni nyumba ya kwiputilamo. 8 U Kilisipa yo akaba mulongosi wa nyumba ya kwiputilamo poka naba mu nyumba yake bosi bakamusubila u Malafyale, sona na bandu abingi aba mu Kolindi bakamwifwa u Pabuli nu kusubila, sona bakosiwa.

9 Po u Malafyale akamubusya u Pabuli pabusiku mu chisetuka akati, "Utakoghopaghe, loli endelela pakuyugha sona utakabe myee, 10 pakuti une indi nuwe. Nayumo umundu yo akwisa pakulwa nuwe nukufulasya, pakuti indi nabo abandu abingi mukaya muno." 11 Po u Pabuli akikala kula kula ichinja choka ni myesi sikisi, akubamanyisya amasyu gha Chala mu mwabo.

12 Bo u Galiyo mulindilili wa chisu cha Akaya, aba Yuda bakabungana poka nu kumukola u Pabuli nukwisa nawe kubuyo ubwakulongelako inongwa. 13 Bakayugha bakati, "Umundu uyu akubannyengelela abandu ukuti bamwipute u Chala ukukindana ni ndaghilo situ."

14 Loli bo u Pabuli akulonda pa kuyugha, u Galiyo akababusya aba Yuda akati, "Pala inongwa yikaba yakuti yumo ananga indaghilo, pamo amunangila yumo, po ngali ndabateghelesya umwe mwe ba Yuda. 15 Loli pakuti ukudalingana kwinyu kwa masyu, na malita, ni ndaghilo sinyu, po musitesye mwebene, une ndakulonda pakulonga sisisi!" 16 Po akabakisyapo apa kulongelapo inongwa. 17 Po bosi bakamukola u Sositeni, umulongosi wa nyumba ya kwiputilamo, nukumukoma pabuyo bwa kulongelapo inongwa. Loli u Galiyo ata kabikilako umoyo pa sisisi.

18 ✝U Pabuli akendelela ukwikala na bitiki mu Kolindi amasiku amingi, po akabalagha nukukwela mubwato nukubuka ku Siliya poka nu Pulisila nu Akwila. Akamwa ichingw’ili chake mu Kengeleya chifukwa cha kulapa kwake. 19 Po bakafika mukaya ka Efeso ko u Pabuli akamuleka u Pulisila nu Akwila, loli umwene akingila mu nyumba ya kwiputilamo mo bakayughisannya na Yuda. 20 Bo bamulalusya ukuti ikale nabo akabalilo akatali, loli umwene atakitika. 21 Loli bo akubaleka, akababusya akati, "Ngwisa pakunyokela pala u Chala itikisya," po akakwela mubwato nukufumamo mu Efeso.

22 Bo bafika mukaya ka Kesaliya, akabuka mu Yelusalemu nu kuchilamuka ichipanga, po akabuka mukaya ka Andiyokiya. 23 Bo ikalamo akabalilo akatali kula kula, akanyamuka nukupulusannya muchingaba cha Galatiya nicha Filigiya pakubakasya abamanyili bosi.

24 Po umu Yuda yumo yo ilita lyake akaba we Apolo, yo akapapiwa mukaya ka Alekizandiliya akafika ku Efeso, akaba mundu wamahala mukayughile, sona akaghamanya ngani amasimbo. 25 Akamanyisiwa akisa nisya sila ya Malafyale, pakuba nu mbepo uwalweke, akagholosya akisa pakuyugha na pakumanyisya isya Yesu, napo akalumanya lwene ulosyo lwa Yohani. 26 Po akanda pakuyugha ngani nubukifu mu nyumba ya kwiputilamo, loli bo u Pulisila nu Akwila bamwifwa, bakamusenya nukubuka nawe ku nyumba yabo nukumulingannya akisa nisya sila ya Chala. 27 Bo u Apolo akulonda pakubuka ku Akaya, abitiki aba mu Efesi bakamukasya nukubasimbila abitiki aba mu Akaya ukuti bamupokele, bo afika, akabafwa ngani bo bakasubila ukwendela mu chisa cha Chala. 28 Pakuti akayughile kake kakaba namaka pakudalingana na ba Yuda pakati pa bandu, pakulangisya ukuti u Yesu we Kilisitu.