1 Po u Sabuli akitikisya ukughoghiwa kwa Sitefani.

Isiku lila lila ichipanga cha mu Yelusalemu chikanda pakufwimiwa ngani. Po abitiki bosi ukupatula abatumiwa, bakabanyambannya mu fingaba fyosi ifya Yudeya nu Samaliya. 2 Abandu bo bakamwiputa u Chala bakamusila u Sitefani, nukumulila ngani ni chitima. 3 ✝Loli u Sabuli akaghesya pakunangannya ngani ichipanga, umwakuti akabukagha inyumba ni nyumba pakubakola abanalume na bakolo nukubighalila mujela.

4 Abitiki bo bakanyambana posi na posi, bakalumbililagha Amasyu Amisa kosi ko bakabukagha. 5 U Filipu akabuka mukaya akululu ngani aka mu Samaliya nukulumbilila ku bandu Amasyu Amisa agha Kilisitu. 6 Po ifilundilo fya bandu fikamwifwa u Filipu nu kutesya ifimanyilo fyo akabombagha, bosi bakateghelesya ngani syo akayugha. 7 Pakuti abingi mu bala bala bakaba nimbepo imbibi, syo sikafumagha bo bakukuta ngani, sona abingi bo bafwile ifinama na balemale bakapola. 8 Po mukaba ulusekelo ulukulu ngani mukaya kala kala.

9 Loli pakaba umundu yumo yo akaba we Simoni, yo kale akabaswighisya ngani abandu ba mu Samaliya na mayele ghake. Umwene akitufyagha ngati we mundu yumo umukulu. 10 Abandu bosi aba mukaya kala abapala na basongo, bakati, "Umundu uyu we maka agha Chala gho bakughitisya ukuti ‘Maka Amakulu." 11 Bakamuteghelesya ngani chifukwa chakuti akabalilo akatali akabaswighisya ngani na mayele ghake. 12 Loli bo bamusubila u Filipu yo akalumbililagha Amasyu Amisa agha Malafyale u Chala na mwilita lya Yesu Kilisitu, po bakosiwa bosi abanalume na bakolo. 13 U Simoni wepe akasubila. Bo osiwa, akikalagha poka nu Filipu, sona bo atesya ifimanyilo ni fiswigho ifikulu fyo fikabombiwagha, akaswigha.

14 Bo abatumiwa aba ku Yelusalemu bifwa ukuti abandu mu Samaliya bapokela amasyu gha Chala, bakabatumila u Pitala nu Yohani. 15 Bo bafika, bakabiputila abitiki bala ukuti bapokele u Mbepo Mwikemo, 16 pakuti wesi akaba atapokelite u Mbepo Mwikemo, loli bakosiwa bubu mwilita lya Malafyale u Yesu. 17 Po Pitala nu Yohani bakabika inyobe papabo, sona bakapokela u Mbepo Mwikemo.

18 Bo u Simoni atesya ukuti u Mbepo Mwikemo apeghiwa pakubabika inyobe abatumiwa, akabasenyela indalama u Pitala nu Simoni, 19 nukubabusya ukuti, "Nune bubu mumbeko amaka, umwakuti wesi yo namubika inyobe apokele u Mbepo Mwikemo."

20 Loli u Pitala akamwamula akati, "Uwe ni ndalama yako mupyutiwe poka, chifukwa ukwinong’ona ukuti ungaghula ichabupe cha Chala ni ndalama. 21 Ute ni chigaba pamo ubuyo mumbombo yitu pakuti umoyo wako temwisa pamaso gha Chala. 22 Pololi pinduka nukuleka ichibibi chako ichi, nu kwiputa kwa Malafyale ukuti akuhobokele pacho ukwinong’ona mumoyo wako. 23 Pakuti ngutesya ukuti wiswile nukubaba kwa kayongo, sona we musya wa mbibi."

24 Po u Simoni akamula akati, "Munyiputile kwa Malafyale ukuti nachimo cho mwayugha chitakabombiwe pa une. 25 Bo bamala pakusimikisya nukufumusya amasyu gha Malafyale, u Pitala nu Yohani bakanyokela mu Yelusalemu, nukulumbilila Amasyu Amisa mutwaya utwingi utwa mu Samaliya.

26 Loli uwandumi wa Malafyale akamubusya u Filipu akati, "Nyamuka nukubuka kumbali iya kundende kusila yo yikubuka ku Gaza ukufuma mu Yelusalemu." (Yo sila ya mulungalangala). 27 Po u Filipu akanyamuka nukubuka. Akatesya umundu wa muchisu cha Isopiya, lyo likaba likambala lya kusunga ichuma cha malafyale umukolo u Kandaki uwa ku Isopiya, yo akisa ku Yelusalemu pakwiputa, 28 po akabwela ku kaya, akikala mungolo yake, akabelengagha ibuku lya musololi u Yisaya. 29 Po u Mbepo Mwikemo akamubusya u Filipu akati, "Bukagha wende papipi ni ngolo iyi." 30 Po u Filipu akakindilila ingolo yila nu kumwifwa akubelenga ibuku lya musololi u Yisaya. Akamulalusya akati, "Imba ukuchifwisya cho ukubelenga?"

31 Po umwene akamula akati, "Imba ningifwa buli, po atalipo nayumo uwa kundingannya? Po akamwitisya u Filipu ukuti akwele nu kwikala nawe. 32 Amasimbo gho akabelenga gho agha:

"Ngati ng’osi yo yasenyiwa pakubuka nayo

pakuboliwa

pamo mwana wa ng’osi yo atakusuma ichongo,

bo bali pakuputula ameya ghake,

po atakumetapo nakamo.

33 Bakamusula sona panongwa yake patakabapo ubwanaloli.

Imba we wenu yo angalingannya nisya luko lwake?

Pakuti ubumi bwake pachisu ichapasi pano bwafika pabumalilo."

34 Ikambala lila likamubusya u Filipu likati, "Mbusya, imba umusololi akuyugha nisya wenu? Imba akwiyugha mwene pamo nisya yungi bubu?"

35 Po u Filipu akanda pakuyugha, ukwandila pamasimbo, akamubusya Amasyu Amisa agha Yesu. 36 Bo bakwenda musila, bakafika pa buyo bumo bo pakaba amisi. Po ikambala lila likati, "Tesya pano pali amisi. Imba choni cho chingakanisya ukuti nosiwe?"* 38 Ikambala likalamula ukuti ingolo yake yimilile, po bosi babili bakingila mu misi, u Filipu ni kambala lila, po akamosya. 39 Bo bafumamo mu misi mula, u Mbepo wa Malafyale akamutisyapo u Filipu, po ikambala lila litakamutesyapo sona u Filipu, loli akendelela nubulendo bwake iswile nubuhoboke. 40 Loli u Filipu akaghiwa ku Azota. Po akubuka pakalumbilila Amasyu Amisa mutwaya tosi, mupaka ukufika ku Kesaliya.