1 Abatumiwa poka nabakamu aba mu Yudeya bakakifwa ukuti abapanja bope bakapokela amasyu agha Chala. 2 Bo u Pitala abuka ku Yelusalemu, po bo bakasilimuliwa bakamususya, 3 bakati, "Ukingila mu nyumba ya bandu bo batasimuliwe nu kulya nabo poka."

4 Po u Pitala akabalingannya fyosi fyo fikabombiwa ukwandila ko kubwandilo, akati, 5 "Une ngaba mu kaya aka Yopa ngiputagha, ngatesya ichiseteka, ngatesya ichindu chimo cho chikaboneka ngati cho chimwenda ichikulu, cho chikakoliwa mumbali syosi folo chikwika kumwanya nukwisa pa une. 6 Ngaketelesya ngani mukati nu kutesya ifinyamana ifya finama folo ifya muchisu, nifya mungolongo, fyo fikwendela ifukwe, sona nifiyuni fya mumwanya. 7 Po ngifwa isyu likuyugha likuti, Pitala nyamuka! Ghogha ulye.’ 8 Loli ngamula ngati, ‘Awe, Malafyale, pakuti ifindu fyo fili mwiko sona fyo finyalite fitingile lumo mu mulomo wangu.’ 9 Isyu likifwika sona ilya bubili ukufuma kumwanya, likati, ‘Fyo u Chala pala afiswepesya, utakati finyalite.’ 10 Sisisi sikabombiwa katatu, po fyosi fikanyamuliwa sona ukubuka kumwanya. 11 Po pakabalilo kala kala abandu batatu bakafika pa nyumba yo tukabamo, bakatumiwa ku une ukufuma mu Kesaliya. 12 Po u Mbepo akambusya une akati, ‘Mbuke nabo ukusita kukayikila. Abawamwitu aba sikisi tukabuka nabo poka nu kwingila mu nyumba ya mundu yula. 13 Po akatubusya mo akatesekesya u wandumi imilile mu nyumba yake nu kumubusya ukuti, ‘Tuma umundu ku Yopa ukuti amwitisye u Simoni yo bakuti Pitala, 14 akwisa pakubabusya amasyu gho ghakwisa pakupoka uwe na ba munyumba yako bosi.’ 15 Bo nanda pakuyugha, u Mbepo Mwikemo akika papabo ngati twetwe ku bwandilo. 16 ✝Po ngakumbuka syo u Malafyale akayugha ukuti, ‘U Yohani akosya na misi, loli umwe mukwisa pakosiwa nu Mbepo Mwikemo. 17 Po pala u Chala akabapa abanja ichabupe ngati cho akatupa utwe, tukasubila u Malafyale u Yesu Kilisitu, Po une ngaba ne wenu ukuti mukanile u Chala?"

18 Bo bifwa sisisi, bakaleka pakususya, bakamupala u Chala bakati, "Po u Chala abapile abapanja ulusako lwa kupindukila ku bumi."

19 ✝Abitiki bo bakanyambana chifukwa cha kufwimiwa ko kukaba kwa Sitefani, bakenda mupaka bakafika ku Fonika, mu Sayipulasi, na mu Andiyokiya, ukusita kumubusya yumo isyu, loli ku ba Yuda bene. 20 Loli abitiki, bo bakafuma ku Sayipulasi na ku Kileni, bakabuka ku Andiyokiya nukuyugha na ba Giliki, sona na pakulumbilila Amasyu Amisa agha Malafyale u Yesu. 21 Po amaka gha Malafyale ghakaba nabo, sona abingi bakusubila nukupindukila kwa Malafyale.

22 Akapango kaka, kakifwika mumakutu gha chipanga cha mu Yelusalemu, sona bakamutuma u Balanabasi ku Andiyokiya. 23 Bo afika nu kutesya ichisa cha Chala, akahoboka nu kubakasya bosi ukuti bamukakamile u Malafyale nu moyo wabo ghosi. 24 U Balanabasi akaba mundu mwisa, yo akisula nu Mbepo Mwikemo nu lwitiko, sona abandu abingi bakapindukila kwa Malafyale.

25 Po u Balanabasi akabuka ku Talisa pakumulonda u Sabuli. 26 Bo amwagha akabuka nawe ku Andiyokiya, pakuti ichinja chosi bakaba poka mu chipanga nu kumanyisya ichilundilo cha bandu, po mu Andiyokiya momo abamanyili bakandila pakwitisiwa ukuti ba Kilisitu.

27 Akabalilo kala kala, bamo abasololi bakika ukufuma ku Yelusalemu nukubuka ku Andiyokiya. 28 ✝Po yumo mumwabo, yo akaba we Agabasi, akasolola mwa Mbepo ukuti kuyukuba isala ingulu pa chisu cha pasi chosi, po isala iyi yikisa pakabalilo ka kalabudiyasi. (Kaba kabalilo bo Kalabudiyasi we malafyale.) 29 Po Abamanyili bakifwana ukuti wesi atume chosi cho angaba nacho ukubatula abakamu bo bakwikala mu Yudeya. 30 Bakabomba isi, pakubatumila ifyabupi abasongo ba muchipanga ukwendela mwa Balanabasi nu Sabuli.