1 Po umuputi usongo akamulalusya u Sitefani akati, "Imba isi syabwanaloli?"

2 Po u Sitefani akamula akati, "Mwee bakamu bangu na batata, muteghelesye! U Chala uwa bughindikiwa akamubonekela utata u Abulahamu bo ali muchisu cha Mesopotamiya, bo akali atabukite muchisu cha Halani, 3 po akamubusya akati, ‘Fumamo muchisu chinyu na kubakamu bako, ubuke ku chisu cho nguya pakulangisya uwe. 4 Po akafumamo muchisu cha Akaladeya nukubuka pakwikala mu Halani. Bo uwise afwa, u Chala akamusamikisya muchisu ichi, cho umwe mukwikalamo losulu. 5 Atakamupako napo buyo ubwakuti apyane ukuti bube bwake, napo katamba koka, loli u Chala akapangana pakumupako ichisu ichi, sona ukuti chibe chake nuluko lwake lolukumukonga, napo atakaba nu mwana. 6 U Chala akayugha nawe musila iyi, abaluko lwako bakwisa pakwikala muchisu icha chigheni, kula kula bayukuba basya nu kubayifya ifinja folo handeledi. 7 ‘Loli ngwisa pakubafunda abandu bo bakwisa pakubombelagha ngati basya, panyuma pake bakwisa pakufumamo muchisu chila chila nu kunyiputa pabuyo ubu. 8 Po akamupa u Abulahamu ipangano lya kusilimula, po u Abulahamu akapapa u Ayizeki, akasilimuliwa bo pakilapo usabata weka ukwandila pisiku lyo akapapiwa. U Ayizeki akapapa u Yakobo, po u Yakobo akapapa abanyenya bitu twelovu.

9 Po abana ba Yakobo bala bakaba nakabini nu wamwabo u Jozefu, bakamughulisya ngati musya mu Ijiputi, loli u Chala akaba nawe, 10 Nukumupoka kundamyo syake syosi, akamupa ichisa namahala pamaso pa Falabo umalafyale wa mu Ijiputi. Po u Falabo akamubika u Jozefu pakuba mulaghili wa mu Ijiputi napa nyumba yake yosi. 11 Po isala yikawa muchisu chosi icha mu Ijiputi nu Kenani, yo yikisa ni ndamyo ingulu ngani, umwakuti abanyenya bitu bakapotwa pakuchagha ichakulya. 12 Bo u Yakobo ifwa ukuti muli ichakulya mu Ijiputi, akabatuma abanyenya bitu pa bulendo ubwakwanda. 13 Pa bulendo bwabo ubwabubili u Jozefu akilangisya mwene ku bawamwabo bake, po uluko lwa Jozefu lukamanyikwa kwa Falabo. 14 Po u Jozefu akatuma kwa wise u Yakobo, pakumubusya ni nyumba yake yosi, abandu bosi poka bakaba sevenite fayivi ukwisa ku Ijiputi. 15 Po u Yakobo akabuka ku Ijiputi, ko akafwila kuko poka na banyenya bitu, 16 Imifimba yabo yikanyamuliwa ku Sekemu, mo bakabasila mwipumba lyo u Abulahamu akaghula ni ndalama ku bana ba Hamoli mu Sekemu.

17 "Loli bo akabalilo kakwana akakuti u Chala abombe ipangano lyo akapangana nu Abulahamu, abandu bitu mu Ijiputi bakabala ngani, 18 ukufika po akabonekelagha umalafyale uyungi mu Ijiputi, yo atakamumanya u Jozefu. 19 Umwene akabenda pasi abaluko lwitu, nukubafyenga abatata ukuti bataghe aba bonda babo ukuti bafwe. 20 Kakaba kabalilo ko u Mozesi akapapiwa, umwana umumoghi ngani. Akaleliwa mu nyumba ya wise imyesi mitatu, 21 bo ataghiwa, umwana wa Falabo umulindu akamuseba nukumulela ngati mwana wake. 22 Po bakamumanyisya u Mozesi amahala ghosi agha mu Ijiputi, sona akaba wamaka mu masyu na mumbombo syake. 23 "Bo u Mozesi afika ifinja fote, akinong’ona pakubendela abakamu bake, abana ba Izilayeli. 24 Akatesya yumo uwa mu chisu cha Ijiputi akumuyifya yumo umukamu wake, akabuka pakumupoka nukutanisya pakumughogha umundu wa mu Ijiputi. 25 U Mozesi akinong’ona ukuti abakamu bake bakasyaghannya ukuti u Chala akamutuma pa kubapoka mundamyo syabo, loli batakamanyagha. 26 Po ilya ningelo lyake akabatesya abanya Izilayeli babili bakulwa bene bene, akaghesya pakubamanyannya. Akayugha akati, ‘Mwe banalume, mwe bana mundu, po imba choni cho mukulwa bububu?’ 27 Loli yo akamubombela umunine ichibibi, akamusungila u Mozesi kumbali nukumulalusya ukuti, ‘Imba wenu yo akakubika uwe pakuba mulongosi sona mulongi pakati pitu? 28 Imba ukulonda pakungogha ukuyana namo ukamughoghela umundu wa mu Ijiputi yula mumasuba?’ 29 Bo u Mozesi ifwa sisisi, akakinda mu Ijiputi nukubuka pakwikala muchisu cha Midiyani. Kula kula akapapako abana babili.

30 Bo fyakilapo ifinja fote, uwandumi uwa kumwanya akamubonekela u Mozesi mu katengele akakwaka umulilo mulungalangala papipi nighamba lya Sinayi. 31 Bo u Mozesi atesya isi, akaswigha nafyo fikaboneka po akapalamila papipi ukuti aye atesye. Loli akifwa isyu lya Malafyale likuti, 32 ‘Une ne Chala uwa batata binyu, u Chala wa Abulahamu nu wa Ayizeki, nu wa Yakobo. U Mozesi akatetema nubogha, sona atakayimba pakutesyako. 33 Po u Malafyale akamubusya akati, ‘Fula isapato kufinama fyako, pakuti ubuyo bo wimililepo malo mikemo. 34 Natesya naloli ukutamiwa kwa bandu bangu aba mu Ijiputi. Nifwa ukudandabula kwabo, sona nisa pakubapoka. Sakuno losulu ukuti ngutume ku Ijiputi.’

35 "U Mozesi we yuyo aba mu Izilayeli bakamukana, nukuti, ‘Imba wenu yo akamubika pakuba mulongosi sona mulongi pakati pitu?’ Sona we yuyo u Chala akamutuma ukuti abe mulongosi sona mupoki ukwendela mu wandumi wa kumwanya yo akamubonekela mu katengele. 36 Weyo akabatangilila abandu ukufumamo mu Ijiputi, akabombagha ifiswigho ni fimanyilo mu Ijiputi na pa Nyanja Ingesamu, sona na mungolongo ifinja fote. 37 U Mozesi weyo akababusya aba mu Izilayeli ukuti, ‘U Chala akwisa pakubatumila u Musololi ukuyana namo akandumila une, ukufuma mu bandu binyu.’ 38 Weyo akaba muchipanga mungolongo poka nu wandumi yo akayugha nawe pighamba lya Sinayi, bo ali poka na batata bitu, yo akapokela amasyu amumi ukuti atupe utwe.

39 Loli aba tata bitu bakakana pakumwifwila, loli bakamusungila kumbali nu kunyokela kunyuma mu myoyo yabo ku Ijiputi, 40 bakayugha nu Aloni bakati, ‘Utupangile abachala bo bakwisa pakututangilila utwe, pakuti u Mozesi yo akatufumya mu Ijiputi, tutakumanya cho chapangiwa ku kwake. 41 Po mumasiku ghala ghala bakapanga ichifwani cha kawata nukubika ifyabupe ku chifwani chila chila, bakasekela nimbombo ya nyobe syabo. 42 Loli u Chala akabafwituka, nukubapa abene ukuti biputaghe bubu kundondwi isya kumwanya, ukuyana namo sisimbiliwe mwibuku lya musololi ukuti,

‘Imba mwabika ifinyamana kwa une fyo fighoghiwe

nu kubika ifyabupi ifinja fote mungolongo, mwe bamu nyumba ya Izilayeli?

43 Po mukasenya ichisakasa cha Moleki, nu lutondwi ulwa chala winyu u Lefani,

fifwani fyo mukapanga ukuti mufyiputaghe.

Po ngwisa pakubasamikisya ku butali ni chisu cha Babeloni.

44 "Abatata bitu bakaba ni chisakasa chakusimikisya mungolongo, mo yo akayughagha nu Mozesi, akamulaghila ukusenga ichisakasa ukuyana nichifwani cho akachitesya. 45 Panyuma pake abanyenya bitu bakachipokela ichisakasa chila ku batata babo. Bakachinyamula, bo bakubuka nu Yoswa pakufyula ichisu ku bapanja mo u Chala akabakisyangamo pamaso pa batata babo. Chikikala mula mula ukufika mu masiku gha Devedi, 46 yo akachagha ichisa pamaso pa Chala sona akasumagha ubuyo bwakwikalamo u Chala wa Yakobo. 47 Loli akaba we Solomoni yo akamusengela inyumba. 48 Loli uwa Pamwanya Ngani atakwikala munyumba syo sisengiwe ninyobe sya bandu, ngati mo umusololi akayughilagha ukuti,

49 ‘Kumwanya cho chitengo changu icha bunyafyale, sona ichisu ichapasi chakukanyapo ifinama fyangu.

Imba nyumba yiki yo mungasengela, akayugha u Malafyale,

pamo ubuyo bo imbaghile pakwikalamo buli ko kwighi? 50 Imba te nyobe yangu yipanga ifindu fyosi fififi?

51 "Mwe bakafu imyoyo umwe! Mwe imyoyo yinyu na makutu ghinyu ghali ngati bo bandu bo batakasilimuliwa, akabalilo kosi umwe mukukana u Mbepo Mwikemo, ngati mobakabombelagha abatata binyu, momo numwe mukubombela. 52 Imba kukabako umusololi yumo yo abatata binyu batakamuyifyapo? Bakabaghogha awandumi ba Chala bo bakafumusyagha ngani isya kwisa kwa mugholoke. Po ulu mwamubika munyobe sya balughu nukumughogha, 53 umwe mwemwe mukapokela indaghilo ngati mo chikapeghiwa na bandumi, loli mutakasisunga.

54 Bo abalongi bifwa kwa Sitefani, bakakalala nukusyeketula amino. 55 Loli nu bwisule bwa Mbepo Mwikemo, u Sitefani akatesya kumwanya nukutesya ubughindikiwa bwa Chala, sona nu Yesu imilile kunyobe indilo iya Chala. 56 Akati, Tesya, ngutesya kumwanya kwighukite, nu Mwana wa Mundu imilile kunyobe indilo iya Chala."

57 Loli abene bakakuta nisyu lya pamwanya nu kwighalila amakutu ghabo nu kumunyelela bosi poka. 58 Po bakamughusila kusi kwa kaya kala nu kumukoma na mabwe, abakamboni bakasungisya amalaya ghabo ku mulumyana ilita lyake we Sabuli. 59 Bo bakwendelela pakumukoma na mabwe, u Sitefani akiputa akati, "Wee Malafyale Yesu, pokela u mbepo wangu."

60 Po akafughamila pasi nukulila nisyu lya pamwanya ukuti, "We Malafyale, utakabape inongwa pa mbibi syabo isi." Bo ayugha sisi akafwa.