1 Bo isiku lya Pendekositi lyafika, abitiki bosi bakaba poka pabuyo boka. 2 Umwakukenusya bubu ichongo chikifwika ngati yo mbepo iyamaka iyakukuka ukufuma kumwanya nukwisula munyumba yosi mo bakikalagha. 3 Po bakatesya fimo fyo fikaboneka ku kwabo ngati syo ndimi sya mulilo, syo sikanyambana nukwikala pa wesi yo akaba mula mula. 4 Po bosi bakisula nu Mbepo Mwikemo, nukwanda pakuyugha mundimi isingi, ngati mo u Mbepo akababusikisya.

5 Pakabako aba Yuda bo bakikalagha mu Yelusalemu, na bandu bosi bo bakwiputa u Chala, bo bakafuma mufikolo fyosi ifya pachisu icha pasi. 6 Bo bifwa ichongo chila, ichilundilo ichikulu chikabungana. Bosi abandu bakaswigha, pakuti wesi umundu akifwa abitiki bakuyugha munjugha iyake. 7 Po bosi bakaswigha ngani sona chikabamala ngani amahala, bakayugha bakati, "Abandu aba, bosi bakuyugha teba Galileya? 8 Imba sili buli ukuti twebosi twifwe bakuyughila munjugha yitu yo tukapapiwa nayo? 9 Twe bamo twafuma ku Palitiya, Mediya na Elamu, ku Mesopotamya, Yudeya na ku Kapadoniya, ku Pondi na Asiya, 10 ku Filigiya na Pamufiliya, ku chisu icha Ijiputi na muchigaba cha Libiya uwa Kileni, na bagheni aba kufuma ku Lomu, 11 aba Yuda na bapanja bo bapindukila ku Chiyuda, sona twe twafuma ku Kileti na ku Alebiya, loli twebosi tukubifwa bakuyugha munjugha situ isya findu ifikulu fyo u Chala abombite!" 12 Bakaswigha ngani, sona chikabamala ngani amahala, bakayugha bene bene ukuti, "Imba ichi chikung’anamula choni?"

13 Loli bamo bakabaseka abitiki nukuti, "Abandu aba bakoliswe ubwalwa bwa mafilu!"

14 Loli u Pitala akimilila poka na batumiwa abanine leveni bala, akakwesya amasyu ghake nukubabusya ukuti, "Mwe bandu ba mu Yuda na mwebosi mwe mukwikala mu Yelusalemu, teghelesya ku masyu gho tinjughaghe. 15 Abandu aba batakoliswe ukuyana namo mukubinong’onela, pakuti akabalilo aka ka nayini okoloko pangelo. 16 Mubuyo bwake sisisi syosyo sikayughiwa nu musololi u Yowelo po akati, 17 mumasiku ghabumalilo u Chala akuti,

ngwisa pakupungulila u Mbepo wangu pa bandu bosi.

Abana binyu abanalume na bakolo

bakwisa pakusolola amasyu ghangu.

Abana abanalume bakwisa pakutesya ifisetuka,

sona abaghosi bakwisa pakulota ifilota.

18 Po bope na bambombo bangu abanalume na bakolo ngwisa pakubapungulila u Mbepo wangu mumasiku ghala ghala, po bayukusolola amasyu ghangu.

19 Ngwisa pakubomba ifika kumwanya

nukubomba ifiswigho pachisu cha pasi,

ibanda, umulilo ni lyosi ilingi,

20 isuba likwisa pakuba nichisi,

sona umwesi ghukwisa pakuba mukesamu ngati libanda,

bo litafikite isiku lya Malafyale ikulu nilya koghofya.

21 Sona wesi yo akwitisya pilita lya Malafyale akwisa pakupokiwa.

22 "Mwe banalume bamu Izilayeli, teghelesya amasyu agha, u Yesu wa mu Nazaleti akaba mundu yo imbombo syake isya maka sikalangisiwa nukusimikisiwa nu Chala kukwinyu mufika fyosi ni fiswigho fyo u Chala akabombelagha mumwake. Umwe mwebene musimenye sisisi pakuti sikabombiwa pakati papinyu. 23 ✝ U Yesu akapeghiwa kukwinyu ukuyana namo u Chala akabatikila nu kwinong’onelapo nganila. Umwe mukamughogha pakumubika mu nyobe sya bambibi ukuti akomeliwe pambinjika. 24 ✝Loli u Chala akamususya kubufwe, nukumuleka musatuke kumaka gha bufwe, pakuti sitakaba syakuti singabombiwa ukuti ubufwe bumupote. 25 Pakuti u Devedi akuyugha isya yuyo akati,

‘Ngamutesya u Malafyale pamaso ghangu akabalilo kosi,

ali kunyobe yangu indilo,

po ndangatamiwa.

26 Pololi umoyo wangu ghuhobokite, sona ululimi lwangu lukusekelela,

po umubili wangu ghuyukuba nu lusubilo, 27 Pakuti utakwisa pakundeka muchisu cha bafwe,

sona utasukwitikisya ukuti uwambombo wako umusubaliwa abolele mwipumba.

28 Undangisisye une isila sya bumi,

sona ukwisa pakunyisusya nu lusekelo pamaso ghako.

29 "Mwe bakamu bangu, mbaghile mbabusye pabwelu isya munyenya witu u Devedi, ukuti akafwa nukusiliwa, po ipumba lyake lili kuno nutwe mupaka pisiku ili. 30 Loli akaba musololi, sona akasimanya syo u Chala akapangana nawe mukufinga ukuti yumo uwaluko lwake akwisa pakupyana ubunyafyale bwake. 31 U Devedi akatesya nganila, nukuyugha isya kusyuka kwa Kilisitu, ukuti atakalekiwa muchisu cha bafwe, po umubili wake ghutakabola mwipumba. 32 U Yesu yuyu, u Chala akamususya ku bufwe, twebosi twe bakamboni ba findu fififi. 33 U Yesu akakwesiwa nukwikala ku nyobe indilo iya Chala, akapokela u Mbepo Mwikemo yo uwise akalaghisya, sona akapungulila cho umwe mukutesya nukwifwa. 34 Pakuti te we Davedi yo akakwela kumwanya, loli umwene akayugha akati,

"U Malafyale akati kwa Malafyale wangu,

ikala ku nyobe yangu indilo,

35 mupaka po nabika abalughu bako ngati cha kukanyapo ifinama fyako.

36 Pololi aba munyumba ya Izilayeli bosi bamanyile nganila ukuti u Yesu yo mukamukomela pambinjika, weyo u Chala amubika pakuba we Malafyale, sona we Kilisitu."

37 Bo abandu bifwa sisisi, sikabalasa mumoyo, po bakamulalusya u Pitala na batumiwa abangi bakati, "Bakamu bitu, imba tubombe choni?"

38 Loli u Pitala akababusya akati, mupinduke nu kosiwa mwebosi mwi lita lya Yesu Kilisitu, ukuti muhobokeliwe ku mbibi sinyu, po mukwisa pakupokela ichabupi cha Mbepo Mwikemo. 39 Pakuti ipangano lili ku umwe, na ku bana binyu, na kubosi bo bali kubutali, na bosi bo u Malafyale u Chala witu ayukubitisya."

40 U Pitala akababusya na masyu aghangi amingi aghakubasoka akati, "Mwipoke mwebene ku lufundo lo lukwisa pa bandu ababibi abangulilo iyi."

41 Po bosi bo bakapokela amasyu ghake bakosiwa, po bakongelelapo abandu fili sabuzandi pisiku lila lila. 42 Bakiyipa bene ku fimanyilo fyo abatumiwa bakamanyisyagha, bakaba poka pakumenyannya ichibama na munyiputo.

43 Abandu bosi bakisula nu bogha chifukwa cha fika nifiswigho fyo fikabombiwagha na batumiwa.

44 Abitiki bosi bakendelela pakuba poka, nukubeghana ifindu fyo bakaba nafyo. 45 Bakaghulisya imighunda yabo na fyosi fyo bakaba nafyo nukugaba indalama ukuyana namo umundu wesi akasobelwagha. 46 Po isiku ni siku bakakomanagha poka munyumba ya Chala, nukumenyannya ichibama munyumba syabo sona bakalya nulusekelo mumyoyo iya kwiyisya, 47 pakupalisya u Chala, nu kuba nichisa ku bandu bosi. Po isiku lyosi u Malafyale akongelesyagha ku kabukutila kabo abandu bo bakapokiwagha.