1 Mu masiku ghala ghala, ubwingi bwa bamanyili bukanda pakubalila balila, aba Yuda bamu Giliki bakadandabulagha na bayuda aba mu Hebeli chifukwa chakuti bakalufyagha pakubapakisya abafwilwe pafyakulya fya isiku ni siku. 2 Po abatumiwa twelevu bakitisya ichilundilo cha bamanyili nukubabusya ukuti, "Chite chisa ukuti utwe tuleke pakulumbilila amasyu gha Chala nukuti twikolesannye pakubeghannya icha kulya. 3 Pololi, bakamu bitu, musale abanalume seveni mumwinyu, bo biswile nu Mbepo Mwikemo na mahala, bobo tubabike pa mbombo iyi. 4 Loli utwe tukuya pakwiyula mukwiputa na kumbombo yakulumbilila amasyu."

5 Po amasyu gho bakayugha ichilundilo chosi chikahoboka nagho, po bakasala u Sitefani, umundu yo akisula nulwitiko sona nu Mbepo Mwikemo, nu Filipu, nu Pulokolasi, nu Nikanoli, nu Timoni, nu Palimela, nu Nikolayi, umundu yo ate mu Yuda uwa mukaya ka Andiyokiya yo akapindukila ku Chiyuda. 6 Po bakisa na bandu bala pamaso gha batumiwa, bo bakabiputila nukubabika inyobe papabo.

7 Po amasyu gha Chala ghakasata, nubwingi bwa bamanyili bukongelelapo ngani pakubala mu Yelusalemu, sona abaputi abingi bakifwila ulwitiko lwabo.

8 U Sitefani, umundu yo akisula nichisa na maka, akabomba ifiswigho ni fimanyilo ifikulu mu bandu. 9 Loli abandu bakamususya bo bakaba ba munyumba yakwiputilamo iya bandu ababuke (ngati mo bakitikisyagha) na ba Yuda aba mu Kileni, naba Alekizandiliya, nabo bakafuma ku Silisiya naba ku Asiya, bakasusannya nu Sitefani. 10 Loli bakapotwa pakususannya nawe pakuti akayughagha na mahala agha mwa Mbepo Mwikemo. 11 Po bakabanyengelela abandu bamo kubusyefu ukuti baye bayughe ukuti, "Tukamwifwa umundu uyu akuyugha amasyu ghakumusamula u Mozesi nu Chala."

12 Po bakabasambulannya abandu, abasongo na bamanyisi abandaghilo. Bakamukola u Sitefani nukwisa nawe pamaso gha balongi, 13 bakabika abakamboni abamyasi ukuti bamutamandile u Sitefani, bo bakayugha ukuti, "Umundu uyu atakuleka pakuyugha amasyu gha kutuka Inyumba ya Chala sona ni ndaghilo sya Mozesi. 14 Pakuti tukamwifwa akuyugha akuti, u Yesu uwa mu Nazaleti uyu akwisa pakunangannya amalo nu kwandula imiteto yo u Mozesi akatupa!"

15 Bosi bo bakikala pa malo gha balongi bakamulolelesya u Sitefani, sona bakatesya icheni chake ngati cho cheni cha wandumi.