1 Po u Agilipa akamubusya u Pabuli akati, "Witikisiwa pa kwiyughila wemwene." Po u Pabuli akagholosya inyobe yake nukwipoka mwene ngati bo ulu:

2 "We Malafyale Agilipa, kwipima ukuti ne walusako ukuti umusughu nipoke ne mwene pamaso papako pafindu fyosi fyo aba Yuda bakunjughila nafyo, 3 ngani ngani pakuti umenye akisa imiteto ya Chiyuda na matata ghabo ghosi. Po ngukusuma ukuti undeghelesye nu bololo.

4 "Aba Yuda bosi babumenye ubumi bwangu ukwandila ku bwana bwangu, ukufuma pabwandilo bwa bumi bwangu mukaya ka Yelusalemu. 5 ✝Bamenye ukwandila ko kubwandilo, pala bakulonda bangasimikisya, ukuti ukwandila ko kubwandilo nikile ngati mu Falisayi ukuyana nindaghilo sya chiputo chitu. 6 Po ipano nimilile pano pakulongiwa chifukwa cha kusubila ipangano lyo u Chala akapangana na banyenya bitu, 7 ulu ifikolo fitu twelevu fikusubila ukufyagha, bo fikwiyula pakumubombela u Chala umusanya nu busiku, nu lusubilo lululu bakundonga aba Yuda, we Malafyale. 8 Choni cho mukuchagha chipala pala ngani pakusubila ukuti u Chala akususya abafwe?

9 ✝ "Nune bubu nginong’ona ukuti mbaghile pakubomba chosi cho ningabomba pakususya ilita lya Yesu uwa mu Nazaleti. 10 Cho cho ngabomba mu Yelusalemu. Ngapokela ubulaghili ubwa baputi abasongo nukubighalila abandu abisa aba Malafyale mujela, sona bo bakughoghiwa, nune bubu ngitikisyagha. 11 Utubalilo utwingi ngabafundagha mu nyumba syakwiputilamo nukughesya pakubafyenga ukuti bamusamule u Yesu, ngabakalalila ngani umwakuti ngabukagha na mutwaya twakusi pakubafwima.

12 Ichi cho chifukwa cho ngabukila ku Damasika nu bulaghili, sona ni ndaghilo sya baputi abasongo. 13 Malafyale, bo isuba lyafika pamutu, bo indi musila, ngatesya ubwelu ukufuma kumwanya, bukwaka ngani ngati lisuba, bukambalila ukusyungulila une poka nabo ngaba nabo. 14 Po twe bosi tukawa pasi, ngifwa isyu likuyugha nune mu Chiyuda likuti, ‘We Sabuli, we Sabuli, choni cho ukufwima? Ukwifulasya wemwene ngati yo ngambaku yo yikubaya ichipimbili. 15 Po ngalalusya ngati, ‘Imba we wenu, Malafyale?’ Po u Malafyale akamula akati, ‘Une ne Yesu yo ukumufwima. 16 Loli nyamuka nukwimilila, pakuti nakubonekela ukuti ngubike pakuba mubombi wangu nu kamboni wa syo watesya nisya une, sona nasyo ngwisa pakwilangisikisya mu mwako. 17 Ngwisa pakupoka uwe ku bandu bako naba panja ko ngwisa pakukutumako, 18 ukuti ubighule amaso ghabo umwakuti bafumeko ku chisi nukwisa ku bwelu, sona ukuti bafumeko kumaka gha satana ukuti bise kwa Chala, umwakuti imbibi syabo sihobokeliwe, sona nukupokela ubuyo pakati pa bandu bo basaliwa chifukwa cha lwitiko lwabo mu mwangu.

19 Pololi, we Malafyale Agilipa, ndakaleka pakwifwila ichisetuka cha kumwanya. 20 ✝Loli nganda pakulumbilila mu Damasika, na mu Yelusalemu, sona namosi mu Yudeya, na ku bapanja bosi ukuti bapinduke nukunyokela kwa Chala, nukubomba ifindu fyo fingalangisya ukuti naloli bapindukite. 21 Ichi cho chifukwa cho aba Yuda bakangola bo indi mu nyumba ya Chala nukughesya pakungogha. 22 Loli mupaka ni siku ili u Chala anyafwa, po nimilile pano pakusimikisya pa bapala na pa basongo, syo nguyugha siyanite bubu nasyo abasololi nu Mozesi akayugha ukuti fikwisa pakubombiwa; 23 ✝ukuti u Kilisitu abaghile pakutamiwa, sona ukuti umwene abe wakwanda pakusyuka ku bufwe, ukuti alumbilile ubwelu ku bandu bake na ku bapanja."

24 Bo u Pabuli akwipoka mwene, u Fesita akayugha nisyu lya pamwanya akati, "We Pabuli, upenite bati! Ukumanyila kwako kwa pamwanya kwakupennya. 25 Loli u Pabuli akamula akati, "Awe, ndapenite, we mughindikiwa Fesita, loli syo nguyugha sya bwanaloli sona sya mahala. 26 Pakuti u Malafyale afimenye fyosi fififi, sona nguyugha nawe ukusita koghopa, pakuti simenye ukuti chitaliko nachimo cho utachimenye, pakuti ichi chitakabombiwagha kubusyefu. 27 Malafyale Agilipa, imba ukusubila abasololi? Simenye ukuti ukusubila."

28 Po u Agilipa akamulalusya u Pabuli akati, "Imba ukwinong’ona ukuti pakabalilo akapimba kakaka ungannyengelela pa kuba mu Kilisitu?"

29 U Pabuli akamula akati, "Napo kabalilo kapala pamo katali, ngwiputa kwa Chala ukuti umwe mwe bosi mwe mukundeghelesya ipano mube ngati nene, loli ukutisyako syene imbingu.

30 Po umalafyale, umulaghili wa chisu, u Belenike na bandu bosi bakimilila, 31 bo bafumamo munyumba bakayughisannya bene bene bakati, "Umundu uyu atanangitepo nachimo cho abaghile pakufwa nacho pamo pakubikiwa mujela." 32 Po u Agilipa akamubusya u Fesita akati, "Umundu uyu ngali asatuliwa pala atakalondagha ukuti inongwa yake yilongiwe nu Kesali."