1 Bo u Apolo ali mu Kolindi, u Pabuli akapulusannya mukaya ka kumitu nukufika ku Efeso, ko akabagha abamanyili bamo, 2 po akabalalusya akati, "Imba mukapokela u Mbepo Mwikemo bo umwe mwasubila?" Bakamula bakati, "Awe, tutifwile lumo ukuti kuli u Mbepo Mwikemo."

3 Po u Pabuli akabalalusya akati, "Imba losyo luki lo mukosiwa nalo?"

Bakamwamula bakati, "Ulosyo lwa Yohani."

4 ✝U Pabuli akati, "U Yohani akosyagha ulosyo lwa lupinduko, akababusya abandu ukuti basubile yo akwisa panyuma pake, yo we Yesu."

5 Bo bifwa sisisi, bakosiwa mwilita lya Malafyale u Yesu. 6 Bo u Pabuli abika inyobe syake papabo, u Mbepo Mwikemo akisa papabo, po bakanda pakuyugha mundimi imbya, nukusolola. 7 Bosi poka bakaba ngati abanalume twelovu.

8 Po u Pabuli akingila mu nyumba yakwiputilamo, akayugha nubukifu imyesi mitatu, akayughisannya nu kubannyengelela nisya Bunyafyale bwa Chala. 9 Loli bamo bakaba nimyoyo imikafu, nukusita kusubila, bakayiyugha ububibi Isila ya Malafyale pamaso gha bandu, po u Pabuli akabaleka nukubasenya abamanyili nukubuka nabo, amasiku ghosi akabamanyisyagha munyumba ya Tilanasi. 10 Akabomba bububu ifinja fibili, umwakuti bosi bo bakikalagha mu Asiya bakifwa isyu lya Malafyale, aba Yuda na ba Giliki.

11 U Chala akabomba ifiswigho ifipalapala ni nyobe sya Pabuli, 12 umwakuti ututambala na malaya agha kufuma mu mubili wake, ghakabikiwagha pa babine, po bakapolagha, sona nimbepo imbibi sikafumagha mumwabo. 13 Loli aba Yuda bamo abakwembela, bakafumyagha imbepo imbibi, bakaghela pakubombesya ilita lya Malafyale u Yesu kubo bakaba nimbepo imbibi, bakati, "Mwilita lya Yesu yo u Pabuli akulumbilila, ngukulamula ukuti ufumemo." 14 Abana abanalume seveni aba Sikeva, umu Yuda, usongo wa baputi bobo bakabomba sisisi.

15 Po imbepo imbibi yikabamula yikati, "U Yesu mumenye, sona nu Pabuli mumenye, loli imba umwe mwe ba wenu?"

16 Po umundu yo akaba nimbepo imbibi akabanyelela nukubapota bosi. Akabachaya bosi umwakuti bakakinda munyumba yila bo batafwete nachimo, sona bo bafulalite. 17 Syosi sisisi sikamanyikwa ku ba Yuda na ba Giliki bo bakikalagha ku Efeso, po ubogha bukabagha bosi, ilita lya Malafyale u Yesu likaghindikiwa ngani. 18 Po abingi bo bakasubilagha bakisa, bakitika nukwilata imbibi syosi syo bakabombagha. 19 Po abingi bo bakabombagha ifyamayele bakabunganika poka amabuku ghabo nukocha pamaso gha bosi, po bakabelengela umutengo wake, bakasyagha indalama sya masalabasya fifite sabusani. 20 Po isyu lya Malafyale likasata sona likaba namaka.

21 Bo ifindu ifi fyabombiwa, u Pabuli akinong’onela mwa Mbepo pakubuka ku Yelusalemu, pakupulusannya mu Makedoniya na ku Akaya. Akati, "Bo nikalako kula kula, mbaghile pakubuka sona mu Loma." 22 Po akatuma abafwilisi bake babili u Timoti nu Elasitasi ku Makedoniya, po umwene akikalako akabalilo akatali mu Asiya.

23 Pakabalilo kala kala kukaba ifyongo ifikulu ngani chifukwa cha Sila ya Malafyale. 24 Pakuti umundu yumo yo bakatingi Demetiliyo yo akasyana utufwani twa siliva utwa nyumba ya chala u Alitemi, po imbombo yake yikingisya indalama inyingi ngani ku babombi bake. 25 U Demetiliyo akababungannya bosi poka, na babombi bo bakayana bubu nabo, akababusya akati, Mwe banalume, musimenye ukuti ubukabi bwitu bukufumila mumbombo yiyiyi. 26 Sona mukutesya nu kwifwa ukuti teko ku Efeso kwene, loli muchisu chosi icha Asiya, u Pabuli yuyu akabannyengelela nukubapindula abandu abingi, nukuyugha ukuti tebo ba chala aba bo bakupangiwa ni nyobe. 27 Ubupala pala te bwakuti imbombo yitu yingayweluka yene awe, loli buliko sona na ku nyumba ya chala witu umukolo u Alitemi, bo bukwisa pakuba bwa bu, po weyo ayukwisiwa ubwa songo bwake, yo bosi aba Asiya ni chisu chosi ichapasi bakumwiputa."

28 Bo bifwa sisisi, bakakalala ngani, nukwanda pakukuta ukuti, "Umukulu we Alitemi wa ku Efeso!" 29 Po akaya kosi kakisula ni fyongo, bakamukola u Gayi nu Alisitalika, abandu aba ku Makedoniya bo bakendagha poka nu Pabuli, bakakindila kubuyo bwa nyangalo. 30 Po u Pabuli akalondagha pakubuka mu chilundilo cha bandu, loli abamanyili batakamwitikisya. 31 Bamo aba songo aba mu Asiya, bo bakaba bamanyani bake, bakamutumila amasyu aghakumusoka ukuti atakingilemo mubuyo ubwa nyangalo. 32 Po ulukomano lwabo losi lukaba nifyongo fyene, bamo bakakutagha ichindu choka, abanine ichingi pakuti abingi batakamanya ichifukwa cho bakabunganila. 33 Aba Yuda bakamusungila kundasi u Alikizandala, po bamo muchiludilo bakamubusya isyakuti nene, u Alikizandala, akabatebesya ichongo ni nyobe yake nukughesya pakuyugha amasyu ghakwipoka mwene. 34 Loli bo basyaghannya ukuti mu Yuda, po bakakuta ngani bosi isyu lyoka pa ma awala mabili ukuti, "Umukulu we Alitemi wa mu Efeso!"

35 Po umusimbi wa kaya kala kala akatebesya ichilundilo nukubabusya ukuti, "Mwe bandu ba mukaya ka Efeso, we wenu yo atasimenye ukuti akaya ka Efeso ko kakusungilila inyumba ya chala u Alitemi, nichifwani cho chikawa ukufuma kumwanya. 36 Pololi nayumo yo akusikana sisisi, po mubaghile mube myee, sona mutakabombe ifindu umwakupulughana. 37 Pakuti mwisa na bandu aba kuno napo batibite nachimo mu nyumba ya chala pamo ukumusamula u chala witu. 38 Pala u Demetiliyo nabafundi abanine bali ni nongwa nu mundu yumo, tuli nabalongi na amabuyo aghakulongelapo inongwa ghalipo, po bangabuka kula kula nukulonga inongwa syabo. 39 Loli pala muli nasyo isingi syo mukulonda, sibaghile siyughiwe palukomano lo lwitikisiwe ni ndaghilo. 40 Pakuti pali ubupala pala ubwakuti tungalongiwa nabo chifukwa cha syo sikubombiwa umusughu, patalipo ichifukwa ichenecho cho tungalingannya nifya chongo chichichi."

41 Bo ayugha sisisi, akababwesya abandu.