1 Bo akupulusannya, akamutesya umundu yo akaba mufwamaso ukufuma mo akapapiliwa. 2 Abamanyili bake bakamulalusya bakati, "Mumanyisi, imba we wenu yo akananga, umundu uyu pamo bapapi bake, ukuti apapiwe mufwamaso?"

3 U Yesu akabamula akati, "Atakaba weyuyo, pamo bapapi bake bo bakananga. Loli ichi chikabombiwa ukuti imbombo sya Chala sibonekelemo mumwake. 4 Bo kukali kwelu tubaghile pakubomba imbombo ya yo akanduma. Ubusiku bukwisa bo nayumo umundu angabomba imbombo. 5 Pakwikala une muchisu chapasi, ne bwelu bwa muchisu chapasi."

6 Bo ayugha sisisi, u Yesu akafwina amati pasi, akakandannya ilongwi na mati ghala, po akamupaka umundu yula ni longwi mumaso, 7 akayugha ku kwake akati, "Bukagha uye usukusule muchisiba cha Silowamu." (Cho chikung’anamula ukuti ukutumiwa). Po akabuka nukuya pakusukusula kumaso, po akanyokela bo akutesya.

8 Abapalamani bake na bandu bo bakamutesyagha bwile bo akusuma suma bakalalusya bakati, "Imba te weyo akikalagha akasuma sumagha?" 9 Bamo bakayugha ukuti, "We yuyo." Bamo bakati, "Awe, Bakolanite bubu nawe." Loli umwene akababusya akati, "Nene."

10 Bakayugha ku kwake bakati, "Imba amaso ghako ghakutesya buli buli?"

11 Umwene akamula akati, "Umunndu yo bakuti Yesu, akakanda ilongwi nukumbaka ku maso, akambusya akati, ‘Bukagha kasukusule kumaso muchisiba cha Silowamu. Po ngabuka nukusukusula kumaso, po ghakanda pakutesya.’"

12 Po bakati ku kwake, "Imba ali ko kwighi umundu yuyuyu?"

Akayugha akati, "Ndamenyeko."

13 Abandu bakamubika ku Bafalisayi umundu yo kale akaba mufwamaso, 14 chifukwa likaba lisiku lya kutusya lyo u Yesu akakandannya ilongwi nukuposya umundu yula. 15 Abafalisayi bakamulalusya sona namo amaso ghake ghakighukila. Po umwene akababusya akati, "Akambaka ilongwi mumaso ghangu, po ngasukusula kumaso, po ipano ngutesya."

16 Bamo Abafalisayi bakayugha bakati, "Umundu uyu atafumite kwa Chala ukunangannya ululaghilo lwa lisiku lyakutusya." Loli bamo bakayugha bakati,

"Imba umundu wa mbibi angabomba ifiswigho? Po bakagabingana bene."

17 Bakayugha sona ku mundu umufwamaso yula bakati, "Imba uwe ukuyugha choni nisya mundu uyu, pakuti ukuti akakwighula amaso?" Akamula akati, "We musololi."

18 Abalongosi aba Chiyuda batakalondagha pakusubila ukuti akaba mufwamaso, sona ipano akutesya, mupaka bakabitisya abapapi ba yo akighuka amaso, 19 bakabalalusya abene akati, "Imba uyu mwana winyu, yo mukuti akapapiwa mufwamaso, po akutesya buli buli?"

20 Abapapi bake bakamula bakati, "Tusimenye ukuti mwana witu, sona tusimenye ukuti akapapiwa mufwamaso, 21 loli tutakumanya namo akutesekesya ipano, pamo tutakumumanya yo akamwighula amaso ghake, mulalusye yuyo. Pakuti wepe we songo angiyughila mwene." 22 Abapapi bake bakayugha isi chifukwa chakuti bakaboghopagha abalongosi ba Chiyuda, pakuti ablongosi aba Chiyuda bakapangana kale ukuti umundu wesi yo akwisa pakwitikisya ukuti u Yesu we Kilisitu, akwisa pakwepusiwa munyumba yakwiputilamo. 23 Cho chifukwa abapapi bake bakayugha bakati, "We mundu usongo, mumulalusye yuyo."

24 Po bakamwitisya sona ulwa bubili umundu yo akaba mufwamanso nukuyugha ukuti, "Lapa pamaso pa Chala ukuti ukwisa pakuyugha ubwanaloli. Utwe tusimenye ukuti umundu uyo wambibi."

25 Po umwene akamula akati, "Pakuti wambibi, ndasimenye. Ichindu choka cho njimenye chakuti ngaba mufwamaso, loli ipano ngutesya."

26 Po bakamulalusya umwene bakati, "Imba abombite choni ku kwako? Akakwighula buli buli amaso ghako?"

27 Akabamula abene akati, "Mbabusisye kale, loli mutakulonda ukwifwa. Imba choni cho mukulonda ukuti mwifwe sona? Imba numwe mukulonda ukuba bamanyili bake?"

28 Po abene bakamutuka bakati, "Uwe we mumanyili wa mundu uyu, loli utwe twe bamanyili ba Mozesi. 29 Tusimenye ukuti u Chala akayugha nu Mozesi, loli isya mundu uyu tutasimenye, nako afumite tutamenyeko!"

30 Umundu yula akabamula akati, "Ichi chakuswighisya ngani pakuti umwe mutamenyeko ko akafuma, loli akanyighula amaso. 31 Utwe tusimenye ukuti u Chala atakwifwa abambibi, loli akwifwa mundu wesi yo akwiputa u Chala nukubomba syo akulonda. 32 Ukwandila po pabwandilo bwa chisu chapasi tutifwilepo lumo ukuti umundu amwighula amaso yo akapapiwa mufwamaso. 33 Pala umundu uyu atakafumagha kwa Chala, atangabomba nachimo."

34 Abene bakamula bakati, "Uwe ukapapiwa mumbibi, imba ukulonda ukutumanyisya utwe?" Po bakamufumya kusi munyumba ya kwiputilamo.

35 U Yesu akifwa ukuti umundu yula bamufumyamo, bo amwagha akati, "Ukumusubila u Mwana wa Mundu?"

36 Akamula akati, "Imba we wenu yuyuyo, Malafyale, mbusya ukuti nune musubile."

37 U Yesu akamubusya akati, "Wa mutesya, yo akuyugha nawe weyuyo." 38 Po umundu yula akati, "Malafyale, ngusubila." Po akamufughamilila nukumwiputa.

39 U Yesu akati, "Ngisa muchisu chapasi pakulonga umwakuti abafwamaso batesye, sona bo bakutesya babe bafwamaso."

40 Abafalisayi bamo bo bakaba nawe pala-pala bakifwa amasyu ghake nukumulalusya ukuti, "Imba utwe twe bafwamaso?"

41 U Yesu akati, "Pala mukabanga bafwamaso ngali te mwe bambibi. Loli mukwiyugha mwebene ukuti, Tukutesya, cho chikung’anamula ukuti mukali mwe bambibi."