1 Panyuma pa isi, u Yesu akababonekela sona abamanyili bake ku nyanja ya Tibeliyasi, akababonekela ngati musila iyi. 2 U Simoni Pitala akaba poka nu Tomasi (yo bakatingi Mapasa), nu Nataniyeli yo akafumagha mukaya ka Kana mu Galileya, na bana ba Zebediya na bangi abamanyili babili bakaba poka. 3 U Simoni Pitala akababusya abanine akati, "Nabuka pakuloba iswi." Bakamwamula bakati,

"Tukubuka poka nuwe." Bakafuma nukuya pakukwela mu bwato, loli ubusiku bulabula batakakolapo nasimo. 4 Bo kwacha pangelo, u Yesu akimilila mumbali mwa nyanja, loli abamanyili bake batakamumanyagha ukuti we Yesu. 5 U Yesu akabalalusya akati, "Mwe bamanyani, imba muli nayo iswi?"

Bakamwamula bakati, "Awe."

6 Akababusya akati, "Ponnya ichilepa chinyu kumbali ya nyobe indilo mubwato, timukole simo iswi." Bo bakaponnya ichilepa chabo, po bakapotwa pa kughusa ichilepa chifukwa cha bwingi bwa swi.

7 Po umumanyili yo u Yesu akamughana ngani akamubusya u Pitala akati, "We Malafyale!" Bo u Simoni Pitala ifwa ukuti we Malafyale, akafwala ilaya lyake ilya kusi, pakuti akafula ilaya lya kusi, po akitaghila mumisi. 8 Loli abamanyili abangi bakisa mubwato, bakughusa ichilepa cho chisula niswi. Batakaba pabutali na pabwima ubwa kuyana na mamita wanu handiledi. 9 Bo baya pabwima bakatesya iswi pamulilo uwa amababu, sona ni chibama. 10 U Yesu akababusya akati, "Sanasyo simo iswi syo mwakola losulu."

11 Po u Simoni Pitala akingila mubwato akaghusila ichilepa pabwima cho chikasyala niswi ingulu, syo sikaba wanu handiledi fifite fili, napo sikaba nyingi ichilepa chitakanyepuka. 12 U Yesu akababusya akati, "Sakuno tulye ichakulya chapangelo." Nayumo umumanyili yo akamulalusyapo ukuti, "We wenu?" Chifukwa bakamumanya ukuti we Malafyale. 13 U Yesu akisa, akasenya ichakulya nu kubapa. Sona akabomba bubu syope niswi.

14 Aka kakaba kabalilo kabutatu ukuti u Yesu ababonekele abamanyili bake bo asyuka ku bufwe.

15 Bo bamala pakulya, u Yesu akamulalusya u Simoni Pitala akati, "Simoni, mwana wa Yohani, imba unganite une ukukila abanyako aba? U Simoni akamula akati,

"Inga, Malafyale, usimenye ukuti une ngughanite uwe."

U Yesu akati, "Lisya utwana twa ng’osi syangu." 16 Akamulalusya sona ulwa bubili akati, "Simoni Mwana wa Yohani, Imba unganite une?" U Simoni akamula akati,

"Inga we Malafyale, usimenye ukuti ngughanite uwe."

U Yesu akamwamula akati, "Sunga ing’osi syangu." 17 U Yesu akamulalusya ulwa butatu akati, "Simoni, Mwana wa Yohani, imba unganite une?"

U Pitala akasulumannya chifukwa u Yesu akamulalusya ulwa butatu ukuti, "Imba unganite une?" U Pitala akamula akati, "Malafyale, usimenye syosi. Usimenye ukuti une ngughanite uwe.

U Yesu akamubusya akati, "Lisya ing’osi syangu. 18 Naloli ngukubusya uwe, bo we mupala ukafwala we mwene ulamba wako nukubuka wemwene kosi ko ukulonda, loli pala wisa waba mughosi ukwisa pakugholosya we mwene inyobe syako, po umundu uyungi akwisa pakufwika ulamba mumusana, nukubuka ko uwe utakulonda pakubukako." 19 (U Yesu akayugha sisisi pakumulangisya u Pitala mo akwisa pakufwila nu ukumughindikilamo u Chala.) Po akayugha ku kwake akati, "Ngonga!"

20 U Pitala akaghalabuka, akamutesya umumanyili yo u Yesu akamughana, akubakonga, yo akamweghamila u Yesu pachifuba bo bali pakulya ichakulya cha pabusiku akati, "Malafyale we wenu yo akwisa pakukubika munyobe sya balughu?" 21 Bo u Pitala amutesya umumanyili yula, akalalusya akati, "Malafyale, buli isya mundu uyu?"

22 U Yesu akamwamula akati, "Pala ngulonda ukuti abe nubumi mupaka ngise, imba uli nasyo nimbombo yiki?" Ungonge une!"

23 Amasyu agha ghakasata ku bamanyili bosi ukuti, "Umumanyili uyu atakwisa pakufwa. Loli u Yesu atakayugha ku kwabo ukuti atakwisa pakufwa. "Akati pala une ngulonda ukuti abe nubumi mpaka une ngise, imba uli nasyo nimbombo yiki?"

24 Uyu yo mumanyili wa kusimikisya ifindu fififi, sona weyo akasimba, sona tusimenye ukuti ukusimikisya kwake kwa naloli.

25 Pali sona ifindu ifingi fyo u Yesu akabomba. Pala fyosi fikasimbiwagha, ngwinong’ona ukuti pachisu chosi ichapasi nge patakaba ubuyo ubwa kukwana ubwakusungimo ama buku ghagha gho nge ghasimbiwe.