1 U Yesu akanyokela kwi ghamba lya misyunguti. 2 Pangelo ngelo ngani akingila sona munyumba ya Chala, ko abandu bosi bakamubunganila, akikala pasi nukwanda pakubamanyisya. 3 Abamanyisi aba ndaghilo na ba Falisayi bakisa nu mukolo yo bakamukola mubulowe, bakamwimika pakati pa bandu bosi. 4 Po bakamubusya u Yesu bakati, "We Mumanyisi, umukolo uyu bamukola akubomba ubulowe. 5 Indaghilo sya Mozesi sikalamula ukuti abakolo baba baghoghiwaghe pakumusumba na mabwe. Losulu uwe ukuti choni?" 6 Bakayugha bububu ukuti bamuteghe mukayughile, umwakuti bamususye. Loli u Yesu akinama pasi akasimba na kafingwi kake. 7 Bo balindile bububu pakumulalusya, u Yesu akinuka nukubabusya ukuti, "Yo atanangitepo lumo, weyo andile pakumusumba nibwe umukolo uyu." 8 Po akinama sona nukusimba pasi na kafingwi kake. 9 Loli bo bifwa sisisi, bakafumaghapo weka weka ukwandila abasongo, mupaka u Yesu akasyala mwene nu mukolo yula, bo akali imilile pala pala. 10 U Yesu akinuka nukumulalusya umukolo yula ukuti, "Imba bali kwighi bo bakukulonga? Atasyalitepo nayumo umundu uwakukulonga?"

11 Umukolo yula akamula akati,

"We Malafyale, nayumo umundu." U Yesu akati, "Nune bububu ndakulonga, bukagha, utakabombe sona imbibi."

12 Bo u Yesu akuyugha sona na bandu akati, "Une ne bwelu bwa muchisu, po wesi yo akungonga une atakwisa pakwenda lumo muchisi, loli akwisa pakuba nu bwelu bwa bumi."

13 Aba Falisayi bakayugha nawe bakati, "Uwe ukwisimikisya wemwene, ulusimikisyo lwako te lwa bwanaloli."

14 U Yesu akamula akati, "Napo ngwisimikisya nisya une nemwene, ulusimikisyo lwangu lwa bwanaloli pakuti menyeko ko ngafuma nako ngubuka, loli mutamenyeko ko ngafuma pamo ko ngubuka. 15 Umwe mukulonga ukufwana na kabonekele ka bandu, loli une ndakumulonga umundu nayumo. 16 Loli pala ngulonga ubulongi bwangu bwa bwanaloli, pakuti nde nemwene, loli indi poka nu Tata yo akanduma. 17 Sisimbiwe mu Ndaghilo sinyu ukuti ubwa kamboni bwa bandu babili, ko kuti bwa bwanaloli. 18 Une ngwisimikisya nemwene nisya une, po wepe u Tata yo akanduma, akusimikisya."

19 Po bakamulalusya bakati, "Ali ko kwighi ughuso?"

U Yesu akamula akati, "Une mutamenye, wepe nu Tata wangu mutamumenye. Pala mukamanyagha, ngali wepe u Tata wangu mumumenye." 20 U Yesu akayugha amasyu ghosi ghaghagha bo akumanyisya mu Nyumba ya Chala, papipi nu buyo bwa kusopelamo ifyabupi. Loli atakabapo nayumo umundu uwa kumukola pakuti akabalilo kake kakaba kakali katakwanite.

21 U Yesu akababusya sona akati, "Une ngubuka, po mukwisa pakundonda, loli mukwisa pakufwila mumbibi sinyu. Mutangabukako ko ngubuka."

22 Po abalongosi aba Chiyuda bakayugha bakati, imba akwisa pakwighogha mwene, po akuyugha akuti, ko ngubuka une, umwe mutabaghile pakufikako?"

23 U Yesu akababusya akati, "Umwe mwe mukafuma muchisu chapasi ichi, une ngafuma kumwanya. Umwe mwe bandu ba muchisu cha pasi ichi, loli une tene wa muchisu chapasi ichi. 24 Ichi cho chifukwa ngababusya ukuti mukwisa pakufwila mumbibi sinyu, pala mutakusubila ukuti, ‘Une nene.’"

25 Bakamulalusya bakati, "Imba we wenu?"

U Yesu akabamula akati, "Une ne mundu yo ababusya ukwandila kubwandilo. 26 Indi nasyo nyingi isya kuyugha nukubasusya umwe. Loli yo akanduma wabwanaloli, po nguchibusya ichisu cha pasi syene syo nifwile ku kwake."

27 Batakasyaghannya ukuti u Yesu akayughagha ku kwabo nisya wise. 28 U Yesu akayugha nabo akati, "Bo mukumukwesya u Mwana wa Mundu, po mukwisa pakumanya ukuti, ‘Une nene’ sona mukwisa pakumanya ukuti ndakubombapo nachimo nu bulaghili bwangu, loli nguyugha syene syo u Tata ambusisye ukuti njughe. 29 Po yo akanduma ali poka nune, atandekite nemwene pakuti akabalilo kosi ngubomba syo sikumuhobosya."

30 Bo u Yesu ayugha sisisi, abingi bakamusubila.

31 Po u Yesu akababusya aba Yuda bo bakamusubila akati, "Pala mukwifwila amasyu ghangu, naloli mwe bamanyili bangu, 32 umwe mukwisa pakubumanya ubwanaloli, sona ubwanaloli bukwisa pakubasatula." 33 Bakamwamula bakati, "Utwe twe baluko lwa Abulahamu, tute lumo basya ba Mundu yumo. Po ukung’anamula choni pakuyugha ukuti mukwisa pakuba basatuke?"

34 U Yesu akabamula akati, "Bwanaloli ngubabusya ukuti umundu wesi yo akubomba imbibi, musya wa mbibi. 35 Umusya atakwikalisya munyumba akabalilo kosi, loli umwana umwanalume yo akwikalisya akabalilo kosi. 36 Pala u Mwana wa Mundu akubasatula, po naloli mukwisa pakuba mwe basatuke. 37 Simenye ukuti mwe baluko lwa Abulahamu, loli mukulonda pakungogha, pakuti isyu lyangu litalimo mu mwinyu. 38 Une nguyugha syo nasitesya kwa Tata wangu, loli umwe mukubomba syo mukifwa kwa tata winyu."

39 Abene bakamwamula bakati, "Utwe utata we Abulahamu." U Yesu akabamula akati,

"Pala mukaba bana ba Abulahamu ngali mukubomba imbombo syo Abulahamu akabombagha. 40 Loli umwe mukulonda pakungogha, umundu yo ababusisye ubwanaloli, bo ngifwa pakufuma kwa Chala. U Abulahamu atakabomba ngati sisisi. 41 Umwe mukubomba imbombo sya tata winyu."

Abene bakamwamula bakati, "Utwe tutakapapiwa mubulowe, tuli nu tata weka, yo we Chala."

42 U Yesu akababusya akati, "Pala u Chala akabanga we tata winyu, ngali munganite une, pakuti nisa kuno ukufumila kwa Chala, pakuti ndakisa nemwene, loli weyo akanduma. 43 Imba choni cho mutakusyaghannya syo nguyugha? Chifukwa mutangifwisya isyu lyo nguyugha. 44 Umwe u tata winyu, Mumyasi yula, po mukulonda ifinyenwa fya tata winyu, ukwandila ko ku bwandilo umwene akaba mughoghi, sona atimilile lumo pa bwanaloli pakuti ubwanaloli butalimo mumwake, bo umwene akuyugha ubumyasi bwene, po akuyugha isyake mwene, pakuti umwene mumyasi, sona weyo we tata wa bumyasi bosi. 45 Loli pakuti nguyugha ubwanaloli, mutakusubila. 46 Imba alimo yumo mumwinyu yo angasimikisya ukuti une ne wambibi? Pala nguyugha ubwanaloli, po imba choni cho mutakusubila? 47 Yo ali mwa Chala, akwifwa amasyu gha Chala. Loli umwe mutakwifwa chifukwa mute mwa Chala."

48 Aba Yuda bakamulalusya u Yesu bakati, "Imba tutakayugha ubwanaloli ukuti we Musamaliya, sona uli nimbepo imbibi?"

49 U Yesu akabamula akati, "Une nde nimbepo imbibi, loli ngumughindika u Tata, loli umwe mutakungindika une. 50 Une ndakwilondela nemwene amapalo, loli aliko weka yo akulonda, sona weyo mulongi. 51 Naloli ngubabusya ukuti, pala wesi yo akwifwila amasyu ghangu, atakwisa pakufwa lumo."

52 Aba Yuda bakamubusya bakati, "Ipano twasimikisya ukuti uli nimbepo imbibi. U Abulahamu akafwa, bope na basololi bakafwa, loli uwe ukuyugha ukuti umundu wesi yo akughifwila amasyu ghangu atakwisa pakufwa lumo. 53 Imba uwe we songo ngani ukukila u tata witu u Abulahamu, yo akafwa? Sona bope na basololi bakafwa, imba ukwinong’ona ukuti we wenu?"

54 U Yesu akabamula akati, "Pala ngighindika nemwene ngali ulughindiko lwangu lwa bubu. We Tata yo akungindika, yo umwe mukuti we Chala winyu. 55 Umwe mutamumenyepo lumo, loli une mumenye. Pala nguti ndamumenye, ngali ne mumyasi ngati mwemwe, loli une mumenye, sona ngwifwila amasyu ghake. 56 U tata winyu u Abulahamu akahoboka ngani bo akutesya ukwisa kwa lisiku lyangu, po akatesya nu kuhoboka ngani."

57 Aba Yuda bakamubusya u Yesu bakati, "We utafikite ni finja fifite, loli ukuti ukamutesya u Abulahamu!" 58 U Yesu akabamula akati, "Naloli ngubabusya une ukuti ngabako kale bo nu Abulahamu akali pakupapiwa."

59 Po bakaseba amabwe ukuti bamusumbe nagho, loli u Yesu akabwama nu kufumamo mu nyumba ya Chala.