1 Mutakatamiwaghe mumyoyo yinyu, mumusubile u Chala, sona musubile nune. 2 Munyumba ya Tata wangu muli ubuyo ubwingi ubwa kwikalamo. Pala butakabangamo ngali mbabusisye, nabuka pakubanosekesya ubuyo umwe. 3 Po pala ngubuka pakubanosekesya ubuyo umwe, ngwisa sona pakubasenya ukuti ko indi une koko numwe mukabe. 4 Po muyimenye isila ko ngubuka une."

5 U Tomasi akayugha akati, "Malafyale, tutamenyeko ko ukubuka, po tungayimanya buli isila?"

6 U Yesu akamwamula akati, "Une ne sila, ne bwanaloli, sona ne bumi, nayumo yo akwisa kwa Tata, loli pene po akwendela mumwangu. 7 Pala naloli mumenye une mubaghile mumumanye nu Tata wangu wepe, ukwanda ipano mwamumanya sona mwamutesya."

8 U Filipu akayugha ku kwake akati, "Malafyale, tulange utwe u Tata, ukuti nutwe twikutisiwe."

9 U Yesu akamula akati, "Filipu nali numwe akabalilo akatali, po nulu ukali utamenye une? Yo pala akundesya une yo akumutesya nu Tata, imba po choni cho ukuti, ‘Utulangisye utwe u Tata wako?’ 10 Utakusubila uwe ukuti une indi mwa Tata, sona wepe u Tata ali mumwangu? Amasyu gho ngubabusya umwe te ghangu, loli nu Tata yo ali mu mwangu akubomba imbombo syake. 11 Musubile une pakuti nguyugha ukuti indi mwa Tata, wepe u Tata ali mumwangu, pala mutakusubila une musubile chifukwa cha imbombo syene. 12 Naloli ngubabusya umwe, ukuti yo akusubila une, akwisa pakubomba imbombo syo une ngubomba. Wepe akwisa pakubomba, sona akwisa pakubomba imbombo ingulu ngani ukukila pa isi, chifukwa ngubuka kwa Tata. 13 Po fyosi fyo mukusumila mwilita lyangu, ngwisa pakubomba, pakuti u Tata aghindikiwe ukwendela mu Mwana. 14 Pala mukusuma fyosi ukwendela mwilita lyangu, une ngwisa pakubomba.

15 "Pala munganite une, po mukonge indaghilo syangu. 16 Po une ngwisa pakusuma kwa Tata, po akwisa pakubapa umwe umwafwilisi uyungi, ukuti ikale numwe bwile na bwile, 17 We Mbepo yo akafumbula ubwanaloli ukuyana nisya Chala. Ichisu chapasi chitangamupokela, chifukwa chitangamutesya pamo chitangamumanya, loli umwe mumumenye, pakuti akwikala numwe, sona ali mumwinyu.

18 "Ndakwisa pakubaleka umwe ngati mwe bana balanda nguyukwisa sona ku kwinyu. 19 Pasyete papala bubu, po ichisu chapasi chitakwisa pakundesya sona, loli umwe mukwisa pakundesya, pakuti indi nu bumi, po numwe musukuba nubumi. 20 Pisiku lililyo mukwisa pakumanya ukuti une indi mwa Tata, numwe muli mumwangu, sona une indi mumwinyu.

21 "Yo pala akukonga ndaghilo syangu nu kwifwila. Po weyo anganite une, yo pala anganite une, akwisa pakughaniwa nu Tata wangu, nune ngwisa pakumughana sona ngwisa pakwibonesya nemwene kukwake."

22 U Yudasi (te we Yudasi Sikaliyoti) akayugha nawe akati, "Malafyale, sili buli po ukuti ngwisa pakwibonesya nemwene kukwitu, loli muchisu chapasi awe?"

23 U Yesu akamula akati, Pala umundu yo anganite une, ayukwifwila amasyu ghangu. Po u Tata wangu ayukumughana, sona u Tata wangu poka nune tukwisa ku kwake nu kwikala nawe. 24 Yo atanganite une atakughifwila amasyu ghangu. Po amasyu gho mukwifwa te ghangu, loli ghakufuma kwa Tata yo akanduma une.

25 Fyosi ifi nayugha bo ngali indi numwe. 26 Loli Umwafwilisi, u Mbepo Mwikemo, yo u Tata akwisa pakubatumila mwilita lyangu, yo akwisa pakubamanyisya nukubakumbusya ifindu fyosi fyo nayugha numwe.

27 Umutende ngubalekela umwe, ngubapa umutende wangu. Ndakubapa umwe ngati mo ichisu chapasi chikubapela. Mutakatamiwaghe mumyoyo yinyu pamo ukoghopa. 28 Mukanyifwa nguyugha numwe ukuti, Ngubuka, loli ngwisa sona ku kwinyu.’ Pala mukanganagha une, ngali muhobokite ukuti ngubuka kwa Tata, pakuti u Tata yo mukulu ngani ukukila une. 29 Po ipano ngubabusya nganila bo sikali sitabombiwe, ukuti pala sikwisa pakubombiwa mukasubilaghe. 30 Ndakwisa pakuyugha inyingi numwe, pakuti umulaghili wa chisu chapasi akwisa. Yo ate namaka papangu, 31 loli abandu ba muchisu chapasi bamanye ukuti mughanite u Tata, nukuti mbombe ngati mo u Tata akandamulila une.

"Twende, tufumepo pabuyo ubu."