1 Bo lutafikite u Lusekelo lwa Pasaka, u Yesu akasimanya ukuti akabalilo kake ka kwana akakufumila pa chisu chapasi ukubuka ku Wise. Po pakubaghana bo bakaba bake muchisu chapasi, akabaghana mupaka pabumalilo.

2 Bo bali pakulya ichakulya cha pamasuba, po u Mumyasi yula akabikamo kale mumoyo uwa Yudasi, umwana wa Simoni Sikaliyoti inyinong’ono isya kumubika munyobe sya balughu. 3 U Yesu akasimanya ukuti u Wise akamupa ifindu fyosi munyobe syake, nukuti akafuma kwa Chala, sona akunyokela kwa Chala, 4 akanyamukapo po bakalya ichakulya chapamasuba, akafula ilaya lyake ilya kusi nukusenya umwenda wake nukwipinya mumusana wake. 5 Po akakusya amisi mwibeseni, nukwanda pakubasukusya abamanyili bake mufinama nukubapuputa umwenda gho akipinya nagho. 6 Akisa kwa Simoni Pitala, po u Pitala akayugha ku kwake akati, "Malafyale, imba we kusukusya mufinama fyangu?"

7 U Yesu akamwamula akati, "Syo ngubomba utangasimanya ulu uwe, loli uyu kusimanya mundasi."

8 U Pitala akayugha akati, "Utakwisa pakusukusya lumo finama fyangu."

U Yesu akamwamula akati, "Pala ndanga kusukusya uwe, bo tute poka nuwe."

9 U Simoni Pitala akayugha ku kwake akati, "Malafyale, te finama fyangu fyene, loli munyobe na kumutu kwangu!"

10 U Yesu akamwamula akati, "Yo pala oghite atakogha sona, loli ifinama fyene, umubili ghosi ghuswepite, loli te wesi mwa umwe." 11 Pakuti akasimanya yo akuya pakumubika mu nyobe sya balughu, cho chifukwa akayugha ukuti, "Te mwe bosi muswepite."

12 Bo amala pakubasukusya mufinama fyabo, akafwala umwenda wake uwakusi, po akikala pabuyo bwake, akayugha ku kwabo akati, Imba mukusimanya syo imbabombile umwe? 13 Mukunyitisya mukuti Mumanyisi sona Malafyale, mukuyugha momumo, momo mbelile. 14 Pala une, ne Malafyale pamo ne Mumanyisi ngubasukusya mu finama fyinyu, numwe mubagile pakusukusannya mu finama fyinyu. 15 Pakuti mbapile ichifwanikisyo, chakuti numwe mubombe samo nababombela. 16 Naloli, ngubabusya umwe ukuti uwambombo atakuba lumo wapamwanya ukila umalafyale wake, pamo umutumiwa atakubapo lumo wapamwanya ukumukila yo akamutuma. 17 Pala mufimenye ifindu fififi, po mwe basayiwa pala mukufimbomba.

18 Ndakuyugha isya umwe mwe bosi, une mbamenye bo mbasalile, ukuti cho chisimbiwe chikwanilisiwe, ‘Yo akulya nune ichakulya yo asambukile une.’ 19 Une ngubabusya umwe isi ipano, bo sikali sitabombiwe, ukuti pala sikuya pakubombiwa mukasubile ukuti, ‘Une nene.’ 20 Naloli ngubabusya umwe, wesi yo akamupokela yo ngamutuma, yo akumbokela nune, yo akumbokela une akumupokela yo akanduma une."

21 Bo u Yesu ayugha isi, akatamiwa ngani mwambepo nukusimikisya ukuti, "Naloli ngubabusya umwe, yumo mwa umwe akuya pakumbika munyobe syabalughu."

22 Po abamanyili bakalingisannya bene bene, nukuswigha ukuti imba akuyugha we wenu. 23 Yumo mu bamanyili bake, yo u Yesu akamughana ngani, akikala papipi nu Yesu. 24 U Simoni Pitala akamupalisya nukuyugha ukuti, "Mulalusye ka ukuyugha we wenu."

25 Po yo akamweghamila u Yesu, akayugha ku kwake akati, "Malafyale, angaba we wenu."

26 U Yesu akamula akati, "Yo ngumupa akamenyu ka chibama cho nasasila mumbale nu kumupa umundu, umundu yuyuyu bo weyuyo." Po akasenya akamenyu ka chibama akasasila nu kumupa u Yudasi mwana wa Simoni Sikaliyoti. 27 Bo u Yudasi apokela ichibama, u Satana akingila mu mwake. U Yesu akayugha ku kwake, "Syo ukulonda pakubomba, bomba lubilo." 28 Po patakabapo nayumo pa bandu bo bakikala pakulya, yo akasyaghannya syo u Yesu akang’amulagha. 29 Pakuti u Yudasi akaba ninyambi yakusungilamo indalama, bamo bakinong’ona ukuti, u Yesu amatuma ukuti, "Kaghule fyo fikulondiwa pa lusekelo" Pamo ukuti abape fimo abapina.

30 Po, bo apokela akachibama, papapo na papapo akafuma kusi. Loli pakaba po pabusiku.

31 Bo u Yudasi afuma, u Yesu akuyugha akati, "Ipano u Mwana wa Mundu aghindikiwe, sona Chala akughindikiwa mu mwake, 32 pala u Chala akughindikiwa mu mwake, po wepe u Chala akwisa pakughindikiwa umwana mumwake, po akwisa pakughindikiwa papapo. 33 Mwe bana bangu kwasyala akabalilo kapala akakuba numwe. Mukuya pakundonda une, sonamo ngayughila ku ba Yuda, ipano nguyugha kukwinyu ukuti, ‘ko ngubuka mutabaghile pakwisako.’

34 Ipano ngubapa ululaghilo ulupya ulwa kuti, mughananaghe. Ngati mo une mbaghanile umwe, momo numwe mughananilaghe. 35 Pala mukughanana po bakwisa pakumanya abandu bosi ukuti mwe bamanyili bangu."

36 U Simoni Pitala akamulalusya akati, "Malafyale, ukuya kwighi?" U Yesu akamula akati,"

"Ko ngubuka utakangonge ulu, loli ukwisa pakungonga panyuma."

37 U Pitala akayugha ku kwake akati, "Malafyale, imba choni cho ndabaghile pakukonga ulu? Une niyanisye pakufwa nuwe"

38 U Yesu akamwamula akati, "Imba naloli ukuya pakufwa chifukwa cha une?" Naloli nguyugha nuwe, ukuti bo u mukolwe atakokolikite, uyu kungana une katatu ukuti utamenye.